Yohanes 13 - Muna Southern Dialect

Yesus nofewaniu aꞌendo anaguhuꞌino 13:1-20

¹ Tana seꞌoleo hohaeaꞌano Paska. Yesus nopandeꞌaanemo nohatomo tempono nahumunsa dhunia ini nasumuli te Amano. Anoa noasiꞌao mie mangkafie te dhunia ini, sadaa-daa noasianda ampa we kapuliaono.

² Yesus bhe anaguhuꞌino nandoo dohumaa. Kafeompuꞌando seetani padamo nokamuntui Yudas anano Simon Iskariot, nowaꞌane patudhu modai weo totono lalono so namowaꞌao Yesus ne limando kaewa.

³ Yesus nopandeꞌaane Amano padamo nowaꞌane bhahi-bhahiꞌae kapooli. Nopandeꞌaane dua Anoa nomaiꞌao ne Lahataꞌala maka nasumuli dua ne Lahataꞌala.

⁴ Dadiꞌanomo Yesus noehemo maka nolembi dhubano. Pada anaꞌa nealamo handu maka nowawee ne aano.

⁵ Pada anaꞌa nesungkamo oe ne katoa, nofewaniu aꞌendo anaguhuꞌino maka nopusuliane handu kawaweꞌano ne aano naꞌa.

⁶ Nohato ne Simon Petrus, nopugaumo ne Yesus ambano, “Waompu, gahaꞌa mewaniu aꞌeku?”

⁷ Notobhoosimo Yesus, “Nehabuku ini miinaꞌo lumosangie aitu, tamaka namada kaowu lumosangiemo.”

⁸ Ambano dua Petrus, “Paise Waompu! Ampa suhue dhamani pae mewaniu aꞌekua.” Ambano Yesus, “Ane paise amewaniu aꞌemu, hintu paise bhe taiꞌamu ne Idi.”

⁹ Ambano dua Simon Petrus, “Waompu, bahangka koise kaowu aꞌeku, tamaka limaku bhe fotuku dua.”

¹⁰ Ambano Yesus, “Ane padamo dekadiu, ingka nonggelamo koseꞌulu-ulundo. Dadiꞌanomo miinamo namaraluua damendua daekadiu, tadamewaniumo kaowu aꞌendo. Hintimiu daanumo monggelamoomu, tamaka miina kosasawimiua.”

¹¹ Yesus nopandeꞌaane laꞌae so mowae ne limano kaewa, kapugauꞌanomo, “Miina kosasawimiu monggelaomu.”

¹² Pada nofewaniu aꞌendo, Yesus nofokanamo toha dhubano maka suli nengkoha. Pada aitu nopugaumo ambano, “Losangieꞌomu bhahaa maꞌanano nehabuku ini?

¹³ Hintimiu kona kanauꞌomu guru bhe Ompu, ingka anoamo naꞌa, kapaꞌamo Idimo ini guru bhe Ompu.

¹⁴ Dadiꞌanomo ane Idi Ompu bhe gurumiu afewaniu aꞌemiu, hintimiu tetewei beano dua pofewa-fewaniuꞌomu aꞌe.

¹⁵ Idi awaꞌangkoomu kasandaha neanomo mehabuomu dua peda nehabuku ne hintimiu.

¹⁶ Amohatokoomu, kotu-kotuꞌu seemie bhatua paise namoliu kafeompuꞌano tawa seemie katudu nalumalo tumudue.

¹⁷ Ane kosasawiꞌae ini pandeꞌaaneomu maka kodawua mpuu ane dhumalangieꞌomu.

¹⁸ Idi apugau miina amulaoꞌao kosasawimiu, kapaꞌamo apandeꞌaanda ndo laꞌae nepiliku. Ampamo kaowu wambano Kitabi aini tetewei nakoꞌula, ‘Mie pombaliꞌaku namewangi kanau.’

¹⁹ Aini afohatoangkoeꞌomu tinangke miinaꞌo nakumadhadhia, neanomo humato nakumadhadhia, marasaeamoomu putae Idimo ini nekonando Idi ndumandoono.

