Yohanes 6 - Muna Southern Dialect

Yesus nepakande mie dolima hewu 6:1-15

¹ Nopalusi anaꞌa Yesus nokalamo we sewetano teꞌino Galilea nekonando dua teꞌino Tiberias.

² Mie bhahi dobhatompa doangkafie hampano padamo dowoha tanda timenteꞌaono nefekaꞌosa mie mosaki.

³ Yesus nofonimo te kabhawo maka nengkoha ne itu bhe anaguhuꞌino.

⁴ Wakutuu aitu nomaꞌomo hohaeaꞌano Paskando miendo Yahudi.

⁵ Yesus nofoselamo matano nowoha mie dobhatompa domai se Anoa maka nopugau ne Filipus ambano, “Ne amai daeꞌoli bhahaa o oti so daomaa andoa ini?”

⁶ Kapugauꞌano peda maitu nofesoloe kaowu, kapaꞌamo Yesus nopandeꞌaanemo so nehabuno.

⁷ Ambano Filipus, “Mahingga ponambono mie naalu wula daeꞌoliane oti so andoa ini, paeꞌo namataa mahingga nasekabhini-bhini kaaowu seemie.”

⁸ Seemie anaguhuꞌino sigaoꞌano (neano Andreas, kakutaꞌano Simon Petrus) nopugaumo ne Yesus ambano,

⁹ “Ne ini nandoo seemie anaꞌi bhe rotino lima kebha bhe kentano haa ulu, tamaka o ae maꞌanano so kantawundo mie peda ini?”

¹⁰ Ambano Yesus, “Tududaomu mie itu dengkoha.” Ne itu nobhahi kahoku, dadiꞌanomo mie maitu dengkohamo, o moꞌane kaowu dapelima hewu kabhahindo.

¹¹ Yesus noalamo roti amaitu, nefoampe katumpuno lalo ne Lahataꞌala maka nodawu-dawuandae mie bhahi mengkohano naꞌa. Pedamo dua aitu kenta haa uluno nodawu-dawuandae ampa kapoindalondo.

¹² Hato doweꞌi Yesus nopugaumo ne anaguhuꞌino ambano, “Foꞌonueꞌomu kabhilaꞌando itu keana nomambisa.”

¹³ Dadiꞌanomo kabhilaꞌando dohumaa dofoꞌonuemo, ompulu haa wua kalangka noponoꞌao kakokebha-kebhano roti lima onuno saꞌituini.

¹⁴ Dowoha kaowu tanda timenteꞌaono nehabuno Yesus maitu, dopugaumo mie bhahi ambado, “Kotu-kotuꞌu Anoa ini anabii ⸤ nepodhandiꞌao weo Kitabi⸥ so humatono we dhunia ini.”

¹⁵ Yesus nopandeꞌaane andoa maitu damai damosuhue dasumangkee naembali omputo, dadiꞌanomo nofogaati Wutono te kabhawo.

Yesus nekala-kala te wawono oe 6:16-21

¹⁶ Nosoo kaowu oleo, anaguhuꞌino Yesus dokalamo we teꞌi.

¹⁷ Andoa dosawimo ne bhangka, maka dopolimba we sewetano, we liwuno Kapernaum. Nohondomo oleo tamaka Yesus miinaꞌo dua nahumatodaa.

¹⁸ Gahaꞌa o teꞌi nokogahuhamo hampano kawea moꞌosa.

¹⁹ Andoa dobhose napelima tawa nomo kilomo kakodoꞌonoa, tadua dowohamo Yesus nekala-kala te wawono oe nomaꞌoti bhangkando. Andoa doteꞌi sepaliꞌa.

²⁰ Tamaka Yesus nopugau ambano, “O Idi inia, koise moteꞌiomua!”

²¹ Patudhundo damofonie, gahaꞌa bhangkando lasao nosede te kaꞌotiꞌa kahopeꞌando.

Mie bhahi doꞌondofi Yesus 6:22-24

²² Hato nomentae, mie bhahi we sewetano teꞌi endewi dopandeꞌaane ne itu o bhangka seꞌonu kaowu, miina bhe bhangka sigaoꞌano. Dopandeꞌaane dua bhangka anaꞌa dopolimbaanemo anaguhuꞌino we sewetano, tamaka Yesus miina namangkafidaa.

²³ Pada amaitu nohatomo seꞌonu haa onu bhangka maiꞌaono we liwuno Tiberias nosede we owano kahumaaꞌando roti, sapalusino Ompu nefoampe katumpuno lalo endewi.

²⁴ Gahaꞌa dopandeꞌaane kaowu Yesus bhe anaguhuꞌino miinadamo ne itu, andoa lasao dosawi ne bhangka andoa maitu maka dopolimba we Kapernaum doꞌondofi Yesus.

