Tula-tulando rasulu 9 - Muna Southern Dialect

Saulus nodolimo ne Lahataꞌala, noparasaeamo ne Yesus 9:1-19 a

¹ Wakutuu anaꞌa Saulus nandoo nokaꞌende-ende lalono naꞌumamba bhe namongko mangkafino Yesus. Anoa nopoꞌawaꞌao Imamu Bhalano

² nesalo suha kuasa. Suha anaꞌa namowae ne kamungkulaꞌi mandeꞌaono lambu kasambaheaꞌando miendo Yahudi we kotano Damsyik. Patudhuno ane napoꞌawaꞌao mie mangkafino Kaangkaꞌano Ompu Yesus namoꞌane nahobhine, naembali nahumakofida maka namosulida we Yerusalem.

³ Gahaꞌa we laano sala, nomaꞌomo we Damsyik tambaꞌomo nokalibue tilanga nomaiꞌao te lani.

⁴ Saulus lasao notihambitao we wite, maka nofetingke suaha ambano, “Saulus, Saulus, noafa gahaꞌa fodee-dee kanau?”

⁵ Ambano Saulus, “Laꞌae gahaꞌa hintu itu waompu?” Notobhoosimo suaha anaꞌa, “Idi ini Yesus nefodee-deemu itu.

⁶ Aitu wanuꞌo toha, pesuamo weo kota, ne itu damohatoangkomo so nehabumu.”

⁷ Sabhangkaꞌino weo kala-kalano naꞌa tadotongo, hampano dofetingke suaha, tamaka miina dakoniwohaa.

⁸ Saulus noehemo maka nofowula matano, tamaka miina nafowohaa. Dadiꞌanomo dotondaemo dopesuaꞌane we Damsyik.

⁹ Tolu oleo miina nafowohaa, miina naomaaꞌa bhe miina dua naohoꞌua.

¹⁰ We Damsyik naꞌa nandoo seemie mangkafino Yesus, neano Ananias. Nofohatoe Ompu weo powoha, ambano, “Ananias!” Notobhoosimo, “Uumbe Ompu!”

¹¹ Nokowambamo dua Ompu, “Kalamo we kaangkaꞌa koneaꞌano Sala Melaa. Ondofi we lambuno Yudas seemie maiꞌaono we Tarsus, neano Saulus. Ampa aitu tangasano nosambahea.

¹² Weo powohano nowoha seemie koneaꞌano Ananias nopesua weo lambu maka notei limano te wawono so nafowohaꞌao toha.”

¹³ Ambano Ananias, “Ompu, nobhahimo kafetingkeꞌaku mie anaꞌa, notolau kadaino podiuno ne umatimu mongkilono we Yerusalem.

¹⁴ Kahatoꞌano dua ne ini newowoꞌo suha kuasa maiꞌaono ne meangkaꞌindo imamu nahumakofi mie sumambilino neamu.”

¹⁵ Tamaka Ompu nokobhoasaomo toha, “Kalamo, kapaꞌamo anoamo ini nepiliku so palima-limaku, naefebhihitaiꞌao neaku ne sabhaha bansano liwu suano Yahudi, ne sabhaha omputo bhe ne miendo Israel dua.

¹⁶ Idi amotiwohaane kabhahino kakadee-dee so nenamisino mbaꞌinomo neaku.”

¹⁷ Pada aitu Ananias nokalamo maka nopesua weo lambu anaꞌa. Noteimo limano te wawono Saulus bhe nopugau ambano, “Saulus, bhahitieku, Ompu notudu kanau amai ne ini, Anoamo Ompu Yesus motiwohano Wutono we sala kaangkaꞌamu. Kahatoꞌaku neanomo sumuli toha fowoha bhe nakumabhintiko Rohino Lahataꞌala.”

¹⁸ Gahaꞌa tambaꞌomo kabeangaꞌida anano kenta nosimotantaꞌa maiꞌao ne matano Saulus, lasao nofowoha toha. Pada aitu noehemo maka dokadiuꞌe.

^19a Pada nohumaa sulimo toha noꞌosa.

Saulus nefolele Bhihita Metaa we Damsyik 9:19b-25

^19b Ampa seꞌoleo haa oleo, Saulus nandoo neate-ate bhe mangkafino Yesus we Damsyik.

²⁰ Lasao dua nopesua weo lambu-lambu kasambaheaꞌa nefebhihitaiꞌao putae Yesus Anano Lahataꞌala.

²¹ Kosasawindo metingkeno domente ambado, “Ingka miemo anoa ini mobinasano mie sumambilino neano Yesus we Yerusalem endefiꞌini! Pakade kahatoꞌano ne ini patudhuno nahumakofi mangkafino Yesus naowaꞌida ne meangkaꞌindo imamu.”

²² Tamaka Saulus sadhulu-dhulu kabhala kuasano, kapaꞌamo nobhahimo nofotiwoha bukutii putae Yesus maitu kotu-kotuꞌu Mesias, Omputo Fosalamatino, sampe miendo Yahudi we Damsyik nomate akalando.

