Tula-tulando rasulu 8 - Muna Southern Dialect

Saulus nofodee-dee umati marasaeano we Yerusalem 8:1-3

¹ Notandamo oleo anaꞌa umati marasaeano we Yerusalem dofodee-deeda sepaliꞌa. Andoa dopuli dotigasa dohope we witeno Yudea bhe Samaria, ampamo kaowu rasuluꞌi miina.

² Mie lumebeno dokalamo dokobuhu maeatino Stefanus bhe dekangkoꞌae.

³ Tamaka Saulus nokopatudhu namohansuru umati marasaeano maitu. Nopesuaki lambudo noala seꞌonue, namoꞌane nahobhine nobuluda nofopesuada weo katohongku.

Filipus we Samaria 8:4-25

⁴ Mie marasaeano tigasano maitu dolili ne amai liwu poowa defolele Bhihita Metaa.

⁵ Filipus nokala ne seꞌonu kota we Samaria maka nefebhihitaianda Mesias, Omputo Fosalamatino.

⁶ Dofetingke pugauno Filipus bhe dowoha dua tanda-tanda tapa mentela nehabuno, kosasawindo miendo kota dosekakolalo dotahimae bhe doteiꞌe weo namu-namundo.

⁷ Kapaꞌamo dobhahi seetani lumimbano maiꞌao ne mie nepesuakindo, dokei ampa kabhalano wobhando. Dobhahi dua kalu bhe kakempa nefekaꞌosano.

⁸ Dadiꞌanomo kaꞌiando maka miendo kota aitu.

⁹ Weo kota aitu nandoo dua seemie koneaꞌano Simon, nomponamo nehabu pasingara sampe domenteane sepaliꞌa raꞌeatino Samaria. Mie aini noabhi wutono tapedamo mie kokuasa.

¹⁰ Kosasawindo mie, namie bhalano namie ndidiki dofetingke sepaliꞌa pugauno. Ambado, “Mie aini sahangkano kuasano Lahataꞌala, nekonando Kuasa Bhalano.”

¹¹ Andoa dofetingke pugauno hampano nomponamo nofobuagaanda pasingara nehabuno maitu.

¹² Tamaka aitu mie doparasaeamo ne Filipus. Anoa nefoleleanda bhihitano Kafopahintaꞌano Lahataꞌala bhe bhihitano Yesus Kristus. Namoꞌane nahobhine dokadiuda.

¹³ Mahingga wutono Simon noparasaea dua. Pada dokadiuꞌe sadhia nopoangkafi bhe Filipus. Nopuli dua menteno nowoha tanda-tanda tapa mentela bhe giu timenteꞌaono nehabuno Filipus.

¹⁴ Miina naomponaa rasulu we Yerusalem dofetingkemo gahaꞌa miendo Samaria dotahimamo bhoasaono Lahataꞌala. Dadiꞌanomo dotudumo Petrus bhe Yohanes dakumala we naꞌa.

¹⁵ Sahatondo, kohoduando rasulu maitu dosambaheamo, desaloanda daetahima Rohino Lahataꞌala.

¹⁶ Kapaꞌamo Rohino Lahataꞌala miinaꞌo nakumabhintidaa, kaneꞌo dokadiuda weo neano Ompu Yesus.

¹⁷ Kohoduando dotei limando te wawondo miendo Samaria maitu maka detahima Rohino Lahataꞌala.

¹⁸ Simon nowoha gahaꞌa kaetahimaꞌando Rohino Lahataꞌala mbaꞌinomo rasulu dotei limando te wawondo mie.

¹⁹ Nowoha peda amaitu, nofodhuluandamo dhoi bhe nopugau ambano, “Waꞌa kanauꞌomu bhe idi kuasa medando itu, neanomo ane atumei dua limaku te wawondo mie bhaiku daetahima dua Rohino Lahataꞌala.”

²⁰ Tamaka ambano Petrus, “Pesuamo narakaa bhe dhoimu itu! Saomua kadawuno Lahataꞌala doꞌoliane dhoi?

²¹ Miina bhe hakumua weo kahadhaa mani ini, hampano totono lalomu miina naelaaꞌa ne pomatano Lahataꞌala.

²² Dadiꞌanomo fetompaꞌaomo podiu modaimu inia, maka sambahea ne Ompu so natiꞌamponiꞌao dukuno lalomu modaino ini.

