Yakobus 5 - Muna Southern Dialect

Katangahi so mie hangkaea 5:1-6

¹ Fetingke kanauꞌomu hintimiu hangkaea! Moꞌae bhe mekangkoꞌaeꞌomu kapaꞌamo o kakadee-dee so netompaloimiu.

² Kahangkaeamiu naotembumo, pakeamiu naomaaꞌemo faa.

³ Bulawa bhe salakamiu nakohasemo. Haseno somo sakusii mobhieangko bhe so momaano mbadhamu nada efi. Kapaꞌamo hintimiu mesoloomu kahangkaea ne pandano dhamani ini.

⁴ Fetingkeomu itu fedeendo mie kumahadhaano te kaampomiu; kafedeeꞌando ingka miina maꞌandaomu ponambodo. Katondalando mie mehompuangkoomu pehapi naꞌa nofetingkeemo dua Ompu Kokuasano ne alamu bhalano ini.

⁵ Weo kahangkaeamiu dadi pontalabhi-labhiomu, sabhaha kataano namisi awaemoomu, kao-kaomo fekahombumo wutomiu so oleo katisumbeleꞌamiu.

⁶ Padamo hukumuomu mie tapa kokaꞌala bhahamoa pongkodaomu, maka miina damewangikoomua.

Dakosabaha weo kakadee-dee 5:7-11

⁷ Dadiꞌanomo bhahitieꞌiku, kosabahaomu ampa oleo kahatoꞌano Ompu. Mesandahaomu ne mie mekaampono, kabhalano sabahando doantagi pehapi koharagaa maiꞌaono ne wite. Dosabaha kansuhu doantagi useno bhaha bhe useno timbu.

⁸ Hintimiu tabeano kosabahaomu dua bhe mekatangkaomu lalomiu, kapaꞌamo oleo kahatoꞌano Ompu nomaꞌomo.

⁹ Bhahitieꞌiku, koise kamuntu-muntuomu bhe pofeꞌa-feꞌalaomu keana meꞌawaomu kahukumu. Tandaiꞌeomu, Fobhitahakino neehe-ehemo ne wobhano fointo.

¹⁰ Bhahitieꞌiku, angkafiomu sandahano ana-anabii madano kosuahano weo neano Ompu. Andoa dokosabaha mpuu weo kakadee-deendo.

¹¹ Andoa maitu ingka doabhidaomu dokodawua, kapaꞌamo dokampuu-mpuu dopotaami. Ingka fetingkeemoomu potaamino anabii Ayub. Pandeꞌaaneomu dua panda-pandano neꞌawa ae maiꞌao ne Ompu. Kanandooꞌano peda aini hampano Ompu nofoliu kamoasiꞌaono bhe kabhelano lalono ne manusia.

O femata, bhe sambahea so mie mosaki 5:12-20

¹² Bhahitieꞌiku, fofoliuꞌano kafaraluu, koise podhandi sampe femataomu mesambiliomu lani tawa o wite tawa mesambiliomu o ae maka dua. Dadiꞌanomo ane patudhumu uumbe, tafokoꞌuumbemo; ane patudhumu paise, tafokopaisemo, keana meꞌawaomu kahukumu.

¹³ Ane we olotamiu nandoo bhe mosabhano naetaa nasumambahea. Ane nandoo bhe moꞌiano, naetaa naelagu namudhi Lahataꞌala.

¹⁴ Ane ne olotamiu bhe mosakino, naetaa naebhasi kamungkulaꞌi neangkando umati dasumambaheaꞌane bhe dabheluane mina weo neano Ompu.

¹⁵ Sambahea maiꞌaono ne kaparasaea motangka namekaꞌosa mie mosaki aitu, maka Ompu namowanue. Ane bhe dhosano, natiꞌamponimo dua.

¹⁶ Dadiꞌanomo lengkaomu totono lalomiu mangakuꞌao kaꞌalamiu seemieno bhe seemieno bhe posamba-sambaheaꞌaoꞌomu so totomataꞌaoꞌomu. Kapaꞌamo sambaheando mie banara nobhala mpuu kuasano.

¹⁷ Anabii Elia ingka o manusia melaa dua, tanopototomo bhe intaodiomu. Hampano kakampuu-mpuuno nosambahea so pae nakoꞌuseꞌao, gahaꞌa daanumo miina sepaliꞌa nakoꞌuse ampa tolu taꞌu nomo wula.

¹⁸ Pada anaꞌa nosambaheamo dua maka o lani nofosampu useno bhe wite nokohasilimo toha.

¹⁹ Bhahitieꞌiku, ane nandoo ne olotamiu itu mekapingkano maiꞌao ne kaangkaꞌano kabanara, gahaꞌa nandoo seemie nopoolie nofosulie ne metaaꞌano, ingka nokesa sepaliꞌa.

²⁰ Tandaiꞌeomu wamba aini: mie moolino mosulino mie kodhosa ne metaaꞌano, mie aitu namosalamatimo alusuno mie kodhosa naꞌa maiꞌao ne mate, bhe nabhahi dhosa tiꞌamponiꞌano.