Yohanes 21 - Muna Southern Dialect

Yesus nofotiwoha Wutono ne anaguhuꞌino ne wiwino teꞌino Tiberias 21:1-14

¹ Pada anaꞌa Yesus nofotiwohamo toha Wutono ne anaguhuꞌino ne wiwino teꞌino Tiberias. Kadhadhiano peda aini.

² Sewakutuu dopohompu-hompumo Simon Petrus, Tomas nekonando dua Didimus, Natanael maiꞌaono we Kana ne kadieno Galilea, anaꞌino Zebedeus bhe dohodua anaguhu sigaoꞌano.

³ Nopugaumo Simon Petrus ne andoa, “Akumala aekenta.” Ambado sigaoꞌano, “Tamai dua insaodia.” Dadiꞌanomo dokalamo dosawimo ne bhangka, tamaka suhue alo miina sepaliꞌa dakonipoolia.

⁴ Nohaha kamentae Yesus neehe-ehe te kaꞌotiꞌa. Tamaka anaguhuꞌino miina damandeꞌaanea putae Anoa maitu Yesus.

⁵ Nopugaumo Yesus ne andoa ambano, “O sabhangka, mepooliomu kentaa?” Dotobhoosimo ambado, “Miina.”

⁶ Nopugaumo Yesus ambano, “Tabuhao pukamiu we suanano bhangka, tetewei mepooliomu.” Dadiꞌanomo dotabuhaomo dua pukando, gahaꞌa miina damoolie dohelae kaꞌosano kabhahino kentano.

⁷ Anaguhu kamoasiꞌaono Yesus nopugaumo ne Petrus ambano, “Ingka Ompu maitua.” Nofetingke putae Ompu maitu, Simon Petrus nebhadhumo kapaꞌamo saꞌituini miina nakobhadhua, maka nopunda weo teꞌi.

⁸ Anaguhu sigaoꞌano doangkafiemo bhe bhangkando hampano miina nakodoꞌoa bhe kaꞌotiꞌa, napemoꞌono metere kaowu poowa dohela pukando noponoꞌao kenta.

⁹ Dohato te wite dowohamo weano efi, te wawono nandoo roti bhe kentano.

¹⁰ Nopugaumo Yesus ambano “Meowa kaitaomu seꞌulu haa ulu kenta kaneꞌo nehakomiu itu.”

¹¹ Simon Petrus nosawimo ne bhangka maka nohela pukando te wite noponoꞌao kenta bhalano. Kabhahino moꞌono lima fulu tolu ulu, tamaka mahinggamo peda anaꞌa pukando miina naobhensia.

¹² Ambano Yesus, “Maimoomu defebhakuomu!” Ne olotando anaguhuꞌino maitu bhe naseemie miina bhe mokadono so meenae, “Laꞌae hintu ini?” Kapaꞌamo dopandeꞌaanemo Anoa maitu Ompu.

¹³ Yesus nodhulupidamo neala roti maka nodawu-dawuandae, pedamo dua naꞌa o kenta.

¹⁴ Tolu pakuꞌaomo anaꞌa Yesus nofotiwoha Wutono ne anaguhuꞌino palusi kawanuꞌano maiꞌao ne mate.

Yesus bhe Petrus 21:15-19

¹⁵ Pada defebhaku nopugaumo Yesus ne Petrus ambano, “Simon anano Yohanes, kaasimu ne Idi noliuꞌe bhahaa kaasindo andoa ini ne Idi?” Notobhoosimo Petrus ambano, “Uumbe Ompu, ingka pandeꞌaane aoasiangko.” Ambano Yesus, “Dambaꞌaanda dhumbaku.”

¹⁶ Pada anaꞌa Yesus nofendua toha nofeena, “Simon anano Yohanes, moasi kanau bhahaa?” Ambano Petrus, “Uumbe Ompu, ingka pandeꞌaane aoasiangko.” Ambano Yesus, “Dhaganida dhumbaku.”

¹⁷ Katolu pakuno Yesus nofeena toha ambano, “Simon anano Yohanes, moasi kanau bhahaa?” Simon Petrus nokompeahamo lalono nofetingke Yesus nofeenae tolu pakumo, “Moasi kanau bhahaa?” maka notobhoosimo dua ambano, “Ompu, ingka pandeꞌaane bhahi-bhahiꞌae, pandeꞌaane dua ingka aoasiangko.” Ambano Yesus, “Ondofaanda dhumbaku.

¹⁸ Amohatoko, kotu-kotuꞌu nandoo kahangkuno dadimu, kamandaꞌao wutomu aamua maka takalamo ampa kapoindalomu. Tamaka nahumato kumamungkula, monsoho limamu dakumatapuangkoe bhaindo maka daowako ne kaeateꞌa tapa nepoindalomu.”

¹⁹ Kapugauꞌano peda anaꞌa nofohatoane nada amai so kamateꞌano Petrus, somo namekakalabhiaꞌao Lahataꞌala. Pada anaꞌa nopugaumo dua ne Petrus ambano, “Angkafimo Idi.”

Anaguhu kamoasiꞌaono Yesus 21:20-23

²⁰ Wakutuu anaꞌa Petrus nodolimo, gahaꞌa nowohamo anaguhu kamoasiꞌaono Yesus noangkafida. Anaguhumo aini mengkohano ne sohihino Yesus wakutuuno dohumaa bhe nofeena ambano, “Ompu, laꞌae bhahaa so mowako ne kaewa?”

²¹ Nowoha anoa maitu, Petrus nopugaumo ne Yesus ambano, “O ae bhahaa so netompaloino anoa ini?”

²² Ambano Yesus, “Ane amoindalo anoa ini nadumadi kansuhu ampa asumuli, ingka suano nepandeꞌaomua. Ampamo kaowu hintu angkafi Idi.”

²³ Gahaꞌa nolelemo dua bhihita ne olotando bhahitie marasaeano, putae anaguhu seemieno maitu pae namate-matea. Tamaka Yesus miina namugau ne Petrus putae anaguhu seemieno maitu pae namate, ampamo kaowu, “Ane amoindalo anoa ini nadumadi ampa asumuli, ingka suano nepandeꞌaomua.”

Kasongkono wamba 21:24-25

²⁴ Anaguhumo aini sumakusiiꞌaono kosasawiꞌae kadhadhia aini. Padamo dua nobuhie, bhe dopandeꞌaaneomu kasakusiino nokotuꞌu.

²⁵ Nandoo nobhahi dua tanda sigaoꞌano nehabuno Yesus, tamaka ane kosasawiꞌae naꞌa dabuhie damala sehondae, namu-namuku dhunia ini pae namuleaꞌea kaꞌosano kabhahino kitabi so nebuhino.