Yohanes 11 - Muna Southern Dialect

Yesus nofowanu Lasarus nomaiꞌao ne mate 11:1-44

¹ Nandoo seemie mosakino neano Lasarus. Anoa neate we liwuno Betania, liwundomo dua Maria bhe Marta aino.

² Mariamo ini hobhine meꞌobhano mina-mina kawondu ne aꞌeno Yesus maka nopusuliane wuluno fotuno. Lasarus mosakino naꞌa finimoꞌanendo.

³ Hobhine andoa naꞌa depakatumo bhihita ne Yesus ambado, “Ompu, mie nemoasiꞌaomu nosaki.”

⁴ Nofetingke bhihita anaꞌa Yesus tanopugau ambano, “Saki anaꞌa paise naeowa mate, tamaka namotiwoha kakalabhiano Lahataꞌala, natiwohaꞌao dua kakalabhiano Anano Lahataꞌala.”

⁵ Yesus noasiꞌao Marta bhe aino hobhine bhe Lasarus.

⁶ Tamaka pada nofetingke putae Lasarus nosaki, Yesus nandoo dua neate ne itu tahaa oleo.

⁷ Palusi anaꞌa nopugaumo ne anaguhuꞌino ambano, “Maimoomu dosuliomu we Yudea.”

⁸ Ambado anaguhuꞌino, “Guru, ingka haꞌo-haꞌoleo ini miendo Yahudi dabhatuhiangko kontu. Nandoo dua sumuli we watu?”

⁹ Ambano Yesus, “Ingka seꞌoleo ompulu haa dhamu. Sasuka mekala-kalano ole-oleo paise natitunoa, hampano nandoo nowoha kantaleano dhunia ini.

¹⁰ Tamaka sasuka mekala-kalano kohondoꞌa natituno, hampano miina nakokantaleaꞌa ne wutonoa.”

¹¹ Pedamo anaꞌa wambano Yesus. Pada aitu nopugaumo dua ambano, “Lasarus sabhangkantoomu noodomo, tamaka akumala amowanue.”

¹² Maka ambado anaguhuꞌino, “Ompu, ane naodo, kaowua naoꞌosamo.”

¹³ Gahaꞌa noodo naꞌa weo patudhuno Yesus nomatemo, kunaꞌendomo kaodo melaa.

¹⁴ Dadiꞌanomo Yesus nopugau mentalea-mentalea, “Lasarus nomatemo.

¹⁵ Tamaka aoꞌia miina bhe Idia ne naꞌa, kapaꞌamo netaamo peda naꞌa so hintimiu, neanomo poguhuomu marasaeaꞌomu. Maimoomu dokalaanaomu we anoa.”

¹⁶ Tomas nekonando dua Didimus (maꞌanano o kalopo) nopugaumo ne sabhangkaꞌino anaguhu sigaoꞌano ambano, “Maimoomu, dokalaanaomu bhe intaodiomu, mahingga dasimate-mateꞌaomu bhe Anoa.”

¹⁷ Gahaꞌa nohato we naꞌa, Yesus dofohatoemo putae Lasarus fato oleomo dokobuhue.

¹⁸ Liwuno Betania naꞌa nokomaꞌo bhe Yerusalem, napetolu kilo kakodoꞌonoa.

¹⁹ Ne itu dobhahi miendo Yahudi toka humatono dolawesi Marta bhe Maria aino, hampano isando mateno maitu.

²⁰ Nofetingke kaowu Yesus nohatomo, Marta lasao nokala nosumpuiꞌe, tamaka Maria neate we lambu.

²¹ Ambano Marta ne Yesus, “Waompu, ane bhe Hintu ne ini, finimoꞌaneku tetewei paise namatea.

²² Tamaka aitu apandeꞌaane dua, Lahataꞌala tetewei namaꞌangko sabhaha kamesalomu ne Anoa.”

²³ Ambano Yesus ne Marta, “Finimoꞌanemu itu namanu namaiꞌao ne mate.”

²⁴ Ambano Marta, “Ingka apandeꞌaane namanu namaiꞌao ne mate nahumato kawanuꞌando mie mate ne Oleono Kiama.”

²⁵ Ambano Yesus, “Idimo ini fofowanuno maiꞌao ne mate bhe meowano dadi. Sasuka marasaeano ne Idi nadumadi mahinggamo nomatemo.

²⁶ Sasuka mie dumadi marasaeano ne Idi paise namatea suhue dhamani. Parasaea kaa miina?”

²⁷ Ambano Marta, “Uumbe Waompu, aparasaea Hintumo Mesias Omputo Fosalamatino, Anano Lahataꞌala so humatono ne dhunia ini.”

²⁸ Pada nopugau peda naꞌa Marta nokalamo nosaliꞌi Maria aino bhe nokamuntuiꞌe ambano, “Guru nohatomo, nobhasiko.”

²⁹ Nofetingke peda naꞌa Maria lasao noehe nokalamo nopoꞌawaane.

³⁰ Tamaka wakutuu aitu Yesus miinaꞌo namesua weo liwu, nandooꞌe we katisumpuiꞌano ne Marta saꞌituini.

³¹ Miendo Yahudi maino lumawesino Maria we lambu dowohae noehe lasao nokala, dadiꞌanomo doangkafiemo dua, kunaꞌendomo nakumala naoꞌae we kobuhu.

