Yohanes 18 - Muna Southern Dialect

Yesus dohakoe 18:1-11

¹ Pada nosambahea peda naꞌa, Yesus bhe anaguhuꞌino dolimbamo maka dokala te sewetano umeleno Kidron. Ne itu nandoo sehaꞌa kaendea. Yesus nopesuamo ne kaendea naꞌa bhe anaguhuꞌino.

² Yudas so mowano Yesus ne limando kaewa, nopandeꞌaane dua kaendea anaꞌa, kapaꞌamo Yesus bhe anaguhuꞌino nentuhu dopohompu-hompu ne naꞌa.

³ Dadiꞌanomo Yudas nokalamo dua te naꞌa, newowoꞌo setagua tantara bhe dhagaꞌino Lambuno Lahataꞌala katudundo neangkaꞌindo imamu bhe miendo Farisi. Andoa ini detagu bhe kantalea, kaꞌula bhe ewangando.

⁴ Yesus nopandeꞌaanemo kosasawiꞌae so kumadhadhiaꞌano ne Wutono, dadiꞌanomo nodhulu te wise maka nopugau ambano, “Ondofiomu laꞌae bhahaa?”

⁵ Dotobhoosimo ambado, “Yesus miendo Nasaret.” Ambano Yesus, “Ingka Idimo ini.” Yudas, mie modai naꞌa, neehe-ehe dua ne itu bhe andoa.

⁶ Sanopugau Yesus “Ingka Idimo ini”, andoa dosowo bhe dotihambitao ne wite.

⁷ Yesus nofeenadamo toha ambano, “Ondofiomu laꞌae bhahaa?” Ambado, “Yesus miendo Nasaret.”

⁸ Ambano Yesus, “Ingka padamo afohatokoomu Idimo ini. Ane ondofiomu Idi, hunsaꞌanomo andoa ini dokalaꞌao.”

⁹ Kanandooꞌano peda aini somo nokoꞌulaꞌao wambano, “Ama, kosasawindo mie kawaꞌaomu ne Idi, bhe naseemie miina bhe binasano.”

¹⁰ Gahaꞌa Simon Petrus bhe kampueno, lasao nobunae maka notowe bhatuano Imamu Bhalano, sampe tingalano suanano nondawu. Neano bhatua anaꞌa Malkus.

¹¹ Nopugaumo Yesus ne Petrus ambano, “Pusoloe kampuemu itu! Ingka tetewei Idi aohoꞌu ne kampohoꞌuꞌa kawaꞌaono Amaku.”

Yesus ne wiseno Hanas - Petrus nogaga miina namandeꞌao Yesus 18:12-27

¹² Pada anaꞌa taguando tantara bhe neangkando dopoowa bhe dhagaꞌi katuduno miendo Yahudi dohakomo Yesus maka dokatapue.

¹³ Kabhao-bhaono Yesus doowae ne Hanas, kamungkula poniano Kayafas. Kayafas naꞌa membalino Imamu Bhalano taꞌu aitu.

¹⁴ Kayafasmo dua ini tumangahino miendo Yahudi ambano, “Ingka nokofahalaa namate seemie so kosasawindo raꞌeati.”

¹⁵ Simon Petrus bhe seemie anaguhu sigaoꞌano doangkafi Yesus. Anaguhu seemieno naꞌa dopopandeꞌao bhe Imamu Bhalano sampe nopesua nopoowa-owa bhe Yesus weo kadeteno kamalino Imamu Bhalano.

¹⁶ Tamaka Petrus taneehe-ehe we simbali ne owano fointo bhalano. Anaguhu popandeꞌaono bhe Imamu Bhalano naꞌa nosuli we simbali, nopotula-tula bhe hobhine dhagano fointo maka nowowoꞌo Petrus dopesua.

¹⁷ Nopugaumo hobhine dhagano fointo naꞌa ne Petrus ambano, “Ingka hintu ini anaguhuno dua mie atatu.” Ambano Petrus, “Suano!”

¹⁸ Wakutuu anaꞌa bhatua bhe dhagaꞌino Lambuno Lahataꞌala padamo detampo wea maka dehana hampano dohindi. Petrus neehe-ehe dua nehana bhe andoa.

¹⁹ Imamu Bhalano nofee-feenamo Yesus, nofeenaꞌao anaguhuꞌino bhe kafoinaꞌuno.

²⁰ Yesus notobhoosimo ambano, “Idi sadhia apugau mentalea-mentalea ne dhunia, afofoinaꞌu ne lambu-lambu kasambaheaꞌa bhe ne Lambuno Lahataꞌala kapofoꞌo-foꞌonuꞌando kosasawindo miendo Yahudi. Miina sepaliꞌa apugau mpebuni.

