Yakobus 1 - Muna Southern Dialect

Kalengkano suha 1:1

¹ Salam maiꞌao ne idi, Yakobus, palima-limano Lahataꞌala bhe Ompu Yesus Kristus. Suha aini apakatue so miendo Yahudi ompulu haa sampuꞌano meateno we koliwuno.

Kaparasaea bhe fekihi metaa 1:2-8

² Bhahitieꞌiku, ane metompaloiꞌomu sabhaha kasabha bhe kasoba, takonamoomu dua kodawuaꞌomu.

³ Kapaꞌamo pandeꞌaaneomu, ane sadaa-daa kaparasaeamiu weo kasabha naꞌa, ingka losanomo kakosabaha potaamiomu.

⁴ Dhaganie mpuu kakosabaha potaamiomu itu neanomo sadhulu kamatangka, sampe nasumangkamo kamie metaamiu, paemo konimokaeꞌomua.

⁵ Ane ne olotamiu nandoo bhe metompaloino kasabha maka miina naewoha dhala, naetaa naesalo ne Lahataꞌala maka tetewei namaꞌane fekihi moinda, kapaꞌamo kawaꞌaono Lahataꞌala nowaꞌanda kosasawindo manusia, nomaiꞌao ne kataano lalono bhe miina nafofoꞌalaa.

⁶ Kamesalono tabeano namoampee weo kaparasaea mpuu-mpuu, koise nopoibhahaa. Kapaꞌamo mie poibhahano lalo tanopototomo bhe kaewono teꞌi, nofodo-fodolie kawea.

⁷ Mie pedando naꞌa koemo nefehoo-hooa nakoniꞌawa maiꞌao ne Ompu,

⁸ mbaꞌinomo nokohaꞌa-haꞌa totono lalono, miina natumohopo dadino.

Kakae bhe kahangkaea 1:9-11

⁹ Bhahitieꞌi ndidikino dumadino weo kakae, naetaa daoꞌia kapaꞌamo weo pomatano Lahataꞌala nelangke kaengkohaꞌando.

¹⁰ Pedamo dua mie humangkaeano naetaa daoꞌia, kapaꞌamo weo pomatano Lahataꞌala nepanda kaengkohaꞌando. Mie hangkaea naosali nada kambeano kamba-kamba.

¹¹ Nofoni oleo bhe nosodo kaowu tilangano, kamba-kamba noleleumo, kambeano notantamo, kakesano nosalimo. Nadamo aitu mie hangkaea, naosali ne wunta-wuntano sabhaha kagiuno.

Kasoba bhe kawudhu 1:12-18

¹² Nokodawua mpuu mie potaamino weo kasoba bhe kawudhu, kapaꞌamo ane namooli kaꞌudhino naeꞌawa kawaꞌao nefontaa-ntaa so fotalono, maꞌanano dadi suhue dhamani toka nedhandiꞌaono Lahataꞌala ne mie moasiane.

¹³ Ane seemie naeꞌawa kawudhu koe nopugau, “Kawudhu aini nomaiꞌao ne Lahataꞌala.” Kapaꞌamo Lahataꞌala miina natiwudhu ne modaiꞌano bhe miina dua nafowudhua.

¹⁴ Tamaka manusia nowudhue kapoindalono wutono seemie-seemie, nohelae bhe nogantue kapoindalo modaino.

¹⁵ Ane kapoindalo modai naꞌa doangkafie, losanomo o dhosa, maka o dhosa nobhala kaowu neowa mate.

¹⁶ Bhahitieꞌiku timoasiꞌaono, koise tibhohe-bhoheꞌiomua.

¹⁷ Sabhaha kawaꞌao metaa bhe kadawu sumangka nomaiꞌao te surugaa, nofosampue Amantoomu mokonandoono sabhaha kantalea te lani. Anoamo Lahataꞌala tapa tibhaliino, tapa dua meowano ondula mohohondono mebhali-bhaliino.

¹⁸ Noangkafi kapoindalono Wutono, Lahataꞌala nofowaꞌao dadi buꞌou dembaliomu anaꞌino, hampano ⸤ dofetingke bhe doparasaeaꞌomu⸥ bhoasaono kabanara. Patudhuno neanomo daembaliomu titiisa ne olotando sabhaha nefokonandoono Lahataꞌala.

Metingkeno tawa dhumalangino bhoasaono Ompu 1:19-27

¹⁹ Bhahitieꞌiku timoasiꞌaono, tandaiꞌeomu: seemie-seemie tabeano naehimba nafofetingke, tamaka koise nopikipugaua, koise dua nopikiꞌamahaa.

²⁰ Kapaꞌamo mie umamahano miina nahumabu metaa peda nepoindalono Lahataꞌala.

²¹ Dadiꞌanomo ohoeꞌomu toha podiu mohaku bhe sabhaha kanea modai. Fekamalu lalomiu bhe tahimaeꞌomu bhoasaono Lahataꞌala toka netisa weo totono lalomiu, kapaꞌamo bhoasao aitu nokokuasa namosalamatikoomu.

²² Hintimiu tabeano dhumalangieꞌomu bhoasaono Lahataꞌala, koise tafetingkeomu kaowu. Kapaꞌamo ane taꞌometingkeeꞌomu kaowu, ingka bhohe-bhoheꞌimoomu wutomiu.

²³ Mie metingkeno bhoasaono Lahataꞌala tamaka miina nadhumalangiea, ingka nopototo bhe mie umondo-ondono ulano weo paeasa.

²⁴ Gahaꞌa pada nofotinda-tindae, sanogampi nolimpuꞌaanemo dua katuno ulano naꞌa.

²⁵ Dadiꞌanomo tabeano damotinda-tindae, daꞌumondofaane bhe dadhumalangie mpuu kafoinaꞌuno Lahataꞌala. Kapaꞌamo pahintano Lahataꞌala naꞌa nosangka bhe nokokuasa nofobebasi manusia ⸤ maiꞌao ne dhosa⸥ . Dadiꞌanomo koise taꞌometingke kaowu bhoasaono Lahataꞌala maka molimpuꞌaane. Kapaꞌamo mie dhumalangino bhoasaono nabarakatie Lahataꞌala ne sabhaha nehabuno.

²⁶ Ane seemie noabhi wutono nokoꞌagama tamaka miina namooli nofewanaki lelano, ingka nobhohe-bhoheꞌimo wutono, agamano miina nakofahalaa.

²⁷ Ane dopoindalo dembali mie koꞌagama mongkilo bhe kumampuu-mpuuno ne pomatano Lahataꞌala Amantoomu tabeano daehabu peda aini: daeꞌondofao anaꞌi moꞌelu bhe bhihinanda mosabhano, bhe dodhagani wutondo koe sampe nofotaihi kadaino dhunia ini.