Yakobus 3 - Muna Southern Dialect

O dhosano lelando manusia 3:1-12

¹ Bhahitieꞌiku, koise dobhahia kopatudhuno membalino guruno agama. Ingka pandeꞌaaneomu, nahumato nafobhitahaki Lahataꞌala, tubho nepake so intaodiomu membalino guru, nalumiuꞌe kabhieno bhe tubho nepake so mie sigaoꞌano.

² Kosasawintoomu ini nentela dehabu sabhaha kaꞌala. Mie tapa umalano pugau ingka nosangkamo dadino, nopoolie dua nofewanaki mbadhano.

³ O nunsuno adhaha dofokanaane kasama, neanomo adhaha aitu tanoangka-angkamo kapoindalonto, sampe koseꞌuluꞌae dopoolie dofewanakie.

⁴ Daesandahaomu dua ne kapala, naseꞌae maka kabhalano bhe kaꞌosano kawea busohaꞌiane, ingka nofewanakie setibha uli mohobu, tanoangka-angka kapoindalono mintahano uli.

⁵ Pedamo dua naꞌa o lelando manusia, mahinggamo sehonda katokano mbadha mohohobuno, tamaka dopakee so dosangke-sangkeꞌao wuto dopuga-pugauꞌao sabhaha diu bhalano. Tadua daꞌumondoomu o efi, mahingga naseꞌae kahohobuno nembali nefekamena kamontuꞌa bhalano.

⁶ O lelantoomu nopototo bhe efi. Ne olotando sabhaha katokano mbadhantoomu, o lela mbalimo kamaiꞌaoꞌano kuasa modai, sampe kadaino naꞌa nokabhinti dadinto. Pugaunto nembali nodai-dai dadinto, tapedamo efino narakaa noangka ne lela nofekamena kosekawantaꞌae dadinto.

⁷ Sabhaha kadadi mogila, kaꞌuhi lumola, kaꞌuhi sumola bhe kadadi we teꞌi nembali dofekaneaꞌe bhe padamo dofekaneada manusia.

⁸ Tamaka o lelando manusia miina sepaliꞌa natifekaneaꞌa. O lela maitu nodai sepaliꞌa, miina natifewanakia bhe neowa hasu kamateꞌa.

⁹ O lelantoomu nembali dopakee dopudhiane Lahataꞌala Amantoomu, tamaka nembali dua dopakee debhatataꞌiane manusia nefokonandoono Lahataꞌala nosekatu bhe Wutono.

¹⁰ Nomaiꞌao ne lela setangke nolimba wambano kapudhi bhe wambano bhatata. Bhahitieꞌiku, sakotuꞌuꞌano paise nada naꞌaa.

¹¹ Bhahaa nonandoo matano oe nefolimba oe motembe bhe oe mokaha sefolimbaꞌa?

¹² Bhahitieꞌiku, nonandoo bhahaa puꞌuno wohaꞌa nokobhakeꞌao bhakeno ai? Nandoo bhahaa puꞌuno angguru nokobhakeꞌao bhakeno wohaꞌa? Pedamo dua ne matano oe mokaha pae bhe kapoolia nalumimba oe motembe.

O fekihi metaa maiꞌaono te wawo 3:13-18

¹³ Ane ne olotamiu itu nandoo kofekihi metaano bhe kokapandeno, tabeano namotiwohae ne podiu metaa weo dadino, bhe naomalu lalono, noposahataa bhe fekihi kotimbangino.

¹⁴ Tamaka ane nakondua lalomiu ne mie bhaimu bhe sadhia ondofao kaowu kafaraluuno wutomiu, koise sangke-sangke wutomiu putae kotimbangiomu, kapaꞌamo ane nada aitu ingka bhansuleemoomu kabanarano Lahataꞌala.

¹⁵ Kakotimbangi pedando naꞌa suano maiꞌaono te surugaa, tamaka nomaiꞌao ne dhunia, ne nafusuundo manusia, bhe ne seetani.

¹⁶ Kapaꞌamo ne amai kanandooꞌano pokondu-konduaꞌao lalo bhe kafosibhalano wuto, ne itumo dua kanandooꞌano kahunggano liwu bhe sabhaha habu modai.

¹⁷ Tamaka o mie meꞌawano kakotimbangi maiꞌaono te wawo nomoinda totono lalono, noasiane pometaa, nomalu lalono bhe neangka. Anoa nobhela lalono ne mie bhaino, sadhia nehabu metaaꞌano, ane bhe posala maꞌanano miina naeꞌawi seweta, miina dua namehaaꞌula.

¹⁸ Daanumo o kataa bhe kabanara ingka hasilino pometaaꞌa, tapedamo bhakeno kantisa tumumbuno maiꞌao ne wine neꞌewindo mie meowano pometaa.