Tula-tulando rasulu 4 - Muna Southern Dialect

Petrus bhe Yohanes ne wiseno Sahano Agama 4:1-22

¹ Tangasano Petrus bhe Yohanes dopuga-pugau bhe mie bhahi, gahaꞌa domaiꞌidamo imamu bhe neangkando dhagano Lambuno Lahataꞌala bhe miendo Saduki.

² Andoa ini nosodo sepaliꞌa lalondo mbaꞌinomo Petrus bhe Yohanes dofoguhu mie bhahi putae Yesus nosuli nodadi. Aini nembalimo tandano kawanuꞌando kosasawindo mie mate.

³ Kohoduando dohakoda maka dotohongkuda ampa nomentae, kapaꞌamo oleo nohondomo.

⁴ Tamaka metingkeno kafoguhundo dobhahi marasaeano, sampe kosasawindo umati o moꞌane kaowu dapelima hewumo.

⁵ Hato nomentae, Sahano Agama, kamungkulaꞌindo Yahudi bhe pande-pande Kitabi dohompumo we Yerusalem.

⁶ Imamu Bhalano koneaꞌano Hanas, Kayafas, Yohanes bhe Aleksander bhe mie sigaoꞌano dua sampuꞌando Imamu Bhalano, dohompu bhe kamungkulaꞌi naꞌa.

⁷ Pada anaꞌa Petrus bhe Yohanes doowadamo te wisendo maka dofee-feenada ambado, “Mepakeomu kuasa ae gahaꞌa, bhahaꞌi pakeomu nea laꞌae fekaꞌosaomu kalu aini?”

⁸ Petrus nokabhintie Rohino Lahataꞌala maka notobhoosi ambano, “Neangkaꞌindo umati bhe kamu-kamungkulaꞌi!

⁹ Oleo itu dofee-feena kainsamimo mbaꞌinomo taehabu metaaꞌano ne mie mosaki, pakade dofee-feena kainsami dua bhahaꞌi mie amaitu tafekaꞌosaane kuasa laꞌae.

¹⁰ Dadiꞌanomo hintimiu bhe kosasawindo miendo Israel tabeano mandeꞌaaneomu putae mie aini noꞌosamo bhe neehe-ehe ne wisemiu ini, mbaꞌinomo kuasano neano Yesus Kristus, miendo Nasaret maitu. Hintimiu kantaiꞌeomu te sau salipu, tamaka Lahataꞌala nofowanue maiꞌao ne mate.

¹¹ Yesusmo ini nepulaoꞌaono Kitabi, ‘Kontu neꞌohondo mefelambuno, gahaꞌa nembalimo sandi bhalano.’ ⸤ Mefelambuno naꞌa ingka hintimiumo itu.⸥

¹² Ampamo kaowu Yesus fosalamatino, kapaꞌamo te dhunia ini we simbalino Anoa bhe naseemie miina bhe meꞌawano kuasa maiꞌaono ne Lahataꞌala so nafofosalamatiꞌao.”

¹³ Dowoha katangkano lalondo Petrus bhe Yohanes, kamungkulaꞌi Sahano Agama maitu tadomente, kapaꞌamo dopandeꞌaanda andoa maitu mie ndidiki pata kokasikolano. Gahaꞌa dopandeꞌaomo lalondo ingka andoa mie mangkafino Yesus.

¹⁴ Tamaka miina dakodiua, mbaꞌinomo dowoha mie kalu kafekaꞌosaꞌando maitu neehe-ehe ne sohihindo Petrus bhe Yohanes.

¹⁵ Pada aitu kohoduando dotududa dalumimba, maka dopugau-gau ambado,

¹⁶ “Damafaꞌiandaomu bhahaa mie andoa inia? Kosasawindo miendo Yerusalem dopandeꞌaanemo giu timenteꞌaono nehabundo, paemo natitagalia.

¹⁷ Ampamo kaowu keana sadhulu-dhulu kabhahindo mie metingkeno lele aini, naetaa daꞌumeleꞌaanda bhe dalumambada keana dofendua dosambili nea amaitu ne laꞌae maka dua.”

¹⁸ Kohoduando suli toha dofopesuada maka dopahintangida paemo sepaliꞌa naembalia dasumambili neano Yesus tawa dafofoguhu damake nea anaꞌa.