³² Sanohato we kafetumpuꞌano Yesus bhe nowohaemo, Maria lasao nolongko ne aꞌeno bhe nopugau ambano, “Waompu, ane bhe Hintu ne ini finimoꞌaneku tetewei paise namatea.”

³³ Nowoha Maria noꞌae bhe miendo Yahudi mangkafie doꞌae dua, Yesus nosabha handano bhe nokompeaha lalono. Nopugaumo ambano,

³⁴ “Ne amai kobuhueꞌomu?” Ambado, “Waompu, mai wohaꞌao Wutomu.”

³⁵ Yesus tanopotuhumo luuno.

³⁶ Ambado miendo Yahudi, “Wohaomu itu, kaꞌosano kaasino ne Lasarus.”

³⁷ Seemie hodua ne olotando dopugaumo ambado, “Ingka nefekantalea matando kabunto. Pae namoolie bhahaa naeꞌondofiane dhala keana nomate?”

³⁸ Yesus nofenduamo nokompeaha lalono maka nohatomo se kobuhu. Kobuhu anaꞌa o lia dosongkoane kontu bhalano.

³⁹ Ambano Yesus, “Fogampieꞌomu kontu aitu!” Marta aino mateno maitu nopugau ambano, “Waompu, nokowonomo, ingka fato oleomo nomate.”

⁴⁰ Ambano Yesus, “Ingka padamo afohatoko, ane marasaea omoha kakalabhiano Lahataꞌala.”

⁴¹ Dadiꞌanomo dofogampimo kontu anaꞌa. Pada aitu Yesus nototohanamo bhe nopugau ambano, “Ama, notumpu laloku ne Hintu hampano fetingke kanau.

⁴² Apandeꞌaane sadhia fetingke kanau, tamaka kapugauꞌaku ini so mie lumibu-libu kanau ini neanomo damarasaea Hintumo tumudu kanau.”

⁴³ Pada nopugau peda naꞌa Yesus noloꞌoimo nofekabhala-bhala suahano, “Lasarus, limbaꞌo toha!”

⁴⁴ Mie mate naꞌa lasao nolimba, aꞌeno bhe limano nandoo nokakompoe kawalu, ulano dogantuane kabhia-bhia. Yesus nopugauandamo ambano “Lenseeꞌomu nekala-kalaꞌao.”

Dopokanagau damongko Yesus 11:45-57

⁴⁵ Dobhahi miendo Yahudi maino lumawesino Maria doparasaeamo ne Yesus, hampano dowohaꞌao wuntano matando nehabuno maitu.

⁴⁶ Tamaka nandoo dua kumalano ne miendo Farisi maka detula-tulaꞌao nehabuno Yesus maitu.

⁴⁷ Dadiꞌanomo neangkaꞌindo imamu bhe miendo Farisi dofohompumo Sahano Agama bhe dopugau ambado, “Daeafaꞌimoomu bhahaa? Ingka mie amaitu nobhahi sepaliꞌa nehabu tanda timenteꞌaono.

⁴⁸ Ane tadakumatahomo kosasawindo mie damarasaea ne Anoa, mada kaowu damai tantarando Roma damobinasa Lambuno Lahataꞌala ini bhe kosasawindo raꞌeati.”

⁴⁹ Ne olotando maitu nandoo seemie neano Kayafas, o Imamu Bhalano ne taꞌu aitu. Nopugaumo ambano, “Hintimiu ini miina konipandeꞌaoꞌomua.

⁵⁰ Miina dua lumosangieꞌomua gahaꞌa, ingka nokofahalaa namate seemie so raꞌeati, bhe dabinasa koseꞌonu liwuntoomua.”

⁵¹ Kapugauꞌano peda maitu miina namaiꞌao ne wutonoa, tamaka hampano nembali Imamu Bhalano ne taꞌu aitu, nokosuaha peda anabii putae Yesus namate so raꞌeati maitu.

⁵² Gahaꞌaitumo suano kaowu so raꞌeatino Yahudi, tamaka nomateꞌao dua kosasawindo anano Lahataꞌala tikambisano, neanomo sumuli namoꞌonuda bhe namoseꞌiseda.

⁵³ Notanda oleo aitu andoa dosikoo-koomo damongko Yesus.

⁵⁴ Dadiꞌanomo Yesus miinamo naefemata-mataa naekala-kala ne olotando miendo Yahudi. Anoa nokalamo we owano pandaso bhalano ne seꞌonu liwu nekonando Efraim maka neate ne itu bhe anaguhuꞌino.

⁵⁵ Wakutuu anaꞌa nomaꞌomo Paska, hohaeaꞌando miendo Yahudi. Dadiꞌanomo dobhahi mie maiꞌaono ne sabhaha liwu dokala we Yerusalem damekangkilo wutondo ne wiseno Ompu, tinangke miinaꞌo nahumato oleono Paska.

⁵⁶ Andoa doꞌondofimo Yesus, poowa deehe-ehemo weo Lambuno Lahataꞌala dopofee-feenamo, “Peda ae fekihimiu, namai dua bhahaa Yesus ne hohaeaꞌa ini?”

⁵⁷ Kapugauꞌando peda anaꞌa kapaꞌamo neangkaꞌindo imamu bhe miendo Farisi padamo defolimba pahinta, putae laꞌae so mohano Yesus tetewei damohatoda, mudaꞌao dahumakoe.