Yohanes 12 - Muna Southern Dialect

Yesus nominakie seemie hobhine te Betania 12:1-8

¹ Tanomo oleo hohaeaꞌano Paska, Yesus nokalamo te liwuno Betania, kaeateꞌano Lasarus nefowanuno maiꞌao ne mate.

² Ne itu Yesus dopoharoaꞌane, Marta netaganaanda. Ne olotando mie momaano pombali-mbalino bhe Yesus maitu bhe Lasarus dua.

³ Gahaꞌa Maria nealamo sebutolo mina warasituu napesetanga litere. Mina-mina kawondu aini noꞌali sepaliꞌa. Pada anaꞌa nosungkae ne aꞌeno Yesus maka nopusuliane wuluno fotuno, sampe wonono tanokasembo-sembomo koseꞌonuꞌae lambu.

⁴ Tamaka Yudas Iskariot, seemie anaguhuno Yesus somo mowae ne limando kaewa, nopugaumo ambano,

⁵ “Noafa mina-mina kawondu aini miina damasoane tolu moꞌono woka pera maka dhoino dadumawuandae mie mokae?”

⁶ Kapugauꞌano peda naꞌa suano mbaꞌinomo noniniꞌao mie mokae, tamaka mbaꞌinomo anoa maitu seemie kasoꞌo, nentelamo nohumaa dhoi weo kaenteiꞌa dhoi neintahano.

⁷ Nopugaumo Yesus ambano, “Heruane ae, hobhine aini nohabu peda ini somo katokano nahumato oleo katikobuhuꞌaku.

⁸ Mie mokae sadhia dapobhai bhe hintimiu, tamaka Idi paise aeate kansuhu bhe hintimiua.”

Dopokanagau damongko Lasarus 12:9-11

⁹ Dobhahi miendo Yahudi metingkeno putae Yesus nohatomo te Betania, sampe dokala dua te naꞌa. Kakalaꞌando suano kaowu dapoꞌawaꞌao Yesus, tamaka so damohaꞌao dua Lasarus nefowanuno Yesus maiꞌao ne mate.

¹⁰ Dadiꞌanomo neangkaꞌindo imamu dosikoo-koomo damongko dua Lasarus,

¹¹ kapaꞌamo dobhahi miendo Yahudi dohunsadamo maka doparasaea ne Yesus, hampano Lasarus maitu.

Yesus doia-iaꞌe we Yerusalem 12:12-19

¹² Hato nomentae mie bhahi maino we hohaeaꞌano Paska dofetingke putae Yesus we laanomo sala nohope we Yerusalem.

¹³ Andoa lasao dealaꞌi hoono potubu maka dokala dosumpuiꞌe bhe dekei-kei ambado, “Hosana, pudhi kaitaomu Lahataꞌala. Notibarakati maino weo neano Ompu, notibarakati Omputo miendo Israel.”

¹⁴ Yesus neꞌawamo seꞌulu anano keledai lasao nosawi, nopobutu bhe tibuhino weo Kitabi,

¹⁵ “Koe moteꞌiomu, miendo Yerusalem, ondoomu omputomiu nohatomo, nosawi ne anano keledai.”

¹⁶ Wakutuu anaꞌa anaguhuꞌino miina dalumosangiea, tamaka nopalusi notiwoha kakalabhiano Yesus ⸤ ne mateno⸥ , kaneꞌomo dofeꞌulaiꞌe putae tibuhino naꞌa nopulaoꞌao Anoa, ingka padamo dua dodhalangie.

¹⁷ Mie bhahi mangkafie wakutuuno noloꞌoi Lasarus nomaiꞌao weo kobuhu maka nofodadie, dosakusiiꞌaomo kadhadhia naꞌa.

¹⁸ Dadiꞌanomo mie bhahi ne itu dokalamo dosumpuiꞌe, hampano dofetingke Anoamo humabuno tanda timenteꞌaono naꞌa.

¹⁹ Dopugaumo miendo Farisi sapada-pada andoa ambado, “Ingka wohaꞌao wuntano matamiu, suanomo nepoolintoomua. Kosedhuniaꞌae doangkafimo Anoa.”

Yesus nofohatoanda so kamateꞌano 12:20-36

²⁰ Ne olotando mie kumalano sumambaheano ne hohaeaꞌa we Yerusalem, nandoo dua miendo Yunani.

²¹ Mie andoa naꞌa dokalamo ne Filipus. Filipus ini nomaiꞌao ne liwuno Betsaida we kadieno Galilea. Dopugaumo ambado, “Waompu, gao mani tapoꞌawa bhe Yesus.”

²² Filipus nofohatomo Andreas maka dopoowa dofohato Yesus.

²³ Tamaka Yesus tanotobhoosidamo ambano, “Nohatomo tempono Anano Manusia damekakalabhiaꞌe.

²⁴ Amohatokoomu, kotu-kotuꞌu ane onuno gandum pae naondawu ne wite maka namate, daa-daaꞌe seꞌonu. Tamaka ane namate, kaneꞌomo natumumbu maka naobhahi bhakeno.

²⁵ Sasuka moasiꞌaono inawano, namiinae inawano. Tamaka sasuka bansino inawano we dhunia ini, namekataaꞌe so dadi suhue dhamani.

²⁶ Laꞌae so umondofa kanau, tetewei namangkafi kanau. Ne amai kahatoꞌaku, ne ituꞌaemo dua so kahatoꞌano anoa. Laꞌae so umondofa kanau namosibhalae Amaku.