²³ Kapaꞌamo awohako itu, totono lalomu itu notolaumo kakoulano pedamo kapaꞌino ufei, nogogantuemo isikadhi modai.”

²⁴ Ambano Simon, “Mesalo kanauꞌomu kaꞌasi ne Ompu keana nokoꞌula pugaumu itu.”

²⁵ Pada detula-tula dosakusiiꞌao Yesus bhe defolele bhoasaono Lahataꞌala, Petrus bhe Yohanes dosulimo we Yerusalem. Wakutuuno dosuli, nobhahi dua liwu ne kadieno Samaria kaefoleleꞌando Bhihita Metaa.

Filipus nokadiu kabhala maiꞌaono we Etiopia 8:26-40

²⁶ Seemie malaꞌekatino Ompu nopugaumo ne Filipus ambano, “Kalamo humanda we salata, we kaangkaꞌa maiꞌaono we Yerusalem humopeꞌano we Gasa.” Kaangkaꞌa anaꞌa nolino.

²⁷ Dadiꞌanomo Filipus nokalamo. Ne naꞌa nandoo seemie moꞌane, o kabhala maiꞌaono we Etiopia. Anoa ini mintahano kahangkaeano Kandake. Kandake ini omputo hobhine mahintangino witeno Etiopia. Moꞌane aini nokala nosombai Lahataꞌala we Yerusalem.

²⁸ Wakutuu anaꞌa nohatomo we sala nasumulimo. Tangasano nengkoha-ngkoha weo kareta kasawiꞌano, nobasa-basa Kitabino anabii Yesaya.

²⁹ Ambano Rohino Lahataꞌala ne Filipus, “Kala maꞌoti kareta atatu!”

³⁰ Filipus lasao nokala nomaꞌotie maka nofetingke kabhala amaitu nandoo nobasa Kitabino anabii Yesaya. Filipus nofeenaemo, “Pandeꞌaane bhahaa maꞌanano nebasamu itu?”

³¹ Notobhoosimo ambano, “Nada amai amandeꞌaane gahaꞌa maꞌanano ane pae bhe so tumalesa kanauꞌe?” Maka nosaliꞌi Filipus namoni te wawono karetano naengkoha ne sohihino.

³² Aeatino Kitabi nebasano naꞌa peda aini, “Pedamo seꞌulu dhumba doowae se kaesumbeleꞌa kadadi; kabeanga anano dhumba miina nakodiu ne wisendo mie kumuhuno wuluno, pedamo anaꞌa anoa miina nakosuahaꞌa.

³³ Anoa dofompina-mpinae, kabhotusindo miina naꞌumadhilia sampe doalae bhe inawano. Dadiꞌanomo miinamo bhe sumambiliea sampuꞌano.”

³⁴ Maka ambano kabhala anaꞌa ne Filipus, “Ameenako, laꞌae bhahaa nepulaoꞌaono anabii ini? Nopulaoꞌao wutono bhahaꞌi o mie sigaoꞌano?”

³⁵ Dadiꞌanomo Filipus nopugaumo. Notanda ne aeati saꞌituini nofohatoanemo Bhihita Metaa, bhihitano Yesus.

³⁶ Andoa dokala kansuhu, gahaꞌa dehatomo koꞌoeꞌano. Ambano kabhala maitu, “Ingka inia o oe, nandoo bhahaa nekaemiku ane dakumadiu kanaumoa?”

³⁷ [Notobhoosimo Filipus, “Ane nokampuu-mpuumo lalomua weo kaparasaeamu, naembalimo dakumadiuko.” Ambano toha, “Aparasaeamo Yesus Kristus Anano Lahataꞌala.”]

³⁸ Mieno Etiopia maitu notududamo damofetumpu kareta kasawiꞌando. Kohoduando, Filipus bhe mieno Etiopia maitu, lasao dosampu weo oe maka Filipus nokadiuꞌe.

³⁹ Dofoni domaiꞌao weo oe, Filipus tambaꞌomo nosangkee Rohino Ompu sampe miinamo naohaea kabhala maiꞌaono we Etiopia maitu, tamaka weo kawulano lalono nofopansuhumo kala-kalano.

⁴⁰ Gahaꞌa nofengkanaꞌao lalono Filipus nohatomo we Asdod. Anoa nokala kansuhu poowa nefolele Bhihita Metaa ne sabhaha liwu ampa nohato we kotano Kaisarea.