Tula-tulando rasulu 5 - Muna Southern Dialect

Ananias bhe Safira 5:1-11

¹ Nandoo seemie koneaꞌano Ananias, neano hobhineno Safira. Anoa neaso witendo sedawu.

² Olino sedawu nohunsae so wutondo, sedawuno nowaꞌandae rasulu. Anaꞌa nopandeꞌaane dua hobhineno.

³ Tamaka Petrus nopugaumo ne Ananias ambano, “Ananias, noafa gahaꞌa totono lalomu nokuasaiane Kafeompuꞌando seetani, sampe gau-gaumo Rohino Lahataꞌala? Ingka olino witemu sedawu hunsae so wutomu?

⁴ Ane paeꞌo masoe ingka daanumo witemu, hato dua pada asoe ingka dhoino hakumu. Noafa gahaꞌa kofekihiꞌao mehabu peda aitu? Suano manusia negau-gaumua, tamaka wutono Lahataꞌala!”

⁵ Nofetingke pugau anaꞌa lasao notiwata komate-mateno. O mie metingkeno kadhadhia amaitu doteꞌi sepaliꞌa.

⁶ Palusi anaꞌa domaimo ana moꞌaneꞌi, maeatino lasao dowalue, dotongkue maka dokala dokobuhue.

⁷ Napetolu dhamu nohatomo dua hobhineno, tamaka miinaꞌo namandeꞌaane kadhadhia saꞌituini.

⁸ Ambano Petrus ne anoa, “Soba fohato kanau: pedamo kabhahino dhoi aini olino wite neasomiua?” Ambano hobhineno naꞌa, “Uumbe, pedamo aitu.”

⁹ Ambano dua Petrus, “Noafa gahaꞌa hintu bhe moꞌanemu pokanagauꞌaoꞌomu solo-soloomu Rohino Ompu? Ondoda, mie kaneꞌo maiꞌaono kumobuhuno moꞌanemu, deehe-ehemo ne wobhano fointo. Aitu datumongkumo dua hintu.”

¹⁰ Hobhine aitu lasao dua notiwata ne wiseno Petrus, komate-mateno. Hato dopesua ana moꞌaneꞌi maitu, dohafotie miinamo nakoineia. Lasao dotongkue maka dokala dokobuhue ne sohihino moꞌaneno.

¹¹ Kosasawindo umati marasaeano bhe mie metingkeno kadhadhia amaitu doteꞌi sepaliꞌa.

Giu timenteꞌaono bhe tanda-tanda tapa mentela 5:12-16

¹² Nobhahi tanda tapa mentela bhe giu timenteꞌaono nehabundo rasulu ne mie bhahi. Kosasawindo mie marasaeano sadhia dosekakolalo dopohompu-hompu we Tambino Salomo ne Lambuno Lahataꞌala.

¹³ O mie sigaoꞌano miina bhe mokadonoa dahumompu bhe andoa, tamaka dofosibhalada sepaliꞌa mie bhahia.

¹⁴ Dhulu kaompona dhulu kabhahi mie marasaeano ne Ompu, namoꞌane nahobhine.

¹⁵ Sampe kanandooꞌanomo dua deowaꞌi mie mosaki ne wiwino kaangkaꞌa, tadofondoledamo ne kaodoꞌa tawa ne kampasi, bhahaꞌi kaowu namangka Petrus tadua nakumantibhadamo ondulano.

¹⁶ Dopohato-hatomo dua mie bhahi maiꞌaono ne liwu-liwu momaꞌoꞌano bhe Yerusalem, deowaꞌi mie mosaki bhe nepesuakino seetani. Kosasawindo dofekaꞌosada.

Rasulu dotitohongku 5:17-25

¹⁷ Hato panda-pandano Imamu Bhalano bhe kosasawindo mangkafie - sanea miendo Saduki - doewamo, mbaꞌinomo kakoulano lalo.

¹⁸ Rasulu dohakoda maka dofopesuada weo katohongkundo mie ndidiki.

¹⁹ Tamaka hato nohondo oleo, seemie malaꞌekatino Ompu nolengkasi fointono katohongku naꞌa maka nowowoꞌoda we simbali.

²⁰ Ambano malaꞌekati naꞌa, “Kala meehe-eheomu we Lambuno Lahataꞌala maka foleleomu bhihitano dadi buꞌou ini ne mie bhahi.”

²¹ Andoa doangkafi pahintano malaꞌekati naꞌa. Nandoo sanimentae dokalamo we Lambuno Lahataꞌala maka dotanda dofoguhu mie ne itu. Wakutuu aitu dua Imamu Bhalano bhe mangkafie defokonandoomo hompuꞌando Sahano Agama bhe kamungkulaꞌindo Yahudi. Dohompu kaowu, detudumo mie dakumala daꞌumulei rasuluꞌi we katohongku.

²² Tamaka dohato we katohongku, gahaꞌa o rasulu miina dahumafotida. Dadiꞌanomo dosulimo dopolele ambado,

²³ “Tahato we katohongku, fointo notikunsi metaa, o dhaga daa-daada te wiseno fointo. Tamaka pada talengka fointo, tapesua we lalo, gahaꞌa miinamo taohaa bhe naseemie.”

