Yohanes 5 - Muna Southern Dialect

Yesus nefekaꞌosa mie ne oleono Sabat we oeno Betesda 5:1-18

¹ Nopalusi anaꞌa nandoo toha hohaeaꞌando miendo Yahudi maka Yesus nofoni we Yerusalem.

² We Yerusalem ne owano fointo bhalano koneaꞌano Kagualino Dhumba nandoo oe kaekadiuꞌa, weo wamba Ibrani dokonae Betesda. Oe aini doselie maka dowaliligiane tambi kafeoluꞌa lima onu.

³ Ne tambi-tambi naꞌa dobhahi sepaliꞌa mie mosaki dendole-ndole. Nandoo o kabunto, o kakempa bhe kalu, [andoa dofenta-fentaa kaendono oe.

⁴ Kapaꞌamo sepaku-sepaku seemie malaꞌekatino Ompu nosampu maka noꞌendu oe aitu. Sasuka maꞌinduluno sumampuno weo oe nopalusi kaendono oe lasao noꞌosa, o ae maka dua sakino.]

⁵ Ne itu nandoo seemie moꞌane, tolu fulu alu taꞌumo nosaki.

⁶ Yesus nowoha mie amaitu nendole-ndole bhe nopandeꞌaane nomponamo tapedamo amaitu, maka nopugau ambano, “Poindalo bhahaa moꞌosaa?”

⁷ Ambano mie anaꞌa, “Waompu, miina bhe mie so mosampu kanau weo oe wakutuuno nokokaendo. Kaneꞌo akumala dogoloti kanaumo bhaindo.”

⁸ Ambano Yesus, “Wanumo, sangke kampasi kaodoꞌamu maka kala.”

⁹ Mie anaꞌa lasao noꞌosa, nosangke kampasino maka nokala. Tamaka oleo aitu oleono Sabat.

¹⁰ Dadiꞌanomo miendo Yahudi dopugaumo ne mie nefekaꞌosa maitu ambado, “Oleo aitu oleono Sabat, weo tubhono agamantoomu ingka pae naembalia tumongku kampasimu.”

¹¹ Tamaka anoa notobhoosida ambano, “Mie mekaꞌosa kanau notudu kanau atumongku kampasiku maka akumala.”

¹² Dofeenamo ambado, “Laꞌae bhahaa tumuduko sumangke kampasimu maka kumala naꞌa?”

¹³ Tamaka mie nefekaꞌosa naꞌa miina namandeꞌaanea mieno, hampano Yesus nekunsalomo ne kantawundo mie sampe miinamo natiwoha.

¹⁴ Pada amaitu Yesus nopoꞌawaanemo weo Lambuno Lahataꞌala maka nopugauane ambano, “Aitu moꞌosamo, tiehemo mehabu dhosa keana nokantibhako dhumuluꞌano kadaha.”

¹⁵ Mie amaitu nolimbamo maka nofohato miendo Yahudi putae Yesusmo maitu mekaꞌosae.

¹⁶ Dadiꞌanomo miendo Yahudi dofekasabhamo Yesus, hampano nehabu peda maitu ne oleono Sabat.

¹⁷ Tamaka Yesus tanopugau ambano, “Amaku nokahadhaa kansuhu taꞌampamo aitu, dadiꞌanomo Idi akahadhaa dua.”

¹⁸ Dofetingke peda maitu miendo Yahudi tanodhulu dokopatudhu damongkoe, suano kaowu nelempagi tubhono oleono Sabat, tamaka mbaꞌinomo nokona Lahataꞌala Amano, maꞌanano nopototoꞌao wutono bhe Lahataꞌala.

Yesus nofotipandeꞌao Wutono 5:19-47

¹⁹ Yesus notobhoosidamo ambano, “Amohatokoomu, kotu-kotuꞌu Anano Lahataꞌala - Idimo ini - miina bhe habu nepoolino maiꞌao ne kuasano Wutono, ane miina naoha deki nohabue Amano. Kapaꞌamo nehabuno Amano, nehabunomo dua Anano.

²⁰ Amano noasiꞌao Anano sampe nofosusuane sabhaha nehabuno Wutono; bhahamo namosusuane habu sedhuluꞌa dua kabhalano, somo kamenteꞌamiu.

²¹ Amano nefowanu mie komate-mateno bhe nofodadida, pedamo dua anaꞌa Anano nefodadi dua ampa nepoindalono.

²² Amano miina naebhitahaki laꞌae maka dua, tamaka kuasa so nafobhitahakiꞌao padamo nowaꞌane Anano,

²³ neanomo sabhaha mie damosibhala Anano napototo bhe Amano. Sasuka tapa mosibhalano Anano, anoa miina dua namosibhala Amano tumuduno Anano.

