Yohanes 4 - Muna Southern Dialect

Yesus nopuga-pugau bhe seemie hobhine miendo Samaria 4:1-42

¹ Miendo Farisi dofetingkemo mie mangkafino Yesus bhe nekadiuno nofoliuꞌemo kabhahino mangkafino Yohanes.

² (Gahaꞌaitumo sakotuꞌuꞌano wutono Yesus miina nafokadiu, mpahinomo anaguhuꞌino.)

³ Nopandeꞌaane kaowu miendo Farisi dofetingkemo peda anaꞌa, Yesus nohunsamo kadieno Yudea maka nosuli we kadieno Galilea.

⁴ Anoa tetewei nalumempagi kadieno Samaria.

⁵ We Samaria nohatomo ne seꞌonu kota neano Sikar, ne owano wite kawaꞌaono Yakub endefiꞌini ne Yusuf anano.

⁶ Ne itu nandoo sumuno Yakub. Yesus nowulemo sepaliꞌa nekala-kala dadiꞌanomo nengkoha ne wiwino sumu anaꞌa. Oleo hambi-hambi ompulu haa matamo.

⁷ Gahaꞌa nohatomo seemie hobhine miendo Samaria naetambu oe. Ambano Yesus, “Bhe idi oemu aohoꞌu.”

⁸ Anaguhuꞌino dokalamo we kota daeꞌoli oti.

⁹ Nopugaumo hobhine miendo Samaria maitu, “Nada amai hintu miendo Yahudi mesalo mohoꞌu ne idi miendo Samaria?” (Kapugauꞌano peda anaꞌa, miendo Yahudi miina dapokala-kalaꞌia bhe miendo Samaria).

¹⁰ Ambano Yesus, “Ane mandeꞌaane kadawuno Lahataꞌala bhe laꞌae sakotuꞌuno mesalono ne hintu, ‘Bhe idi oemu aohoꞌu’, tetewei hintumo so mesalono ne Anoa, maka Anoa namaꞌangko oe meowano dadi.”

¹¹ Ambano toha hobhine amaitu, “Waompu, maiane dua ne amai oe meowano dadi naꞌa? Ingka miina kotambua, pakade sumu aini nendalo.

¹² Foliuꞌemo hintu bhahaa bhe awua mani Yakub maꞌa kainsami sumu aini? Anoa nofohoꞌu dua oeno sumu aini bhe ana-anano bhe kada-kadadi kakaneano.”

¹³ Ambano Yesus, “Sasuka mohoꞌuno oe aini nakekele toha wuꞌunoa,

¹⁴ tamaka sasuka mohoꞌuno oe newaꞌaoku, paemo nakekele wuꞌuno ampa suhue dhamani. O oe so newaꞌaoku naembali matano oe we lalono, oeno napontalua-lua kansuhu naeowa dadi suhue dhamani.”

¹⁵ Ambano hobhine naꞌa, “Waompu, bhe idi oe anaꞌa, neanomo paemo nakekele wuꞌukua, keana dua amai aetambu oe ne ini.”

¹⁶ Ambano Yesus, “Kala saliꞌi moꞌanemu maka maiꞌomu se ini.”

¹⁷ Ambano hobhine anaꞌa, “Miina akomoꞌanea.” Ambano Yesus, “Nokotuꞌu pugaumu itu, miina komoꞌanea,

¹⁸ kapaꞌamo moꞌanemu dolidimamo, maka moꞌane pomeatefiꞌamu itu suano moꞌanemua. Dadiꞌanomo nokotuꞌu pugaumu.”

¹⁹ Ambano hobhine anaꞌa, “Waompu, aitu apandeꞌaangkomo hintu ini seemie anabii.

²⁰ Awuaꞌi mani ⸤ miendo Samaria⸥ dosombai Lahataꞌala te wawono kabhawo aini, tamaka ambamiu ⸤ miendo Yahudi⸥ ampamo we kotano Yerusalem so kasombaꞌa ne Lahataꞌala.”

²¹ Ambano Yesus, “Parasaea kanau waꞌina, tetewei nahumato tempono o mie paemo dasumombai Amaku Lahataꞌala te kabhawo aini, paemo dua we Yerusalem.

²² Hintimiu ⸤ miendo Samaria⸥ sombaiꞌomu tapa nepandeꞌaomiu, insaodi ⸤ miendo Yahudi⸥ tasombai nepandeꞌao mani, kapaꞌamo kasalamati noangka ne miendo Yahudi.

²³ Tamaka nahumato tempono, aitu ingka nohatomo, mie kotu-kotuꞌu sumombano ne Amaku Lahataꞌala dasumombaiꞌe maiꞌao ne totono lalondo bhe kasombaindo nabanara, kapaꞌamo Amaku nopoindaloda mie medano maitu.

²⁴ Lahataꞌala maitu o Rohi, dadiꞌanomo mie sumombano ne Anoa, tabeano dasumombaiꞌe maiꞌao ne totono lalondo bhe kasombaindo nabanara.”

²⁵ Notobhoosimo hobhine anaꞌa, “Apandeꞌaane, nahumato kaowu Omputo Fosalamatino nekonando Mesias, naefebhihitaianemo kosasawiꞌae naꞌa ne insaodi.”

²⁶ Ambano Yesus, “Ingka Idimo ini, muga-mugaunomo bhe hintu ini.”

