Yohanes 10 - Muna Southern Dialect

Kapalendano dhagano dhumba metaano lalo 10:1-21

¹ Nopugaumo Yesus ambano, “Amohatokoomu, kotu-kotuꞌu sasuka mesuano weo katondono dhumba miina namangka ne fointo, tamaka nekamponea pagala, mie aitu kasoꞌo bhe karampasi.

² Tamaka mie mesuano noangka ne fointo anoamo itu dhagano dhumba.

³ Tungguno katondo nelengkaane fointo pakade dhumbano dotandaiꞌe suahano. Dhagano dhumba noloꞌoi neando seꞌulu-seꞌulu maka noatoda we simbali.

⁴ Dopuli kaowu nofolimbada, dhaga anaꞌa nopaꞌinduluandamo, maka dhumbano doangkafie hampano dopandeꞌaanemo suahano.

⁵ Tamaka ane nandoo seemie mengkahatono tetewei pae damangkafie, tadamilei hampano suahano miina damandeꞌaanea.”

⁶ Pedamo anaꞌa kapalendano Yesus ne andoa, tamaka miina dalumosangiea o ae maꞌanano pugauno maitu.

⁷ Yesus nopugaumo toha ambano, “Amohatokoomu, kotu-kotuꞌu Idimo ini fointo kaangkaꞌando dhumba anaꞌa.

⁸ Kosasawindo maino maꞌinduluki kanau, sanea kasoꞌo bhe karampasi, dadiꞌanomo o dhumba dokiido dametingkeda.

⁹ Idimo ini fointo, sasuka dhumba mesuano noangka ne Idi nasumalamati, tanamesua tanalumimba naepoꞌawaꞌao oti nehumaano.

¹⁰ Kasoꞌo nomai kaowu nosibu, nofopongko bhe nofofekabinasa, tamaka o Idi amai so daeꞌawaꞌao dadi, bhe dadumadi napontalabhi-labhi.

¹¹ Idimo ini dhagano dhumba metaano lalo. Dhaga metaano lalo nopotahoꞌao inawano so dhumbano.

¹² Nopoꞌala bhe mie mealano ponambo, anoa maitu suano dhagano dhumba, suano dua kodhumbano. Mie medano aini, sanowoha daꞌu ngkahoku nomai, tanohunsada dhumba maitu maka nofilei. Dhumba andoa naꞌa nohontopidamo daꞌu ngkahoku bhe nopogasa-gasaanda.

¹³ Kafileiꞌano mie amaitu neala kaowu ponambo, dadiꞌanomo miina napokihaꞌianda dhumba andoa maitu.

¹⁴ Idimo ini dhagano dhumba metaano lalo. Dhumbaku apandeꞌaanda, andoa dopandeꞌa kanau dua.

¹⁵ Tapedamo Amaku nopandeꞌa kanau, Idi apandeꞌaane dua. Idi ini apotahoꞌao inawaku so dhumbaku.

¹⁶ Nandoo dua dhumbaku sigaoꞌano tapa maiꞌaono ne katondo aini. Andoa maitu tetewei dua amatoda maka datumandaiꞌe dua suahaku, dadiꞌanomo daembalimo naseguluma, dhagando naseemie.

¹⁷ Amaku noasi kanau, mbaꞌinomo afowaꞌao inawaku, neanomo sumuli aꞌumawae.

¹⁸ Bhe naseemie miina bhe so malano inawaku, tamaka afowaꞌane hampano kahelasino Wutoku. Idi akokuasa afowaꞌane, akokuasa dua sumuli atumahimae. Ainimo taka netahimaku ne Amaku.”

¹⁹ Hampano pugauno Yesus maitu miendo Yahudi dewalamo, tadopotaga-tagalimo.

²⁰ Dobhahi mugauno ambado, “Anoa nobheemo, nopesuakiemo seetani. So dua ae metingkeꞌaoꞌomu pugauno?”

²¹ Tamaka nandoo dua mugauno, “Pedando maitu suano pugauno mie nepesuakino seetani, bhahaa naembali dua seetani naefekantalea matano mie kabunto?”