¹⁹ Tamaka Petrus bhe Yohanes tadotobhoosi ambado, “Tabhotusimoomu wutomiu bhahaꞌi nada amai metaaꞌanoa weo pomatano Lahataꞌala: tamangkafi pahintamiu bhahaꞌi tamangkafi pahintano Lahataꞌala?

²⁰ Kapaꞌamo insaodi ini pae bhe kapoolia tatumiehe tafofohatoꞌao newoha mani bhe nefetingke mani.”

²¹ Sedhuluꞌa dua kaꞌosano dolambada, tamaka panda-pandano dofolapada dua mbaꞌinomo miina daewohaa dhala so katihukumuꞌandoa. Pakade doteꞌi dua mie bhahi mudhino neano Ompu hampano dowoha kadhadhia amaitu.

²² Umuhuno mie kalu nefekaꞌosa weo kadhadhia timenteꞌaono naꞌa, nokolabhimo fato fulu taꞌu.

Mie marasaeano desalo katangkano lalo ne Lahataꞌala 4:23-31

²³ Dofolapada kaowu, Petrus bhe Yohanes dosulimo se sabhangkaꞌindo maka detula-tulaꞌao pugaundo neangkando imamu bhe kamungkulaꞌi.

²⁴ Dofetingke peda naꞌa, dosekakolalomo dofewise ne Lahataꞌala maka desalo ambado, “O Ompu, Hintumo mokonandoono lani bhe dhunia, o teꞌi bhe kosasawiꞌae iꞌindo.

²⁵ Weo kuasano Rohimu, awua mani Daud, bhatuamu, nofosampe wambamu peda aini, ‘Noafa mie tapa mandeꞌaono Ompu doꞌamahaꞌao? Noafa sabhaha bansano liwu dopugau-gauꞌao tapa kofahalaaꞌano?

²⁶ Kolakindo dhunia dokanumo dapopahisa, kafeompuꞌando dopokanagau damewangi Ompu bhe Katuduno Fosalamatino.’

²⁷ Nopokantibhamo bhe anaꞌa Herodes bhe Pontius Pilatus, mie maiꞌaono ne sabhaha bansano liwu bhe miendo Israel dohompumo ne kota ini dopugau-gau doewangi Yesus palima-limamu mongkilono, nesangkemu mbali Omputo Fosalamatino.

²⁸ Andoa ini dodhalangimo kosasawiꞌae nefotantumu mpini kabhao-bhaono hampano kuasa bhe kapoindalomu Wutomu.

²⁹ Aitu, Ompu, ondoda dolamba kainsami, waꞌa kainsami katangkano lalo tamolele bhoasaomu, insaodi bhatuamu ini.

³⁰ Fosampu kainsami kabarakatimu so daoꞌosaꞌao mie mosaki bhe fotiwoha giu timenteꞌaono bhe tanda tapa mentela weo neano Yesus palima-limamu mongkilono.”

³¹ Pada dosambahea, lambu kapohompu-hompuꞌando tanomagegomo. Kosasawindo nokabhintidamo Rohino Lahataꞌala maka notangkamo lalondo defolele bhoasaono Lahataꞌala.

Koeatendo umati kabhao-bhaono 4:32-37

³² Kosasawindo marasaeano doseꞌise, dosefekihi bhe dosekakolalo. Bhe naseemie miina bhe kumonano fehebuaꞌano so wutono kaowu, tamaka fehebuaꞌano seemie mbalimo dua fehebuaꞌando kosasawindo.

³³ O rasulu dosakusiiꞌao putae Ompu Yesus nowanumo maiꞌao ne mate. Pugaundo noponoꞌao kuasa. Kosasawindo marasaeano nobarakatida mpuu Lahataꞌala.

³⁴ Ne olotando bhe naseemie miina bhe mokaeno. Kowiteno tawa kolambuno noaso witeno tawa lambuno naꞌa,

³⁵ maka olino nowaꞌandae rasulu mbali dodawu-dawuandae umati ampa kafaraluuno seemie-seemie.

³⁶ Pedamo dua aitu Yusuf, seemie sampuꞌano Lewi nomaiꞌao we witeno Siprus; o rasulu dokonae dua Barnabas (maꞌanano nea anaꞌa Folawesino lalo).

³⁷ Anoa ini noaso witeno maka olino nowaꞌandae rasulu.