²⁷ Aitu nosabha handaku. Miina amandeꞌaanea apugauꞌao ae bhahaa. Ane apugau, ‘Ama, folapa kanau ne tempono kakadee-dee aini’, tamaka ingka kamaiꞌaku anumamisi kakadee-dee aini.

²⁸ Ama, fekakalabhia neamu.” Maka notifetingkemo suaha maiꞌao te lani, “Padamo afekakalabhiaꞌe, maka amekakalabhiaꞌe toha.”

²⁹ Mie meehe-eheno ne itu dofetingkee dua suaha aitu, tamaka dokonae guntu. Nandoo dua mugauno, “Seemie malaꞌekati nopugau bhe Anoa.”

³⁰ Ambano Yesus, “Suaha anaꞌa notifetingke suano so Idi, tamaka so hintimiu.

³¹ Aitu nohatomo tempono o dhunia dabhitahakiemo, aitu dua Mowano Dhunia ⸤ maꞌanano Kafeompuꞌando seetani⸥ dakumabhambie we simbali.

³² O Idi ini mada kaowu dasumangke kanau te melangkeꞌano te wawono dhunia ini, maka kosasawindo mie ahumelada damai se Idi.”

³³ Kapugauꞌano peda naꞌa nofohatoanda nada amai so kamateꞌano.

³⁴ Dotobhoosimo mie bhahi ambado, “Padamo tafetingke maiꞌao ne Kitabi, ingka Mesias Omputo Fosalamatino nadumadi ampa suhue dhamani. Noafaꞌao dua pugau Anano Manusia dasumangkee te melangkeꞌano? Laꞌae bhahaa Anano Manusia maitu?”

³⁵ Ambano Yesus, “Tana seendai tempono tilanga nandumandoo ne olotamiu. Tinangke nandoo bhe tilanga maitu mekala-kalamoomu, keana nohatofikoomu kahohondo. Sasuka mekala-kalano weo kahohondo miina namandeꞌaanea so kahopeꞌano.

³⁶ Parasaeamoomu ne Tilanga maitu, tinangke nandooꞌe bhe hintimiu, neanomo membaliomu miendo tilanga ⸤ maꞌanano mie mangkafino kapoindalono Lahataꞌala⸥ .” Pada nopugau peda naꞌa Yesus nokalamo, nokiidomo namotiwoha Wutono ne andoa.

Noafa tapa kaparasaeaꞌando miendo Yahudi 12:37-43

³⁷ Mahinggamo Yesus nobhahimo sepaliꞌa nofotiwohaanda tanda timenteꞌaono, tamaka miina dua damarasaea ne Anoa.

³⁸ Kakadhadhiaꞌano peda aini nokoꞌulaꞌao wambano anabii Yesaya, “Ompu, nandoo bhahaa marasaeano bhihita neowa mani? Laꞌae bhahaa mohano kuasano Ompu? ⸤ Ingka bhe naseemie miina.⸥ ”

³⁹ Pedamo anaꞌa tapa kaembaliꞌando doparasaea, kapaꞌamo Yesaya padamo nopugau dua peda aini,

⁴⁰ ⸤ Ambano Lahataꞌala,⸥ “Padamo afekabuntoda bhe asongko totono lalondo, keana dofowohaꞌao matando bhe dolosangiꞌao totono lalondo. Dadiꞌanomo paise dadumoli se Idi maka amekaꞌosada.”

⁴¹ Yesaya nopugau peda ini mbaꞌinomo nowohae kakalabhiano Yesus bhe padamo dua nokowambaane.

⁴² Mahinggamo peda anaꞌa, dobhahi dua neangkando miendo Yahudi marasaeano ne Yesus. Tamaka miina daokadoa doꞌakui kaparasaeando kapaꞌamo doteꞌi miendo Farisi, bhahaꞌi tadoꞌeleꞌaanda damesua weo lambu kasambaheaꞌa.

⁴³ Andoa doasiane kafosibhala ne manusia bhe ne Lahataꞌalaa.

Bhoasaono Yesus fohukumuno 12:44-50

⁴⁴ Yesus nofekabhala toha suahano ambano, “Sasuka marasaeano ne Idi miina kaowu namarasaea ne Idi, tamaka noparasaea ne Tumudu kanau.

⁴⁵ Ane dowoha Idi, dowohamo dua Tumudu kanau.

⁴⁶ Kahatoꞌaku ne dhunia ini aembali tilanga, neanomo sasuka marasaeano ne Idi paise naeate weo kahohondo.

⁴⁷ Ane dofetingke kafoinaꞌuku, tamaka miina damangkafie paise ahumukumue Idi, kapaꞌamo kahatoꞌaku paise ahumukumu dhunia ini, tamaka amosalamatie.

⁴⁸ Sasuka mokiido kanau bhe miina natumahima kafoinaꞌuku, nandoomo so humukumue. Wambakumo toka nepugauꞌao naꞌa, somo humukumue ne Oleono Kiama.

⁴⁹ Kapaꞌamo wambaku ini miina namaiꞌao ne Wutokua, tamaka nomaiꞌao ne Amaku. Amaku tumudu kanau, Anoamo mahintangi kanau bhe nofohato kanau o ae so nepugauꞌaoku bhe so nefosampeku.

⁵⁰ Apandeꞌaane pahintano neowa dadi suhue dhamani. Dadiꞌanomo wamba nepugauꞌaoku, ingka o bhoasaonomo dua Amaku ne Idi.”