Yakobus 4 - Muna Southern Dialect

Posabhangkaꞌa bhe dhunia 4:1-10

¹ Nomaiꞌao ne amai bhahaa powengke-wengkeꞌa bhe potaga-tagaliꞌamiu itu? Ingka nomaiꞌao ne kapoindalono mbadha pogihaꞌano kansuhu weo totono lalomiu.

² Bhe nepoindalomiu tamaka miina umawaeꞌomu, kafopongkoꞌamiumo. Nokondua lalomiu tamaka miina humatoeꞌomu nepatudhukimiu, maka potagaliomu bhe pogihaomu. Miina sepaliꞌa koniꞌawaomu mbaꞌinomo miina mesaloomu ne Lahataꞌala.

³ Bheanea sambaheaꞌomu dua, tamaka miina koniꞌawaomu hampano noꞌala patudhuno sambaheamiu. Kamesalomiu so kaowu kaetaaꞌano namisimiu wutomiu.

⁴ Hintimiu mie kumangkalaꞌino podhandimiu bhe Lahataꞌala. Miina mandeꞌaaneomua bhahaa putae ane posabhangkaomu bhe dhunia modai, ingka membalimoomu kaewano Lahataꞌala? Dadiꞌanomo ane dopoindalo doposabhangka bhe dhunia modai, dohabumo wutondo mbali kaewano Lahataꞌala.

⁵ Koise fekihiomu miina nakotingkua wambano Kitabi aini, “O rohi neteino Lahataꞌala weo totono lalontoomu gaono mpuu so fehebuaꞌano.”

⁶ Ampamo kaowu rahamatino Lahataꞌala ne intaodiomu nofofoliu. Kapaꞌamo notibuhi dua weo Kitabi, “Lahataꞌala noꞌontomi patudhundo mie melangkeno diu, tamaka nofotiwohaanda rahamatino ne mie mekapandano wutono.”

⁷ Dadiꞌanomo tuhuomu ne Lahataꞌala, ewangieꞌomu Kafeompuꞌando seetani maka tetewei namilei.

⁸ Fekamaꞌo wutomiu ne Lahataꞌala, maka Anoa namaꞌotikoomu dua. Hintimiu mie kodhosa, fekangkilo dadimiu. Hintimiu kohaꞌano totono lalo, fekamoinda totono lalomiu.

⁹ Sosoane mpuu kadaino diumiu, mopeaꞌane bhe mekangkoꞌaeane. Futaamiu naetaa lumoliane kaꞌae, kaꞌiamiu naetaa lumoliane kaguguhu.

¹⁰ Fekapanda wutomu ne wiseno Ompu maka namekalangkeko.

Koise fobhitahaki 4:11-12

¹¹ Bhahitieꞌiku, koise poꞌumbu-umbuomua. Laꞌae moꞌalano tawa bhitahakino bhahitieno, ingka nofoꞌala bhe nobhitahaki pahintano Lahataꞌala. Maka ane foꞌalaomu pahintano Lahataꞌala, maꞌanano miina mangkafieꞌomu tamaka abhiomu wutomiu te wawono pahintano Lahataꞌala, tapeda seemie fobhitahakino.

¹² Gahaꞌaitu ampamo seemie mehabuno pahinta bhe bhitahakino manusia, Anoamo kokuasano nafosalamati bhe nafobinasa. Dadiꞌanomo laꞌae gahaꞌa hintu itu, sampe mokado bhitahaki bhahitiemu?

Koise molimpuꞌao Ompu weo kanawagamu 4:13-17

¹³ Aitu fetingke kanauꞌomu toha! Ambamiu, “Oleo itu tawa naewine takumala we kota awatu, taeate we watu nasetaꞌu bhe tapodaga maka takolaba.”

¹⁴ Bhahaa pandeꞌaanemoomu o ae so kumadhadhiaꞌano naewine? Peda amai bhahaa dadimiu itu? Ingka o dadimiu tapedamo pakahawu, notiwoha kaowu sebantaha maka nomiinae.

¹⁵ Sakotuꞌuꞌano tabeano pugauꞌomu nada aini, “Ane napoangkafi bhe kapoindalono Ompu, tadumadi bhe taehabu aini tawa aitu.”

¹⁶ Tamaka aitu hintimiu sangke-sangke wutomiu fekalangke diumiu. Diu pedando aitu sanea kaꞌala.

¹⁷ Dadiꞌanomo ane seemie nopandeꞌaanemo habu metaa so nehabuno, tamaka miina nadhumalangiea, ingka nokodhosamo.