²⁷ Tangasano dopuga-pugau, dohatomo anaguhuꞌino. Andoa domente sepaliꞌa dowoha Yesus nopuga-pugau bhe seemie hobhine, tamaka bhe seemie miina bhe meenano ne hobhine naꞌa, “Meꞌondofi ae?” Miina dua dameena ne Yesus noafaꞌao dua nopuga-pugauꞌao bhe hobhine amaitu.

²⁸ Gahaꞌa hobhine amaitu nohunsamo kaiꞌino lasao nokala we kota nofohato miendo kota.

²⁹ Ambano “Mai ondoomu, ne tatu nandoo seemie nofohato kanau sabhaha nehabuku. Bhahaa Anoamo maitu Mesias, Omputo Fosalamatino?”

³⁰ Dadiꞌanomo o mie dokalamo we simbalino kota dopoꞌawaꞌao Yesus.

³¹ Tangasano andoa we laano sala, anaguhuꞌino dosaliꞌimo Yesus naomaa. Ambado, “Guru, humaa kadeki.”

³² Tamaka Yesus tanotobhoosida ambano, “Bhe otiku tapa nepandeꞌaomiu.”

³³ Anaguhuꞌino tadopofee-feenamo sapada-pada andoa ambado, “Bhe mie bhahaa maꞌane oti?”

³⁴ Ambano Yesus ne andoa, “Aangkafi kapoindalono Tumudu kanau bhe amotoka kahadhaano, aitumo oti nehumaaku.

³⁵ Ingka ambamiu, ‘Tana fato wula o tobheꞌamo’, tamaka amohatokoomu: fosela matamiu, ondoomu kaampono gandum tatu, ingka nokunimo, nohatomo tempono datumobhe.

³⁶ Aitu mie tumobheno notahimamo ponambono, nefoꞌonu pehapino so kadadiꞌa ampa suhue dhamani. Dadiꞌanomo metisano bhe tumobheno sanea mowulano lalo.

³⁷ Pedamo naꞌa nokantibhamo kapalenda aini: seemie metisano, seemie tumobheno.

³⁸ Hintimiu atudukoomu tumobheomu ne kaampo tapa nemowuleꞌaomiu; bhaindo mowuleane, hintimiu kolabaꞌaono kaowuleꞌando.”

³⁹ Dobhahi miendo Samaria maiꞌaono ne kota aitu doparasaeamo ne Yesus hampano pugauno hobhine amaitu peda ini, “Anoa nofohato kanau sabhaha nehabuku.”

⁴⁰ Dohato ne Yesus miendo Samaria maitu, desaloiꞌe naeate kadeki bhe andoa, sampe Yesus neate ne itu haa oleo kaomponanoa.

⁴¹ Sedhuluꞌa dua kabhahindo mie marasaeano ne Yesus hampano kafoinaꞌuno.

⁴² Dopugaumo ne hobhine amaitu ambado “Insaodi taparasaea suano mbaꞌinomo tafetingke pugaumu, tamaka hampano tafetingkeꞌao wuto mani ne Anoa. Aitu tapandeꞌaanemo Anoamo ini kotu-kotuꞌu Mosalamatino dhunia.”

Yesus nosuli we Galilea 4:43-45

⁴³ Nopalusi haa oleono naꞌa Yesus nopansuhumo we kadieno Galilea,

⁴⁴ kapaꞌamo wutono Yesus padamo nopugau, “Seemie anabii miina damosibhalaea we liwuno wutono.”

⁴⁵ Nohato we Galilea miendo kadie naꞌa dotahima metaaꞌe, hampano padamo dowohae sabhaha nehabuno Yesus we Yerusalem ne hohaeaꞌa endefiꞌini, wakutuu anaꞌa bhe andoa.

Yesus nefekaꞌosa anano seemie tungguno kamali 4:46-54

⁴⁶ Palusi anaꞌa Yesus nosulimo toha we liwuno Kana kadieno Galilea, kaebhaliiꞌano oe nembali angguru endefiꞌini. Ne itu nandoo seemie moꞌane tungguno kamali, nosaki anano we liwuno Kapernaum.

⁴⁷ Nofetingke Yesus nomaiꞌao we Yudea nofoni toha we Galilea, tungguno kamali naꞌa nokalamo nopoꞌawaꞌao Yesus, nesalo nakumala namekaꞌosa anano, kapaꞌamo anano nosaki tamomateꞌano.

⁴⁸ Ambano Yesus, “Ane paise mohaomu tanda tapa mentela bhe giu timenteꞌaono, paise marasaeaꞌomu.”

⁴⁹ Ambano tungguno kamali naꞌa, “Waompu, maimo tinangke miinaꞌo namate anaku.”

⁵⁰ Ambano Yesus, “Kalamo, anamu noꞌosamo.” Mie anaꞌa noparasaea pugauno Yesus lasao nokala.

⁵¹ Nandooꞌe we laano sala, dosumpuiꞌemo bhatuaꞌino dofohatoe anano noꞌosamo.

⁵² Anoa nofeenada bhahaꞌi hambi seꞌae anano notanda nototomata. Ambado, “Endewi, hambi semata pana oleo sodono tanosipadaꞌamo.”

⁵³ Tungguno kamali naꞌa nokofeꞌulaimo lalono ingka wakutuumo anaꞌa Yesus nopugau ne anoa, “Anamu noꞌosamo.” Dadiꞌanomo anoa bhe kosasawindo mie weo lambuno doparasaeamo.

⁵⁴ Ainiꞌaemo tanda kahaa pakuno nehabuno Yesus wakutuuno nosuli we Galilea nomaiꞌao we Yudea.