Yohanes 16 - Muna Southern Dialect

Katuhuno lalo 16:1-4 a

¹ “Kosasawiꞌae ini afohatoangkoeꞌomu keana nohungga kaparasaeamiu sampe humunsa kanauꞌomu.

² Hintimiu daꞌumeleꞌaangkoomu mesuaꞌomu lambu kasambaheaꞌa. Tadua nahumato tempono sasuka mie mongkokoomu kunaꞌendomo dofeompu ne Lahataꞌala.

³ Kahabuꞌandomo peda naꞌa hampano miina damandeꞌao Amaku, miina dua damandeꞌao Idi.

^4a Kosasawiꞌae ini afohatoangkoeꞌomu neanomo nahumato tempono meꞌulaiꞌeomu ingka padamo afodhagakoomu.”

Kahadhaano Rohino Lahataꞌala 16:4b-15

^4b “Aini miina amohatoangkoeꞌomu mpini kabhao-bhaono, hampano kaomponano ini nandoo sadhia apobhaiangkoomu.

⁵ Tamaka aitu asumulimo te Tumudu kanau, gahaꞌa ne olotamiu itu miina bhe meena kanau bhahaꞌi akumala ne amai.

⁶ Tamaka aitu afohatokomoomu, kaoguguhuꞌanomo lalomiu.

⁷ Wambaku ini nokotuꞌu, so hintimiu nakofahalaa akumala bhe paisea. Kapaꞌamo ane pae akumala, Rohi Fotulumino pae namaiꞌikoomua, tamaka ane akumala, atumudue namai ne hintimiu.

⁸ Nahumato kaowu Rohi maitu, miendo dhunia namoꞌinsafuanda dhosando, o kabanara bhe kabhotusino Lahataꞌala.

⁹ Namoꞌinsafuda putae kakodhosaꞌando, hampano miina damarasaea ne Idi.

¹⁰ Namoꞌinsafuanda kabanara, kapaꞌamo Idi asumulimo ne Amaku maka hintimiu paemo moha kanauꞌomu.

¹¹ Namoꞌinsafuanda dua kabhotusino Lahataꞌala, hampano Mowano Dhunia ⸤ maꞌanano Kafeompuꞌando seetani⸥ padamo nobhotusie.

¹² Nandoo nobhahi dua so nefohatoꞌaoku ne hintimiu, ampamo kaowu aitu paeꞌo sumodaiꞌeomua.

¹³ Tamaka nahumato kaowu Rohino Lahataꞌala meowano kabanara, Anoamo so matokoomu mandeꞌaoꞌomu sabhaha kabanara. Anoa paise napugau namaiꞌao ne Wutono, tamaka o ae maka dua nefetingkeno namohatoangkoeꞌomu. Namebhihitaiꞌangkoomu dua so kumadhadhiaꞌano mada kaowu.

¹⁴ Anoa namotiwoha kakalabhiaku, hampano namebhihitaiꞌangkoomu sabhaha netahimano ne Idi.

¹⁵ Kosasawiꞌae ndumandooꞌano ne Amaku nandoo dua ne Idi, kapugauꞌakumo putae Rohi maitu namebhihitaiꞌangkoomu sabhaha netahimano ne Idi.”

Kaꞌia namaꞌindulukie kasabha 16:16-33

¹⁶ “Tana sebantaha paemo moha kanauꞌomu, tamaka tana sebantaha toha moha kanaumoomu dua.”

¹⁷ Seemie hodua anaguhuꞌino tadopofee-feenamo ambado, “O ae bhahaa maꞌanano pugauno naꞌa, ‘Tana sebantaha paemo moha kanauꞌomu, tana sebantaha toha moha kanaumoomu dua’? O ae dua maꞌanano pugauno, ‘Idi akumala ne Amaku’?”

¹⁸ Dadiꞌanomo dopugaumo ambado, “O ae bhahaa maꞌanano, ‘Tana sebantaha’? Ingka miina dalumosangieꞌomu.”

¹⁹ Gahaꞌa Yesus nopandeꞌaane patudhundo dameenae, dadiꞌanomo nopugaumo ambano, “Bhahaa pofee-feenaꞌao pugauku saꞌituini, ‘Tana sebantaha paemo moha kanauꞌomu, tana sebantaha toha moha kanaumoomu dua’?

²⁰ Amohatokoomu, kotu-kotuꞌu mada kaowu hintimiu moꞌaeꞌomu, mekaꞌuleiꞌomu tamaka dhunia naoꞌia. Daanumo mosabhaomu, tamaka kasabhamiu itu naembali kawulano lalo.

²¹ Seemie hobhine nosabha wakutuuno nakoana, ingka nohatomo tempono nakumadee-dee. Tamaka salenteno anano, nolimpuꞌaanemo kakadee-deeno hampano nowulamo lalono seemie manusia notobusamo we dhunia.

²² Pedamo dua anaꞌa hintimiu, aitu mosabhaomu tamaka mada kaowu apowoha toha bhe hintimiu bhe naowula lalomiu. Bhe naseemie pae bhe so magoino kawulano lalomiu naꞌa.

²³ Ne oleo anaꞌa paise sepaliꞌa meenaomu ne Idi. Amohatokoomu, kotu-kotuꞌu o ae maka dua nesalomiu ne Amaku weo neaku, tetewei namaꞌangkoeꞌomu.

²⁴ Ampa oleo itu miinaꞌo konimesaloomu weo neaku. Dadiꞌanomo tamesalomoomu, tetewei tumahimaeꞌomu neanomo nasumangkamo kawulano lalomiu.

²⁵ Kosasawiꞌae ini apale-palendaangkoeꞌomu kaowu. Gahaꞌa nahumatomo tempono paemo aepalendaangkoomu, amohatoangkoeꞌomu mentalea-mentalea laꞌae Amaku.

²⁶ Oleo anaꞌa hintimiu mesaloomu weo neaku. Naetaa mandeꞌaaneomu suano Idia so mesaloangkoomu ne Amaku.

²⁷ Kapaꞌamo wutono Amaku noasiangkoomu, hampano padamo moasi kanauꞌomu bhe parasaeaꞌomu putae Idi ini amaiꞌao ne Lahataꞌala.

²⁸ Idi ahato we dhunia amaiꞌao ne Amaku, aitu ahumunsamo dhunia asumuli te Amaku.”

²⁹ Dopugaumo anaguhuꞌino ambado, “Ingka aitu pugaumo mentalea-mentalea, miinamo mepake kapalendaa.

³⁰ Aitu tapandeꞌaanemo, Hintu pandeꞌaane bhahi-bhahiꞌae. Ingka miinamo namaraluua dameenako. Dadiꞌanomo taparasaeamo Hintu ini maiꞌao ne Lahataꞌala.”

³¹ Notobhoosimo Yesus, “Parasaeamoomu gahaꞌa?

³² Nahumato tempono, ingka aitu nohatomo, hintimiu dagumasakoomu. Seemie-seemie nasumuli we lambuno humunsa kanauꞌomu taꞌamoisa. Gahaꞌa Idi miina amoisaa, kapaꞌamo Amaku nopobhai kanau.

³³ Kosasawiꞌae ini afohatoangkoeꞌomu neanomo seꞌiseomu bhe Idi maka meꞌawaomu katohopono dadi. We dhunia ini meꞌawaomu kasabha, tamaka tafekatangkamo lalomiu, dhunia ataloemo.”