²³ Nopalusi seꞌoleo haa oleo miendo Yahudi dopugau-gaumo damongkoe.

²⁴ Tamaka isikadhindo modaiꞌano naꞌa nohato dua ne Saulus. Mentae mohondo Saulus dokantaaꞌe ne amai fointono kota, patudhundo damongkoe.

²⁵ Tamaka sealo mie mangkafie dofopesua Saulus weo kalangka maka dofosibulue we sewetano benteno kota.

Saulus we Yerusalem 9:26-31

²⁶ Sahatono we Yerusalem Saulus nofesoba nokapotimo mangkafino Yesus, tamaka kosasawindo doteꞌie, mbaꞌinomo miina damarasaea anoa ini nembalimo dua mangkafino Yesus.

²⁷ Mpahinomo Barnabas kumalaꞌie maka noowae ne rasuluꞌi. Barnabas netula-tulaandamo Saulus nowoha Ompu we laano sala maka Ompu nopugau bhe anoa. Netula-tulaanda dua kakadono Saulus nofebhihitaiꞌao neano Yesus we Damsyik.

²⁸ Dadiꞌanomo Saulus nopohompu-hompumo bhe andoa we Yerusalem. Nokado sepaliꞌa nofebhihitaiꞌao neano Ompu Yesus.

²⁹ Anoa nopuga-pugau dua bhe doposalamaꞌana bhe miendo Yahudi mepakeno wamba Yunani, ⸤ hampano andoa miina damarasaea putae Yesus Omputo Fosalamatino⸥ . Tamaka andoa ini deꞌondofi katolala damongkoe.

³⁰ Sadopandeꞌaane, bhahitie marasaeano lasao dowowoꞌoe we Kaisarea maka dofopansuhue we Tarsus.

³¹ Nomampona-mpona dua umati marasaeano we kadieno Yudea, Galilea bhe Samaria deate-ate weo katohopo. Umati andoa ini dhulu katangka kaparasaeando bhe dodadi weo kateꞌi ne Ompu. Weo katulumi bhe kalawesino Rohino Lahataꞌala andoa sadhulu-dhulu kabhahi.

Petrus nofekaꞌosa Eneas bhe nofodadi Dorkas 9:32-43

³² Wakutuu anaꞌa Petrus nolili ne amai liwu. Weo kala-kalano maitu noangkai dua umati mongkilo we liwuno Lida.

³³ Ne itu nopoꞌawaꞌao seemie kalu, neano Eneas. Alu taꞌumo sandole ne kaodoꞌano.

³⁴ Ambano Petrus, “Eneas, aitu Yesus Kristus nofekaꞌosako, wanuꞌo toha maka fosintuwu kaodoꞌamu!” Eneas lasao nowanu.

³⁵ Kosasawindo miendo Lida bhe kadieno Saron dowoha Eneas, maka dodolimo bhe doparasaea ne Ompu.

³⁶ We kotano Yope nandoo seemie hobhine mangkafino Yesus, neano Tabita; weo wamba Yunani neano Dorkas. Hobhine anaꞌa nobhahi sepaliꞌa nehabu metaaꞌano, sadhia netulumi mie mokae.

³⁷ Wakutuu aitu nosaki maka nomate. Pada dokadiuꞌe maeatino dofondolee weo boloku te wawo.

³⁸ Liwuno Lida nopomaꞌoti bhe Yope naꞌa. Dofetingke Petrus nohato we Lida, mangkafino Yesus detudumo dohodua daesalo ne Petrus ambado, “Maimo fekahimba we liwu mani.”

³⁹ Petrus lasao nokanu maka noangkafida. Sahatono, Petrus dofofonie te wawo. Kosasawindo bhihinanda dolibu-libue bhe doꞌae, poowa dofotiwohaane bhadhu bhe pakea kasapuꞌano Dorkas nandoo noꞌuhi itu.

⁴⁰ Tamaka Petrus notududa dalumimba kosasawindo maka nofongkoha tuuno nosambahea. Pada anaꞌa nodolimo ne maeati maitu maka nopugau, “Tabita, wanuꞌo toha!” Tabita nofowulamo matano. Sanowoha Petrus, lasao nowanu nengkoha.

⁴¹ Petrus nointahamo limano maka nofoehee. Pada anaꞌa noloꞌoimo umati mongkilo bhe bhihinandaꞌi maka nofosusuanda hobhine sumuli moꞌuhino maitu.

⁴² Bhihitano kadhadhia aini nokolele ne kosekaꞌewaꞌae kotano Yope maka dobhahi sepaliꞌa mie marasaeano ne Ompu Yesus.

⁴³ Ampa seꞌoleo haa oleo Petrus nandoo neate-ate we Yope naꞌa, we lambuno seemie pande bhalula, koneaꞌano Simon.