²¹ Noafa gahaꞌa feenaꞌao Idi? Feena mie metingke kanau peda amai pugauku ne andoa. Andoa dopandeꞌaane mpuu pugauku.”

²² Pada nopugau peda naꞌa seemie dhagano kamali meehe-eheno ne itu lasao nobhantofa Yesus bhe nopugau ambano, “Gahaꞌa peda itu pugau bhe Imamu Bhalano?”

²³ Ambano Yesus, “Ane naꞌumala pugauku naꞌa, fotiwohae kaꞌalano; tamaka ane nakumantibha, noafa bhantofa kanau?”

²⁴ Pada anaꞌa Hanas nofotudumo damowa Yesus ne Imamu Bhalano Kayafas, daa-daaꞌe bhe katapuno.

²⁵ Gahaꞌa Simon Petrus nandoo neehe-ehe nehana. Ambado mie ne itu, “Ingka hintu ini seemie dua anaguhuno.”

²⁶ Tamaka Petrus nogaga ambano, “Suano!” Ne itu nandoo dua seemie bhatuano Imamu Bhalano, anoa ini bhahitieno bhatua mondawuꞌano tingala netoweno Petrus. Ambano mie anaꞌa “Ingka awohako saꞌituini te kaendea pobhai bhe Anoa.”

²⁷ Petrus fendua toha nogaga, gahaꞌa nopobutu nokakuhuamo manu.

Yesus ne wiseno Pilatus 18:28-38 a

²⁸ Nandoo same-samentaeno dowowoꞌomo Yesus maiꞌao we lambuno Kayafas we kamalino gubernur. Miendo Yahudi dokiido damesua weo kamali naꞌa, keana dokodengo weo tubhono agamando. Kapaꞌamo gaondo daomaa haroano Paska.

²⁹ Dadiꞌanomo Pilatus nolimba nopoꞌawaanda maka nopugau ambano, “O ae gahaꞌa nesangkatiꞌaomiu ne mie aini?”

³⁰ Tadotobhoosimo ambado, “Ane mie aini suano mie modai, ingka pae taowae ne wisemu!”

³¹ Ambano Pilatus, “Wowoꞌoeꞌomu maka bhotusiꞌao wutomiu angkafi tubhono agamamiu.” Ambado miendo Yahudi, “Insaodi miina damolalesa kainsami taepongko mie.”

³² Kanandooꞌano peda ini somo nokoꞌulaꞌao pugauno Yesus wakutuuno nopulaoꞌao nada amai so kamateꞌano.

³³ Pilatus nosulimo weo kamali, nobhasimo Yesus maka nofeenae ambano, “Nokotuꞌu bhahaa hintumo ini Omputo miendo Yahudi?”

³⁴ Ambano Yesus, “Kafeenamu naꞌa nomaiꞌao ne wutomu, kaa dofohatoko dua bhaindo?”

³⁵ Ambano Pilatus, “O miendo Yahudi gahaꞌa idi ini? Ingka saliwumu bhe neangkaꞌindo imamu mowako se idi. Mehabu ae gahaꞌa?”

³⁶ Ambano Yesus, “Kafopahintaꞌaku suano ne dhunia ini. Ane kafopahintaꞌaku ne dhunia ini, teteweimo mieku dapoewangimo keana doowa kanau ne limando miendo Yahudi. Tamaka daanumo kafopahintaꞌaku suano ne dhunia inia.”

³⁷ Ambano dua Pilatus, “Gahaꞌa nokotuꞌu hintu ini omputo?” Ambano Yesus, “Ingka ambamu hintu Idi ini omputo. Patudhuno kalenteꞌaku bhe kahatoꞌaku ne dhunia ini, asumakusiiꞌao kabanara. Sasuka mie tumaino ne kabanara, nametingke suahaku.”

^38a Ambano Pilatus, “O ae bhahaa kabanara naꞌa?”

Yesus dobhotusiane mate 18:38b-19:16

^38b Pada nopugau peda naꞌa, Pilatus nolimbamo toha nopoꞌawaꞌao miendo Yahudi. Ambano, “Miina sepaliꞌa aepoꞌawaꞌao kaꞌalano mie aini.

³⁹ Tamaka ingka nandoo kaneamiu ne hohaeaꞌano Paska aefolimbaangkoomu seemie katohongku. Dadiꞌanomo poindaloomu bhahaa amolimbaangkoomu Omputo miendo Yahudi ini?”

⁴⁰ Andoa tadokei ambado, “Koise anoa, tabeano Barabas.” Gahaꞌa Barabas naꞌa mie modai.