²⁰ Amohatokoomu, kotu-kotuꞌu sasuka tumahimano mie netuduku notahimamo dua Idi, sasuka tumahimano Idi notahimamo Tumudu kanau.”

Yesus bhe Yudas 13:21-30

²¹ Pada nopugau peda naꞌa Yesus nokompeahamo lalono maka nofohatoda mentalea-mentalea ambano, “Amohatokoomu, kotu-kotuꞌu seemie ne olotamiu itu namowa kanau ne limano kaewa.”

²² Anaguhuꞌino tadopodoli-dolikimo, kapaꞌamo miina dakototolaloane bhahaꞌi laꞌae nepulaoꞌaono.

²³ Anaguhu kamoasiꞌaono Yesus, anoa ini nengkoha ne sohihino Yesus.

²⁴ Simon Petrus nokampihumo sabhangkano naꞌa notudue nameena, bhahaꞌi laꞌae nepulaoꞌaono.

²⁵ Anaguhu mengkohano ne sohihino Yesus naꞌa nodhulupiemo maka nofeena ambano, “Waompu, laꞌae bhahaa?”

²⁶ Ambano Yesus, “Mie newaꞌaoku roti so netandaku weo mangko, aituꞌaemo mieno.” Pada nopugau peda naꞌa Yesus nealamo roti, notandae weo mangko maka nowaꞌane Yudas anano Simon Iskariot.

²⁷ Sanoꞌawa roti anaꞌa Yudas nopesuakiemo Kafeompuꞌando seetani. Ambano Yesus ne Yudas, “Habumo fekahimba so nehabumu itu.”

²⁸ Tamaka ne olotando mengkoha-ngkohano momaano maitu bhe naseemie miina bhe lumosangie maꞌanano pugauno Yesus maitu ne Yudas.

²⁹ Hampano Yudas mintahanomo kaenteiꞌano dhoindo, nandoo kofekihino putae Yesus notudue nakoniꞌoli so kafaraluundo haroando naꞌa, tawa nakoniwaꞌao ne mie mokae.

³⁰ Pada notahima roti anaꞌa Yudas lasao nolimba. Oleo nohondomo.

Pahinta buꞌou 13:31-35

³¹ Nokala kaowu Yudas, Yesus nopugaumo ambano, “Aitu kakalabhiano Anano Manusia natiwohamo bhe kakalabhiano Lahataꞌala natiwoha dua ne Anoa ini.

³² Ane kakalabhiano Lahataꞌala natiwoha ne Anano Manusia, maka Lahataꞌala namotiwoha dua kakalabhiano Anano ne Wutono, maka kakalabhia aini napikitiwohamo.

³³ Anaguhuꞌiku, ingka paemo naomponaa aeate bhe hintimiu. Hintimiu umondofi kanauꞌomu. Tamaka pedamo pugauku ne miendo Yahudi, aitu apugauanemo dua ne hintimiu: paise mooliomua maiꞌomu we kakalaꞌaku.

³⁴ Awaꞌangkoomu pahinta buꞌou: pomoa-moasiꞌaoꞌomu. Tapedamo Idi aoasiangkoomu, nadamo dua anaꞌa hintimiu pomoa-moasiꞌaoꞌomu.

³⁵ Ane pomoa-moasiꞌaoꞌomu, kosasawindo mie damandeꞌaane putae hintimiu anaguhuku.”

Yesus nofodhaga Petrus 13:36-38

³⁶ Nopugaumo Simon Petrus ne Yesus ambano, “Waompu, kumala ne amai gahaꞌa?” Ambano Yesus, “We kahopeꞌaku paise naembalia mangkafi kanau aitu, tamaka mada kaowu mangkafi kanau.”

³⁷ Ambano Simon Petrus, “Waompu, noafa so tapa kaembaliꞌano amangkafiko aitu? Idi aꞌunda amateangko.”

³⁸ Notobhoosimo Yesus, “Hintu momate kanau? Kotu-kotuꞌu amohatoko, paeꞌo nakumakuhua manu, natolu pakumo gumaga miina mandeꞌa kanau.”