Yesus dobansie miendo Yahudi 10:22-39

²² Miina naompona nohatomo hohaeaꞌa Kafeꞌulaino Katipesuakiꞌano Toha Lambuno Lahataꞌala we Yerusalem. Wakutuu anaꞌa wulano use.

²³ Yesus nekala-kala weo kadeteno Lambuno Lahataꞌala, we tambi bhalano nekonando Tambino Salomo.

²⁴ Miendo Yahudi dolibue bhe dopugau ambado, “Tana seꞌae kaomponanoa kumataho kainsami tapoibhaha peda ini? Ane hintumo ini Mesias Omputo Fosalamatino fohato kainsami mentalea-mentalea.”

²⁵ Notobhoosidamo ambano, “Ingka padamo afohatokoomu, tamaka miina marasaeaꞌomu. Sabhaha kahadhaa nehabuku weo neano Amaku, aituꞌaemo ingka sanea sakusiiku.

²⁶ Tamaka hintimiu miina marasaeaꞌomu, hampano miina mesuaꞌomu gulumano dhumbaku.

²⁷ Dhumbaku dotandaiꞌe suahaku, Idi apandeꞌaanda, andoa doangkafi kanau.

²⁸ Andoa awaꞌanda dadi suhue dhamani, tetewei pae dabinasaa suhue dhamani bhe naseemie pae bhe so magoida maiꞌao ne limaku.

²⁹ Kapaꞌamo Amaku maꞌa kanau andoa maitu, nofofoliu kabhalano kuasano. Dadiꞌanomo bhe naseemie pae bhe so mondoino so magoida ne limano Amaku.

³⁰ Idi bhe Amaku taseꞌise.”

³¹ Miendo Yahudi desangkemo toha kontu dabhatuhi Yesus.

³² Tamaka ambano Yesus, “Nobhahi habu metaa nefotakano Amaku padamo afotiwohaangkoeꞌomu. Habu medando ae bhahaa so katibhatuhiꞌaku?”

³³ Dotobhoosimo miendo Yahudi ambado, “Suano mbaꞌinomo habu metaa nehabumu so katibhatuhiꞌamu, tamaka mbaꞌinomo fekaꞌaebu Lahataꞌala. Mahinggamo hintu itu seemie manusia melaa, pototoꞌao wutomu bhe Lahataꞌala.”

³⁴ Ambano Yesus, “Ingka notibuhi weo Kitabino Musa nefintahakimiu, ‘⸤ Nokobhoasaomo Lahataꞌala ne miendo Yahudi⸥ , ‘Hintimiu itu kalaha-lahataꞌala.’ ’

³⁵ Ingka dopandeꞌaanemo wambano Kitabi nolaku ampa suhue dhamani. Dadiꞌanomo, ane andoa tumahimano bhoasaono naꞌa nokonada kalaha-lahataꞌala,

³⁶ noafaꞌao dua ambamiu afekaꞌaebu Lahataꞌala mbaꞌinomo akona wutoku Anano Lahataꞌala? Gahaꞌaitumo Idimo nefopoolino Amaku bhe netuduno we dhunia ini.

³⁷ Ane pae ahumabu kahadhaano Amaku, koemo parasaeaꞌomua.

³⁸ Tamaka ane ahumabue, gahaꞌa nandoo mongaheomu marasaeaꞌomu ne Idi, taparasaeamoomu ne kahadhaaku itu. Ane nada anaꞌa mandeꞌaaneomu bhe lumosangieꞌomu ingka Amaku noseꞌise bhe Idi, o Idi aseꞌise bhe Amaku.”

³⁹ Andoa fendua toha dahumakoe, tamaka Yesus nolapa.

Yesus we sewetano umeleno Yordan 10:40-42

⁴⁰ Palusi anaꞌa Yesus nosulimo we sewetano umeleno Yordan, ne kafokadiuꞌano Yohanes endefiꞌini maka neate ne itu.

⁴¹ Dobhahi mie maiꞌie bhe dopugau ambado, “Daanumo Yohanes miina sepaliꞌa naehabu tanda timenteꞌaono, tamaka kosasawiꞌae nepulaoꞌaono ne mie aini nokotuꞌu.”

⁴² Sampe dobhahi mie ne itu marasaeano ne Yesus.