Tula-tulando rasulu 6 - Muna Southern Dialect

Desangke dopipitu so umundofaono mie mokae 6:1-7

¹ Wakutuu anaꞌa mie mangkafino Yesus sadhulu-dhulu kabhahi. Miendo Yahudi mepakeno wamba Yunani, dopahamuntuꞌao miendo Yahudi mepakeno wamba Ibrani, mbaꞌinomo bhihinandado miina natiꞌondofao metaaꞌa. Andoa ini miina daeꞌawa kafaraluu nedawu-dawundo seꞌo-seꞌoleo.

² Dadiꞌanomo rasulu ompulu hoduano dofohompumo kosasawindo mie marasaeano. Ambado, “Ingka pae naetaaꞌa tametumpu taefolele bhoasaono Lahataꞌala, mbaꞌinomo taeꞌondofao nehumaa.

³ Dadiꞌanomo, bhahitie-bhahitie, mepili kaitaomu dapipitu ne olotando mie marasaeano, maka tasumangkeda so umondofaono kafaraluu aini. Mie so nepilintoomu tabeano mie metaa weo pomatando mie bhahi, tabeano nekabhintino Rohino Lahataꞌala bhe dokotimbangi.

⁴ Neanomo insaodia tamosibhalamo sambahea, bhe taefolele bhoasaono Lahataꞌala.”

⁵ Patudhundo naꞌa doangkafie kosasawindo mie marasaeano. Dadiꞌanomo dopilimo Stefanus, seemie motangkano kaparasaea bhe nekabhintino Rohino Lahataꞌala. Dopilimo dua Filipus, Prokorus, Nikanor, Timon, Parmenas bhe Nikolaus. Nikolaus ini mieno Antiokia, tamaka nopesuamo agama Yahudi.

⁶ Mie pipituno ini doowadamo ne wisendo rasulu. Rasulu dosambaheaꞌanda bhe dotei limando te wawondo ⸤ katandainomo desaloanda kabarakatino Ompu Lahataꞌala⸥ .

⁷ Bhoasaono Ompu Lahataꞌala sadhulu-dhulu kaꞌewa nolelea. Mie marasaeano we Yerusalem sedhuluꞌamo dua kabhahindo. Dobhahi dua imamu tumuhuno maka doparasaea ne Yesus.

Stefanus dohakoe 6:8-15

⁸ Stefanus noponoꞌao kabarakati bhe kuasano Lahataꞌala sampe nobhahi nehabu tanda tapa mentela bhe giu timenteꞌaono ne mie bhahi.

⁹ Tamaka nandoo dua mewangie. Andoa ini umatino Yahudi nekonando umati Libertini (maꞌanano bhatua nefobebasi), domaiꞌao we kotano Kirene bhe kotano Aleksandria. Doseꞌise bhe miendo Yahudi maiꞌaono we kadieno Kilikia bhe Asia maka domai dopotagali bhe Stefanus ⸤ hampano miina damarasaea putae Yesus Omputo Fosalamatino⸥ .

¹⁰ Tamaka andoa ini miina datumanggoa doewangi pugauno Stefanus, hampano Rohino Lahataꞌala maꞌane kapande.

¹¹ Dadiꞌanomo deponambomo mie so dapugauꞌao, “Tafetingke mie aini noꞌumbu Musa bhe Ompu Lahataꞌala!”

¹² Pedamo naꞌa andoa dewudhu mie bhahi, kamungkulaꞌi, bhe pande-pande Kitabi, maka dohako Stefanus. Lasao dobulue ne wisendo Sahano Agama.

¹³ Andoa deowaꞌi dua sakusii megau-gauno. Ambado sakusii naꞌa, “Mie aini miina bhe fetumpua nofekandidiki Lambu mongkilono ini bhe Kitabino Musa.

¹⁴ Insaodi tafetingkee dua ambano, ‘Yesus maiꞌaono we Nasaret maitu namohansuru Lambuno Lahataꞌala ini, tubhono adhati kahunsaꞌaontoomu ne Musa nabhaliiꞌe!’ ”

¹⁵ Kosasawindo mie mengkohano weo hompuꞌa maitu dotonto Stefanus, gahaꞌa dowoha ulano pasae ulano malaꞌekati.