²⁴ Dofetingke peda naꞌa, neangkando dhagano Lambuno Lahataꞌala bhe imamu nopowengka dua handado, konanomo bhahaꞌi doafamo rasuluꞌi naꞌa.

²⁵ Pandeꞌaanea nohatomo seemie neowaanda bhihita ambano, “O mie netohongkumiu, ingka deehe-ehe we Lambuno Lahataꞌala, defoinaꞌu mie bhahi!”

Rasuluꞌi ne wisendo Sahano Agama. Katangahino Gamaliel 5:26-42

²⁶ Pada anaꞌa neangkando dhagano Lambuno Lahataꞌala bhe mieno dokala we Lambuno Lahataꞌala doꞌulei rasulu hoduano naꞌa. Rasulu ini miina damafa-afaꞌianda mbaꞌinomo doteꞌi mie bhahi, bhahaa dobhatumbuanda kontu.

²⁷ Kohoduando doowada ne wiseno Sahano Agama. Imamu Bhalano nofee-feenadamo ambano,

²⁸ “Padamo tafokii-kiikoomu taꞌeleꞌaangkoomu fofoguhuomu weo neano mie aitu. Tamaka o ae koꞌulaꞌano? Kafoguhumiu nokabhintiemo kosekaꞌewaꞌae Yerusalem, pakade patudhumiu kamateꞌano mie aitu malaꞌa kainsamieꞌomu insaodi.”

²⁹ Petrus bhe rasulu sabhangkaꞌino dotobhoosimo ambado, “Nofaraluu damangkafi pahintano Ompu Lahataꞌala nalumiuꞌe pahintano manusia.

³⁰ Yesus maitu pongkoeꞌomu, kantaiꞌeomu te sau salipu, tamaka Ompu Lahataꞌalando awuantoomu nofowanue nomaiꞌao ne mate.

³¹ Anoamo nesangkeno Lahataꞌala bhe nowaꞌanemo kuasa mbali Neangka bhe Omputo Fosalamatino, neanomo miendo Israel dametompaꞌao diundo modaino, so notiꞌamponiꞌao dhosando.

³² Insaodimo ini sumakusiiꞌaono sabhaha kadhadhia naꞌa, insaodi bhe Rohino Lahataꞌala. Rohino Lahataꞌala ini nowaꞌandae Lahataꞌala ne kosasawindo mie mangkafino pahintano.”

³³ Dofetingke pugau anaꞌa, nolea sepaliꞌa lalondo Sahano Agama, sampe dokopatudhu damongkoda.

³⁴ Ne olotando Sahano Agama maitu nandoo seemie Farisi pande Kitabino Musa, neano Gamaliel. Anoa ini dofosibhalae dua mie bhahi. Nesalomo rasulu hoduano maitu damolimbada sebantaha.

³⁵ Pada anaꞌa ambano ne kamungkulaꞌi, “Bhahitieꞌiku miendo Israel, fekihiomu kadeki fekataa-taa so nehabumiu ne mie andoa ini!

³⁶ Endefiꞌini nandoo koneaꞌano Teudas, noabhi wutono mie bhalano, sampe mangkafie dapefato moꞌono. Tamaka dopongkoe kaowu, mie mangkafie naꞌa tadopogasa-gasamo, tanopalusimo peda aitu.

³⁷ Nopalusi anoa naꞌa, nandoomo dua seemie koneaꞌano Yudas mieno Galilea, ne wakutuuno dhiwaꞌa. Dobhahi dua tihelaane lalo sampe doangkafie. Tamaka anoa dopongkoe dua sampe mangkafie dopuli dua dotigasaa.

³⁸ Dadiꞌanomo patudhuku idi, andoa ini koemo afa-afaꞌiandaomua! Tahunsaꞌandomo. Ane patudhundo bhe habundo maitu nomaiꞌao ne manusia, tetewei naosali.

³⁹ Tamaka ane nomaiꞌao ne Lahataꞌala, pae moolieꞌomua mekasalidaomua, konanomo nakoꞌulaꞌao poewangimoomu bhe Lahataꞌala.” Katangahino naꞌa dotahimae.

⁴⁰ Pada anaꞌa rasulu maitu dofopesuadamo toha maka dopepekida bhe doꞌeleꞌaanda dafofoguhu damake neano Yesus. Pada amaitu dofolapadamo.

⁴¹ O rasulu maitu doꞌia sepaliꞌa dohunsamo hompuꞌano Sahano Agama, kapaꞌamo Lahataꞌala noabhida dopantasimo dua deꞌawa kakadee-dee mbaꞌinomo neano Yesus.

⁴² Andoa miina dametumpua dofofoguhu weo Lambuno Lahataꞌala bhe ne lambudo mie. Seꞌo-seꞌoleo defolele Bhihita Metaa putae Yesus maitu Omputo Fosalamatino.