Roti dumadino 6:25-59

²⁵ Hato dopoꞌawaꞌao Yesus we sewetano teꞌi mie bhahi dofeenaemo ambado, “Guru, endefiemo hato ne ini?”

²⁶ Yesus notobhoosida ambano, “Amohatokoomu, kotu-kotuꞌu hintimiu ondofi kanauꞌomu suano mbaꞌinomo losangiomu maꞌanano tanda timenteꞌaono, tamaka mbaꞌinomo padamo humaaꞌomu roti ampa moweꞌiomu.

²⁷ Koise kahadhaaꞌomu so meꞌawaꞌaoꞌomu oti so mowoloꞌano, tamaka tabeano kahadhaaꞌomu so meꞌawaꞌaoꞌomu oti tumarano ampa suhue dhamani. Oti anaꞌa namaꞌangkoꞌeomu Anano Manusia - Idimo ini - hampano Anoamo nefopoolino Lahataꞌala Amano.”

²⁸ Dofeenaemo dua ambado, “Kaowu taeafaꞌimo bhahaa so tahumabuꞌao kahadhaa nepoindalono Lahataꞌala?”

²⁹ Yesus tanotobhoosida ambano, “Kahadhaa nepoindalono Lahataꞌala, parasaeaꞌomu ne Katuduno Lahataꞌala!”

³⁰ Maka ambado toha, “Mehabu kainsami tanda ae bhahaa, tamohaꞌao bhe tamarasaeaꞌao ne hintu? Kahadhaa ae bhahaa so nehabumu?

³¹ Ingka awuaꞌi mani padamo dohumaa manna we pandaso bhalano peda tibuhino weo Kitabi, ‘Andoa nowaꞌanda dohumaa roti maiꞌaono te surugaa.’ ”

³² Ambano Yesus, “Amohatokoomu, kotu-kotuꞌu suano anabii Musa maꞌangkoomu roti maiꞌaono te surugaa, tamaka Amaku maꞌangkoomu roti sakotuꞌuꞌano maiꞌaono te surugaa.

³³ Kapaꞌamo roti kawaꞌaono Lahataꞌala nosampu nomaiꞌao te surugaa neowa dadi ne dhunia.”

³⁴ Dopugaumo ambado, “Waompu, waꞌa kainsami kansuhu roti aitu.”

³⁵ Ambano Yesus, “Idimo ini roti dumadino, sasuka maino ne Idi paemo naoꞌahoa, sasuka marasaeano ne Idi paemo nakekele wuꞌunoa.

³⁶ Tamaka padamo dua afohatokoomu, mahinggamo woha kanauꞌomu miina marasaeaꞌomu.

³⁷ Kosasawindo newaꞌaono Amaku ne Idi damai se Idi, maka sasuka maino se Idi paise agumihada.

³⁸ Kapaꞌamo kasampuꞌaku amaiꞌao te surugaa paise ahumabu kapoindaloku Wutoku, tamaka ahumabu kapoindalono Tumudu kanau.

³⁹ Kapoindalono Tumudu kanau peda aini, kosasawindo newaꞌaono ne Idi paise bhe so tiuluꞌano, tamaka amodadida ne Oleono Kiama.

⁴⁰ Ainiꞌaemo kapoindalono Amaku, gaono mpuu sasuka mohano Anano bhe marasaeano ne Anoa naeꞌawa dadi suhue dhamani maka amodadie ne Oleono Kiama.”

⁴¹ Miendo Yahudi dopokapamu-pamuhumo ne Yesus mbaꞌinomo pada nopugau, “Idimo ini roti sumampuꞌano maiꞌao te surugaa.”

⁴² Ambado, “Anoa ini ingka Yesus anano Yusuf, inano bhe amano ingka dopandeꞌaaneomu. Noafaꞌao dua nopugau, ‘Idi ini asampu amaiꞌao te surugaa?’ ”

⁴³ Ambano Yesus, “Koise pamuhuomua.

⁴⁴ Bhe naseemie pae bhe so moolino maino ne Idi ane pae nahumelae Amaku tumudu kanau, maka sasuka maino maitu amodadida ne Oleono Kiama.

⁴⁵ Nandoo notibuhi weo Kitabindo anabii, ‘Andoa maitu kosasawindo namoinaꞌuda Lahataꞌala.’ Dadiꞌanomo sasuka metingkeno bhe tumahimano kafoinaꞌuno Amaku, namai se Idi.

⁴⁶ Aini miina nakomaꞌana nandoo mie mohano Amaku. Madano mohano ulano Amaku, mpahinomo Anoa maiꞌaono ne Lahataꞌala.

⁴⁷ Amohatokoomu, kotu-kotuꞌu sasuka marasaeano neꞌawamo dadi suhue dhamani.

⁴⁸ Idimo ini roti dumadino.

⁴⁹ Awuaꞌimiu dohumaa manna we pandaso bhalano tamaka ingka domate dua.

