Yakobus 2 - Muna Southern Dialect

Koise depoꞌala-alaꞌao mie 2:1-13

¹ Bhahitieꞌiku, peda mie marasaeano ne Yesus Kristus, Ompuntoomu kumalabhiano, weo dhalangiꞌano kaparasaeamiu koise mepoꞌala-alaꞌaoꞌomu mie.

² Ibahano bhe mie hangkaea nesingkahu bulawa bhe nepake mokesaꞌano nomai se hompuꞌamiu, kaowu nomai dua mie mokae nepake mohakuꞌano.

³ Gahaꞌa hintimiu taꞌomosibhalaomu mie hangkaea naꞌa, ambamiu, “Mengkoha kaita ne kaengkohaꞌa mokesano ini!” maka ne mie mokae naꞌa taꞌopugauꞌomu, “Tameehe-ehemo ne itu!” tawa, “Mengkoha we ale kafindaꞌaku ini!”

⁴ Ane habuomu peda anaꞌa, ingka maꞌanano poꞌala-alaandamoomu mie, ingka dhiwakidaomu mie bhaimiu nomaiꞌao weo totono lalomiu modaiꞌano.

⁵ Bhahitieꞌiku timoasiꞌaono, fetingke kanauꞌomu! Mie mokae ne pomatano dhunia ingka nofepilida Lahataꞌala, dembali mie hangkaea weo kaparasaeando. Andoamo dua so kohakuꞌaono metahimano kadawu weo Kafopahintaꞌano Lahataꞌala, peda nedhandiꞌaono Lahataꞌala ne mie moasiane.

⁶ Tamaka hintimiu mefekaꞌaebumoomu mie mokae, gahaꞌaitumo ingka mie hangkaea modee-deekoomu, bulukomoomu dua ne wisendo pande bhitaha.

⁷ Ingka andoamo dua mekandidikino nea mokesa ⸤ (maꞌanano neano Ompu Yesus)⸥ nesambili ⸤ wakutuuno dokadiu saranikoomu bhe⸥ membaliomu fehebuaꞌano Lahataꞌala.

⁸ Ampamo kaowu, ane dhumalangiomu pahintano Omputo tibuhino weo Kitabino Musa, “Moasianda mie bhaimu peda kaasimu ne wutomu!”, ingka habu metaamoomu.

⁹ Tamaka ane mepoꞌala-alaꞌaoꞌomu mie, ingka mehabumoomu dhosa. Weo pahintano Lahataꞌala nentaleamo sepaliꞌa kodhosaomu, hampano mekangkalaꞌiomu pahinta.

¹⁰ Kapaꞌamo ane dodhalangi pahintano Lahataꞌala, tamaka dekangkalaꞌi sehonda, ingka nopototomo bhe dokangkalaꞌiemo bhahi-bhahiꞌae.

¹¹ Kapaꞌamo kobhoasaono, “Koise monsule!” ingka Anoamo dua kobhoasaono, “Koise fopongko!” Dadiꞌanomo ane miina monsulea, tamaka fopongko, ingka membalimo mie mekangkalaꞌino pahintano Lahataꞌala.

¹² Dadiꞌanomo posiꞌondoomu weo pugau bhe podiumiu, hampano pandeꞌaaneomu Lahataꞌala nabhitahakikoomu namangkafi tubhono fofobebasino ⸤ maiꞌao ne dhosa⸥ .

¹³ Weo kabhitahakino, Lahataꞌala paise naobhela lalono ne mie tapa mobhelano lalo ne mie bhaino. Tamaka mobhelano lalono ne mie bhaino, pae natihukumua, o kahukumu notaloe kabhelano lalo.

Kaparasaea bhe habu 2:14-26

¹⁴ Bhahitieꞌiku, o ae fahalaano seemie napugau, “Idi ini mie marasaeano,” gahaꞌaitumo miina nadhumalangie weo habuno? Nasumalamatiane bhahaa kaparasaea medando naꞌa?

¹⁵ Ibahano bhahitiemiu moꞌane tawa hobhine miina nakopakea bhe nokae oti nehumaano seꞌo-seꞌoleo.

¹⁶ Gahaꞌaitu seemie ne olotamiu tanopugau ambano, “Kalamo weo kabarakatino Ompu, sio-siomo mepake metaaꞌano, sio-siomo momaa ampa moweꞌi”, tamaka miina namaꞌane ae-aea so kafaraluuno mbadhano mie aitu, kaowu o ae fahalaano?

¹⁷ Pedamo dua anaꞌa o kaparasaea, ane pae damotiwohae weo habunto, ingka miina nakofahalaaꞌa. Naembali dakumonae nomatemo kaparasaea anaꞌa.

¹⁸ Tamaka bheanea nandoo dua mugauno, “Seemie nopasande ne kaparasaeano, seemie nopasande ne habuno.” Mie aitu atumobhoosie, “Soba fotiwoha kanau kaparasaeando mie tapa seowaꞌano bhe habundo. ⸤ Ingka miina nandumandooa.⸥ Tamaka o idi amotiwohaangko habu metaaku tandano kaparasaeaku.”

¹⁹ Ingka parasaeaꞌomu Lahataꞌala Kaseemie-mieꞌano. Nokesa itua. Tamaka rohi modaino doparasaea dua anaꞌa sampe noguguda kateꞌindo.

²⁰ Ingka mobhoheomu gahaꞌa! Gaomiu bhahaa amaꞌangkoomu bukutii putae kaparasaea tapa seowaꞌano bhe habu ingka nosia-sia?

²¹ Ondoomu awuantoomu Abraham. Ingka hampanomo habuno notahima metaaꞌemo Lahataꞌala wakutuuno nofoampe anano te wawono medha kontu so kapopanga ne Lahataꞌala.

²² Ne ini nentaleamo putae kaparasaeano seowaꞌa bhe habuno; hampano habuno kaparasaeano nosangkamo.

²³ Pedamo naꞌa nokoꞌulamo bhoasao tibuhino weo Kitabi, “Abraham noparasaea ne Lahataꞌala, maka hampano kaparasaeano naꞌa Lahataꞌala notahimae peda seemie banara.” Katikonaꞌanomo dua “Sabhangkano Lahataꞌala.”

²⁴ Dadiꞌanomo nentaleamo sepaliꞌa putae seemie notahima metaaꞌe Lahataꞌala hampano habuno, suano kaowu taꞌo kaparasaeano.

²⁵ Ondo kaitaomu dua Rahab, o karambole maitu, notahima metaaꞌe Lahataꞌala hampano habuno. Ingka nofotiampe mata-matano tantara Israel te lambuno, maka notulumida dofilei doangka we kaangkaꞌa sigaoꞌano.

²⁶ Ane o mbadha miinamo nakoinawa, ingka nomatemo. Pedamo dua aitu o kaparasaea, ane miina naseowaꞌa bhe habu, ingka nomatemo.