Yohanes 2 - Muna Southern Dialect

Hame-hameno kagaa we Kana 2:1-11

¹ Nopooli tolu oleo nandoo hame-hameno kagaa we liwuno Kana we kadieno Galilea. Ne naꞌa bhe inano Yesus dua.

² Yesus bhe anaguhuꞌino dobhasida dua we kahame naꞌa.

³ Wakutuuno anggurundo nowolomo, nopugaumo inano Yesus ne Anoa, “Nowolomo anggurundo.”

⁴ Ambano Yesus, “Noafa pugauꞌao ne Idi, ina? Ingka miinaꞌo nahumatoa tempoku.”

⁵ Tamaka inano Yesus nopugau ne mie mehe-mengkohano ambano, “O ae maka dua netuduꞌaono, angkafieꞌomu!”

⁶ Ne itu nandoo nomo wua gusi dofontaa-ntaaꞌe mbali defewaniuꞌao peda kaneando miendo Yahudi. Uleano see-seewua napemoꞌono litere.

⁷ Nopugaumo Yesus ne mie mehe-mengkohano ambano, “Fosingiꞌianeomu oe gusi andoa itu.” Gusi anaꞌa dofosingiꞌie ampa nopono.

⁸ Nopugaumo Yesus ne andoa ambano, “Aitu metambuomu seendai maka owaaneomu kamungkula mandeꞌaono kahame ini.” Andoa deowaanemo.

⁹ Kamungkula mandeꞌaono kahame naꞌa nofenamimo oe membalinomo angguru maitu. Anoa miina namandeꞌaane bhahaꞌi nomaiꞌao ne amai angguru maitu, ampamo kaowu mie mehe-mengkohano tumambue mandeꞌaanea. Dadiꞌanomo lasao nosaliꞌi loꞌia buꞌou moꞌane,

¹⁰ bhe nopugau ambano, “Kotika mehabuno kahame nefolimba deki angguru foliuno kambaka. Nobhahi kaowu dofohoꞌu humatono, kaneꞌomo defolimba tapa seaꞌe mombakaꞌano. Gahaꞌa hintu ini mehunsa-hunsa angguru foliuno kambaka, kaneꞌo folimbae aitu!”

¹¹ Kadhadhia aini tanda timenteꞌaono kabhao-bhaonomo nehabuno Yesus; nokadhadhia we liwuno Kana kadieno Galilea. Pedamo aini Yesus nofotiwoha kakalabhiano sampe anaguhuꞌino doparasaeaꞌemo.

¹² Pada aitu Yesus nokalamo we liwuno Kapernaum nopoowa-owa bhe inano, bhahitieꞌino bhe anaguhuꞌino. Andoa deate ne itu seꞌoleo haa oleo kaomponano.

Yesus nofekangkilo Lambuno Lahataꞌala 2:13-25

¹³ Hato nomaꞌo hohaeaꞌano Paskando miendo Yahudi, Yesus nokalamo we Yerusalem.

¹⁴ Weo kadeteno Lambuno Lahataꞌala nehatofi mie mahaasono sapi, o dhumba, o dhaadhaha bhe mebhase-bhaseno dhoi dengkoha-ngkoha ne itu.

¹⁵ Yesus nehabumo kahambi maiꞌao ne habuta maka kosasawindo mie maitu bhe sapindo bhe dhumbando noꞌambada domaiꞌao weo kadeteno Lambuno Lahataꞌala. Medhando mebhase-bhaseno dhoi nobhansualeda, dhoindo nokambuhie ne wite.

¹⁶ Mie mahaasono dhaadhaha notududamo ambano, “Fogampidamo kosasawiꞌae itu; koe habuomu lambuno Amaku ini mbali kapodaoaꞌa.”

¹⁷ Anaguhuꞌino dofeꞌulaimo tibuhino weo Kitabi, “Kaasiku ne lambumu tapedamo efi weo totono laloku somo mekawolo kanau.”

¹⁸ Miendo Yahudi dofoewa Yesus ambado, “Motiwoha kainsami tanda timenteꞌaono medano ae bhahaa so katandaino hakumu mehabu peda itu?”

¹⁹ Yesus notobhoosida ambano, “Hunggaeꞌomu Lambuno Lahataꞌala ini maka namooli tolu oleo atumokaemo dua amoehee.”

²⁰ Dopugaumo miendo Yahudi ambado, “Fato fulu nomo taꞌu kaomponano Lambuno Lahataꞌala ini dofoehee maka dotokae, gahaꞌa hintu moehee natolu oleo kaowu?”

²¹ Tamaka Lambuno Lahataꞌala nepulaoꞌaono maitu, mbadhano Wutono.

²² Nopalusi kawanuꞌano nomaiꞌao ne mate, kaneꞌomo anaguhuꞌino dofeꞌulaiꞌe pugauno maitu. Dadiꞌanomo doparasaeamo ne wambano Kitabi bhe wambano Yesus.

²³ Tangasano Yesus we Yerusalem ne hohaeaꞌano Paska dobhahi mie marasaeano ne Anoa, hampano dowohamo tanda timenteꞌaono nehabuno.

²⁴ Tamaka Yesus miina naposahunaꞌao Wutono ne andoa maitu, hampano nopandeꞌaanda kosasawindo.

²⁵ Miina namaraluu damohatoane feꞌilindo manusia, kapaꞌamo nopandeꞌaane totono lalondo manusia.