⁵⁰ Tamaka nopoꞌala bhe roti sumampuꞌano maiꞌaono te surugaa, sasuka momaaꞌe paise namatea.

⁵¹ Idimo ini roti dumadino sumampuꞌano maiꞌaono te surugaa. Ane mie naomaa roti aini nadumadi ampa suhue dhamani. Roti so newaꞌaoku maitu dhagiku Wutoku, somo kadadiꞌando dhunia.”

⁵² Dofetingke peda anaꞌa, miendo Yahudi dopotaga-tagalimo sapada-pada andoa ambado, “Nada amai bhahaa mie aini nafowaꞌao dhagino so daomaaꞌomu?”

⁵³ Ambano Yesus, “Amohatokoomu, kotu-kotuꞌu ane pae momaaꞌomu dhagino Anano Manusia bhe mohoꞌuomu heano pae bhe dadi weo totono lalomiu.

⁵⁴ Sasuka momaano dhagiku bhe mohoꞌuno heaku neꞌawamo dadi suhue dhamani maka amodadie ne Oleono Kiama.

⁵⁵ Kapaꞌamo dhagiku kotu-kotuꞌu oti nehumaa, heaku kotu-kotuꞌu kafohoꞌu.

⁵⁶ Sasuka momaano dhagiku bhe mohoꞌuno heaku noseꞌisemo bhe Idi, o Idi aseꞌisemo dua bhe anoa.

⁵⁷ Amaku, kamaiꞌaoꞌano dadi, Anoa tumudu kanau, kadadiꞌakumo. Pedamo dua anaꞌa sasuka momaano mbadhaku naeꞌawa dadi maiꞌao ne Idi.

⁵⁸ Ainiꞌaemo roti sumampuno maiꞌaono te surugaa, nopoꞌala bhe roti nehumaando awuaꞌimiu bhe domatemo. Sasuka momaano roti aini nadumadi ampa suhue dhamani.”

⁵⁹ Kosasawiꞌae ini nokowambaane Yesus we liwuno Kapernaum, wakutuuno nofofoinaꞌu weo lambu kasambaheaꞌa.

Mie marasaeano we Galilea dosowo 6:60-66

⁶⁰ Pada dofetingke kosasawiꞌae naꞌa, dobhahi anaguhuꞌino Yesus dopugaumo ambado, “Wamba aini nobhie datumahimae, laꞌae so mondoiꞌe?”

⁶¹ Weo totono lalono Yesus nopandeꞌaane putae anaguhuꞌino dokamuntu-muntuꞌao wambano maitu. Dadiꞌanomo nopugaumo ambano, “Bhahaa wambaku saꞌituini nofohungga kaparasaeamiu?

⁶² Kaowu nada amai bhahaa fekihimiu ane mohaomu Anano Manusia sumuli namoni te kaeateꞌano wawo?

⁶³ Fowaꞌaono dadi buꞌou ingka Rohino Lahataꞌala, kaꞌosano mbadhano manusia miina sepaliꞌa nakofahalaa. Sabhaha wamba nefosampeku ne hintimiu, wambano Rohino Lahataꞌala, meowanomo dadi.

⁶⁴ Tamaka ne olotamiu nandoo dua tapa marasaeano.” Kapaꞌamo Yesus nopandeꞌaane mpini kabhao-bhaono ndo laꞌae so tapa marasaeano bhe laꞌae so mowae ne limano kaewa.

⁶⁵ Nopugaumo dua ambano, “Ingka ainiꞌaemo katifohatoꞌamiu saꞌituini: bhe naseemie pae bhe so maino ne Idi ane Amaku pae namaꞌane kapoindalo bhe kuasa so namaiꞌao ne Idi.”

⁶⁶ Notandamo ne itu dobhahi anaguhuꞌino dosowo, miinamo damangkafiea.

Kamangakuno Petrus 6:67-71

⁶⁷ Nopugaumo Yesus ne anaguhuꞌino ompulu hoduano ambano, “Bhahaꞌi gaomiu kumalamoomu dua bhe hintimiu?”

⁶⁸ Notobhoosimo Simon Petrus ambano, “Waompu, takumala se laꞌae bhahaa? Wambamumo meowano dadi suhue dhamani.

⁶⁹ Insaodi taparasaeamo bhe tapandeꞌaanemo Hintumo mie mongkilo Katuduno Lahataꞌala.”

⁷⁰ Notobhoosimo Yesus ambano, “Ingka Idimo ini milikoomu koompulu hoduamiu itu, tamaka seemie ne olotamiu itu seetani.”

⁷¹ Nepulaoꞌaono Yesus maitu Yudas anano Simon Iskariot, anoa maitu seemie ne olotando anaguhuno ompulu hoduano, somo mowano Yesus ne limando kaewa.