²⁴ Amohatokoomu, kotu-kotuꞌu sasuka metingkeno wambaku bhe marasaeano ne Tumudu kanau, ingka neꞌawamo dadi suhue dhamani. Paise naeꞌawa kahukumu, kapaꞌamo nogampimo maiꞌao ne mate nopesuamo weo dadi.

²⁵ Amohatokoomu dua, kotu-kotuꞌu nahumato tempono, aitu nohatomo, mie mateno dametingke suahano Lahataꞌala maka andoa metingkeno naꞌa dadumadi.

²⁶ Amano kamaiꞌaoꞌanomo dadi; pedamo dua aitu Anano nowaꞌane kuasa nembali kamaiꞌaoꞌano dadi.

²⁷ Pedamo dua anaꞌa padamo nowaꞌane kuasa so nafobhotusiꞌao, hampano Anoa Anano Manusia.

²⁸ Koise menteomu ane metingkeomu peda ini, kapaꞌamo nahumato tempono kosasawindo mie weo kobuhu dametingke suahano.

²⁹ Mie humabu metaano dalumimba maiꞌao ne kobuhundo, damanu bhe dadumadi suhue dhamani, tamaka humabu modaino damanu daetahima kahukumu.

³⁰ Idi miina akonipoolia maiꞌao ne kuasaku Wutoku, Idi afobhotusi noposahataa bhe nefetingkeku ne Amaku. Kabhotusiku noꞌadhili kapaꞌamo miina amangkafi kapoindaloku Wutoku, tamaka kapoindalono Tumudu kanau.

³¹ Ane aembali sakusii so Wutoku, wambaku maitu miina nakumotuꞌua,

³² tamaka nandoo mie sigaoꞌano sumakusii kanau, apandeꞌaane nesakusiiꞌaono naꞌa nokotuꞌu.

³³ Hintimiu padamo metuduomu mie ne Yohanes maka nesakusiiꞌaono nopulaoꞌao Idi nokotuꞌu.

³⁴ Ampamo kaowu sakotuꞌuno Idi ini miina aefaraluu kasakusiino manusia, ingka taꞌafohatokoomu kaowu neanomo osumalamatiomu.

³⁵ Yohanes maitu tapedamo kantalea humende nokotilanga, hintimiu moꞌiaꞌaneomu tilangano, tamaka sebantaha kaowu.

³⁶ Tamaka Idi bhe kasakusiiku noliuꞌe nesakusiiꞌaono Yohanes. Nepulaoꞌaoku sabhaha kahadhaa nehabuku; kahadhaa naꞌa nofotaka kanaꞌe Amaku so ahumabu. Kahadhaamo amaitu nembalimo kasakusiiku, nembalimo dua bukutiino Idi ini notudu kanau Amaku.

³⁷ Amaku tumudu kanau, Anoamo sumakusii kanau. Hintimiu miina metingkeomu suahano, miina dua mohaomu ulano.

³⁸ Bhoasaono miina dua naeate weo totono lalomiu, mbaꞌinomo miina marasaeaꞌomu ne Katuduno.

³⁹ Hintimiu poguhuꞌaoꞌomu Kitabindo anabii, kunaꞌemiu peda aitu so kaeꞌawaꞌamiu dadi suhue dhamani. Gahaꞌaitu Kitabi andoa naꞌa nosakusiiꞌao Idi.

⁴⁰ Ampamo kaowu hintimiu mokiidoomu maiꞌomu ne Idi so meꞌawaꞌaoꞌomu dadi suhue dhamani maitu.

⁴¹ Idi miina aeꞌondofi kafosibhalando manusia.

⁴² Apandeꞌaangkoomu, weo totono lalomiu miina sepaliꞌa bhe kaasimiu ne Lahataꞌala.

⁴³ Amai weo kuasano Amaku, gahaꞌa miina tumahima kanauꞌomu, tamaka mie sigaoꞌano domai weo kuasando wutondo, ingka tahimadaomu.

⁴⁴ Hintimiu gaomiu damosibhalakoomu mie bhaimiu, miina meꞌondofiomu kafosibhala maiꞌao ne Kaseemie-mieꞌano. Dadiꞌanomo, nada amai marasaeaꞌomu gahaꞌa?

⁴⁵ Koise kofekihiomu Idi aobhieangkoomu ne Amaku; so mobhieangkoomu anabii Musa, kapaꞌamo anoamo neposahunaꞌaomiu.

⁴⁶ Ane kotu-kotuꞌu marasaeaꞌomu ne anabii Musa, tetewei marasaeaꞌomu dua ne Idi, kapaꞌamo nebuhino anabii Musa nopulaoꞌao Idi.

⁴⁷ Tamaka ane pae marasaeaꞌomu nebuhino anabii Musa, nada amai marasaeaꞌomu gahaꞌa ne wambaku ini?”