Yohanes 20 - Muna Southern Dialect

Kawanuꞌano Yesus 20:1-10

¹ Same-samentaeno ne oleono Ahadhi, nandoo nohohondo, Maria Magdalena nokalamo we kobuhu. Gahaꞌa nowohamo kontu kaꞌontono wobhano lia kafokobuhuꞌa naꞌa padamo dodolee.

² Lasao notende nopoꞌawaꞌao Simon Petrus bhe anaguhu sigaoꞌano, kamoasiꞌaono Yesus. Nofohatoda ambano, “Ompu padamo doalae mie maiꞌao weo kobuhu, maka miina tamandeꞌaanea bhahaꞌi doowae ne amai.”

³ Petrus bhe anaguhu sigaoꞌano naꞌa lasao dokala we kobuhu.

⁴ Kohoduando dotende, tamaka nehimba anaguhu sigaoꞌano naꞌa bhe Petrus, sampe paꞌindulu nohato se kobuhu.

⁵ Anoa nofeonga we lalono kobuhu, tanowoha kawalu, tamaka miina namesua.

⁶ Nohato dua Simon Petrus, lasao nopesua weo kobuhu. Anoa nowoha dua kawalu.

⁷ Gahaꞌa kabhia-bhia kakompono fotuno Yesus miina napohompu bhe kawalu naꞌa, tamaka nogaati nomoisa, padamo dolupie.

⁸ Anaguhu maꞌindulu humatono saꞌituini nopesuamo dua weo kobuhu. Anoa nowohae bhe noparasaeamo dua,

⁹ kapaꞌamo kaomponano ini miinaꞌo dalumosangiea wambano Kitabi putae Yesus tetewei namanu namaiꞌao ne mate.

¹⁰ Pada aitu kohoduando dosulimo se lambu.

Yesus nofotiwoha Wutono ne Maria Magdalena 20:11-18

¹¹ Tamaka Maria neehe-ehe ne owano kobuhu bhe noꞌae. Poowa noꞌae nofeonga weo kobuhu.

¹² Gahaꞌa tanowohamo dua malaꞌekati dohodua, pakeando sakapu-kapute. Dengkoha ne katifondoleꞌano maeatino Yesus, seemie te fotu, seemie we aꞌe.

¹³ Dofeenaemo malaꞌekati naꞌa ambado, “Waꞌina noafa gahaꞌa moꞌaeꞌao?” Notobhoosimo Maria ambano, “Ompuku doalae mie, miina amandeꞌaanea bhahaꞌi doowae ne amai.”

¹⁴ Pada nopugau peda naꞌa nodolimo we kundo, gahaꞌa tanowohamo dua Yesus neehe-ehe ne itu, tamaka miina namandeꞌaanea Anoamo itu Yesus.

¹⁵ Ambano Yesus, “Waꞌina, noafa gahaꞌa moꞌaeꞌao? Ondofi laꞌae bhahaa?” Weo fekihino Maria mie amaitu dhagano kaendea, sampe nopugau ambano, “Waompu, ane alae hintu, fohato kanau owae ne amai, amalaeꞌao.”

¹⁶ Ambano Yesus ne anoa, “Maria!” Maria nodoli bhe nopugau weo wamba Ibrani, “Rabuni!” (Rabuni maꞌanano Guru).

¹⁷ Ambano dua Yesus, “Koise dampasi kanaua, kapaꞌamo miinaꞌo akumala te Amaku. Aitu sulimo se bhahitieꞌiku, fohatoda Idi akumalamo te Amaku bhe Amamiu dua, Lahataꞌalaku bhe Lahataꞌalamiu dua.”

¹⁸ Dadiꞌanomo Maria Magdalena nokalamo nofohato anaguhuꞌi ambano, “Idi padamo awoha Ompu!” Anoa nekapunaanda dua putae Yesus mohatoane kosasawiꞌae maitu.

Yesus nofotiwoha Wutono ne anaguhuꞌino 20:19-23

¹⁹ Nohondo kaowu oleo ne oleono Ahadhi naꞌa, anaguhuꞌino dopohompu-hompumo ne seꞌonu lambu. Fointono padae dokunsie hampano doteꞌi miendo Yahudi. Gahaꞌa tanosihatoꞌamo Yesus neehe-ehe ne wunta-wuntando bhe nopugau ambano, “Katohopono dadi so hintimiu!”

²⁰ Pada nopugau peda naꞌa nofotiwohaandamo limano bhe tompano kaha-kahano. Anaguhuꞌino nowula sepaliꞌa lalondo dowoha Ompu.

²¹ Nopugaumo toha Yesus ambano, “Katohopono dadi so hintimiu! Pedamo Amaku notudu kanau, atudukoomu dua kumalaomu.”

²² Pada nopugau peda naꞌa nobusodamo, ambano “Tahimamo Rohino Lahataꞌala.

²³ Ane dhosando mie umamponidaomu, Lahataꞌala naꞌumamponida dua. Tamaka ane pugauꞌomu dhosando sadaa-daa, dhosando sadaa-daaꞌe.”

Yesus nofotiwoha Wutono ne Tomas 20:24-29

²⁴ Tomas nekonando dua Didimus (maꞌanano Kalopo) seemie dua ne olotando anaguhuꞌino ompulu hoduano maitu, tamaka miina bhe anoa wakutuuno Yesus nomai.

²⁵ Ambado sabhangkaꞌino, “Insaodi padamo tawoha Ompu.” Tamaka Tomas tanopugau ambano, “Ane paeꞌo amoha angkaꞌano paso ne limano, maka amotumpuane wunano limaku, pakade amedampa tompano kaha-kahano, pae sepaliꞌa amarasaea.”

²⁶ Nopalusi alu oleo anaguhuꞌino Yesus dopohompu-hompumo toha ne lambu anaꞌa, wakutuu anaꞌa bhe Tomas dua. Fointo dopadae dokunsie. Gahaꞌa tanosihatoꞌamo Yesus neehe-ehe ne wunta-wuntando bhe nopugau ambano, “Katohopono dadi so hintimiu!”

²⁷ Pada anaꞌa nopugaumo ne Tomas ambano, “Ondo limaku ini, fotumpu wunano limamu ne ini. Fonsoho limamu, fedampa tompano kaha-kahaku ini. Koemo nopoibhahaa lalomu, parasaeaꞌo toha!”

²⁸ Ambano Tomas ne Yesus, “Ompuku bhe Lahataꞌalaku.”

²⁹ Ambano Yesus, “Hampano padamo woha kanau hintu parasaea. Dokodawua mpuu mie tapa moha kanau tamaka doparasaea.”

Patudhuno Kitabi aini 20:30-31

³⁰ Daanumo nandoo nobhahi tanda-tanda sigaoꞌano nehabuno Yesus ne wisendo anaguhuꞌino, tamaka miina natibuhi weo Kitabi aini.

³¹ Ampamo kaowu kosasawiꞌae ini padamo dobuhie neanomo hintimiu ⸤ mebasano bhe metingkeno⸥ marasaeaꞌomu putae Yesus maitu Omputo Fosalamatino, Anano Lahataꞌala; neanomo dua hampano kaparasaeamiu ne Anoa meꞌawaomu dadi.