Yohanes 14 - Muna Southern Dialect

Yesus kaangkaꞌa so dahumopeꞌao ne Lahataꞌala 14:1-14

¹ Nopugaumo Yesus ambano, “Koise nosabha handamiu, parasaeaꞌomu ne Lahataꞌala, parasaeamoomu dua ne Idi.

² Te lambuno Amaku nobhahi kaeateꞌa, ane paise tetewei amohatokoomu. So kakalaꞌaku te naꞌa aefontaa-ntaaꞌangkoomu kaeateꞌamiu.

³ Mada kaowu akumala aefontaa-ntaaꞌangkoomu kaeateꞌa, asumuli aꞌumuleikoomu, neanomo ne amai kaeateꞌaku, somo dua kaeateꞌamiu.

⁴ Kaangkaꞌa we kahopeꞌaku ingka pandeꞌaanemoomu.”

⁵ Ambano Tomas, “Waompu, ingka miina tamandeꞌaanea kumala ne amai, dadiꞌanomo nada amai dua tamandeꞌaane kaangkaꞌano?”

⁶ Ambano Yesus, “Idimo ini o kaangkaꞌa, meowano kabanara bhe fowaꞌaono dadi. Bhe naseemie paise bhe so humatono ne Amaku ane paise namangka ne Idi.

⁷ Ane mandeꞌa kanauꞌomu, tetewei mandeꞌaaneomu dua Amaku. Aitu ingka pandeꞌaanemoomu bhe wohaemoomu.”

⁸ Tamaka ambano Filipus, “Waompu, fotiwoha kainsami Amamu, naetaamo so insaodi.”

⁹ Ambano Yesus, “Filipus, ingka nomponamo dua apobhaiangkoomu, gahaꞌa miina mandeꞌa kanau? Sasuka mohano Idi nowohamo dua Amaku. Peda amai dua pugau, ‘Fotiwoha kainsami Amamu’?

¹⁰ Bhahaa miina marasaeaꞌa, Idi aseꞌise bhe Amaku bhe Amaku noseꞌise bhe Idi? Wambaku ne hintimiu miina namaiꞌao ne Wutoku, tamaka Amaku seꞌiseno bhe Idi, Anoamo humabuno kahadhaano.

¹¹ Parasaea kanauꞌomu, Idi aseꞌise bhe Amaku, Amaku noseꞌise bhe Idi. Tamaka ane pae marasaeaꞌomu, somo kandaino taparasaeamoomu hampano kahadhaa nehabuku.

¹² Amohatokoomu, kotu-kotuꞌu sasuka marasaeano ne Idi namoolie dua nahumabu kahadhaa nehabuku, bhahaa tadua namoliu kanau kabhalano kahadhaano, kapaꞌamo Idi akumalamo ne Amaku.

¹³ O ae maka dua kamesalomiu weo neaku, amangkafie, neanomo kakalabhiano Amaku natiwohamo ne Anano.

¹⁴ O ae maka dua kamesalomiu ne Idi weo neaku, tetewei amangkafie.”

Yesus nofodhandiꞌao Fotulumino 14:15-31

¹⁵ “Ane moasi kanauꞌomu, tetewei mangkafieꞌomu sabhaha pahintaku.

¹⁶ Aesaloangkoomu ne Amaku, maka namaꞌangkoomu Fotulumino sigaoꞌano somo pobhaiangkoomu suhue dhamani.

¹⁷ Anoamo Rohino Lahataꞌala meowano kabanara. Dhunia pae damooli datumahimaea, hampano miina daohaea, miina dua damandeꞌaanea. Tamaka hintimiu pandeꞌaaneomu, kapaꞌamo Anoa napobhaiangkoomu bhe naeate we lalomiu.

¹⁸ Paise ahumunsakoomu nada anaꞌi moꞌelu, tetewei asumulikikoomu.

¹⁹ Tana sebantaha dhunia paemo damoha kanau, tamaka hintimiu sadaa-daa moha kanauꞌomu hampano Idi adumadi bhe hintimiu dumadiomu dua.

²⁰ Ne oleo anaꞌa mandeꞌaaneomu Idi aseꞌise bhe Amaku, hintimiu seꞌiseomu bhe Idi, Idi aseꞌise bhe hintimiu.

²¹ Sasuka mintahakino pahintaku bhe nodhalangie, anoamo itu moasi kanau. Sasuka moasi kanau naoasiane dua Amaku, o Idi aoasiane dua maka amotiwoha Wutoku ne anoa.”

²² Yudas (tamaka suano Yudas Iskariot) nofeenamo ambano, “Waompu, noafa bhahaa motiwohaꞌao Wutomu ne insaodi, suano ne dhunia?”

²³ Notobhoosimo Yesus ambano, “Ane seemie noasi kanau, namangkafi wambaku. Amaku naoasiane maka Insaodi tamai taeate bhe anoa.

²⁴ Sasuka tapa moasi kanau, paise dua namangkafi wambaku. Gahaꞌaitumo wamba nefetingkemiu itu suano wambaku Wutoku, tamaka wambano Amaku tumudu kanau.

²⁵ Kosasawiꞌae ini afohatoangkoeꞌomu tinangke nandoo apobhai bhe hintimiu.

²⁶ Tamaka mada kaowu nahumato Rohino Lahataꞌala, Fotulumino so netuduno Amaku weo neaku. Anoamo so mohatoangkoomu kosasawiꞌae kafoinaꞌuku, Anoamo dua so meꞌulaiangkoomu sabhaha wambaku ne hintimiu.

²⁷ Ahumunsaangkoomu katohopono dadi; amaꞌangkoomu katohopono dadiku. Ampamo kaowu dhalano afowaꞌao nopoꞌala bhe kofowaꞌaono dhunia. Koemo nosabha bhe nekenda-kenda handamiu.

²⁸ Ingka padamo fetingkeomu afohatokoomu, ‘Idi akumala, tamaka asumulikikoomu.’ Ane kotu-kotuꞌu moasi kanauꞌomu, tetewei naowula lalomiu akumala te Amaku, kapaꞌamo nofoliu kanau Amaku.

²⁹ Aitu afohatoangkoemoomu, tinangke miinaꞌo nakumadhadhia, neanomo nakumadhadhia kaowu marasaeamoomu.

³⁰ Paemo naobhahia apuga-pugau bhe hintimiu, kapaꞌamo Mowano Dhunia ⸤ maꞌanano Kafeompuꞌando seetani⸥ nahumatomo. Tamaka anoa miina sepaliꞌa nakokuasa ne Idi.

³¹ Ampamo kaowu kosasawiꞌae nakumadhadhia neanomo dhunia damandeꞌaane putae Idi aoasiꞌao Amaku bhe adhalangi sabhaha pahintano ne Idi. Ehemoomu, dokalaanaomu.”