Tula-tulando rasulu 3 - Muna Southern Dialect

Petrus nefekaꞌosa mie mokalu 3:1-10

¹ Seꞌoleo Petrus bhe Yohanes dokala we Lambuno Lahataꞌala. Ne naꞌa hambi tolu mata kamaꞌoleono, wakutuunomo dosambahea.

² Ne itu nandoo seemie moꞌane nokalu mpini pakalenteno. Seꞌo-seꞌoleo doꞌoweaꞌe maka dofongkohae ne fointo bhalano kapesuaꞌa weo Lambuno Lahataꞌala, koneaꞌano Fointo Mokesa. Ne itu nesalo-salo ne mie mesuano weo Lambuno Lahataꞌala.

³ Nowoha Petrus bhe Yohanes damesua weo Lambuno Lahataꞌala, anoa nesalo-salo dua ne andoa ini.

⁴ Kohoduando dotontoe maka ambano Petrus, “Ondo kainsami.”

⁵ Mie amaitu notontoda, weo fekihino nakoniꞌawa.

⁶ Tamaka Petrus nopugau ambano, “Miina akobulawaa, miina akoperaa, ampamo kaowu ndumandooꞌano ne inodi amaꞌangkoe: weo neano Yesus Kristus, miendo Nasaret maitu, kalaꞌo toha!”

⁷ Petrus lasao nointaha limano suanano mie amaitu maka nofoehee. Aꞌeno bhe bhiku-bhikuno lasao noꞌosa.

⁸ Dadiꞌanomo nopunda ngkaehe-ehe bhe nosuli kumala, maka noangkafida weo Lambuno Lahataꞌala. Nekala-kala bhe nopokapunda-punda, nopudhi Lahataꞌala.

⁹ Kosasawindo mie dowohae nekala-kala bhe nopudhi-pudhi Lahataꞌala.

¹⁰ Andoa lasao dopandeꞌaane ingka anoamo maitu gahaꞌa mie mengkoha-ngkohano bhe mesalo-salono we Fointo Mokesa. Andoa domente bhe dotongo dowoha kumadhadhiaꞌano ne mie amaitu.

Kapedatono Petrus weo Lambuno Lahataꞌala 3:11-26

¹¹ O mie amaitu noangkafi kansuhu Petrus bhe Yohanes. Dohato we tambi bhalano nekonando Tambino Salomo, mie bhahi dosipumpumo dolibuda, kaꞌosano mentendo.

¹² Nowoha mie bhahi maitu Petrus nopugaumo ambano, “Miendo Israel, noafa menteaneomu kadhadhia aini? Noafa ondo-ondo kainsamiomu, kao-kaomo mie aini kapooliꞌano nokala mbaꞌinomo insaodi ini mie kokuasano tawa mie lumebe?

¹³ Lahataꞌalano Abraham, Ishak bhe Yakub, Lahataꞌalando awuaꞌintoomu nofekakalabhiamo Yesus palima-limano. Yesus ini owaeꞌomu ne kolakino liwu, tamaka mahinggamo Pilatus nokopatudhu namolapae, hintimiu mongaheꞌieꞌomu.

¹⁴ Anoa mie mongkilo bhe melaano lalo, tamaka hintimiu mongaheꞌieꞌomu maka mesaloomu ne Pilatus namolapaangkoomu mie kapongko-pongkono.

¹⁵ Anoamo fowaꞌaono dadi, gahaꞌa pongkoemoomu. Tamaka Lahataꞌala nofowanue nomaiꞌao ne mate. Insaodimo ini mohaꞌaono wuntano mata mani kadhadhia anaꞌa.

¹⁶ Aitu wohaeꞌomu kadhadhia ne kalu aini. Anoa noꞌosamo hampano kaparasaea weo neano Yesus. Kaparasaeano ne neano Yesus mekaꞌosano mie nepandeꞌaomiu ini. Ingka wohaeꞌomu kosasawimiu.

¹⁷ Bhahitieꞌiku, apandeꞌaane kahabuꞌamiu peda aitu hampano miina mandeꞌaaneomua, nopototo bhe kosasawindo neangkamiu.

¹⁸ Ampamo kaowu pedamo anaꞌa Lahataꞌala nofekakoꞌula nekobhoasaꞌaono endefiꞌini. Bhoasaono naꞌa nofosampeandae ana-anabii, putae Mesias Omputo Fosalamatino maitu tetewei nakumadee-dee.

¹⁹ Dadiꞌanomo dolimoomu ne Lahataꞌala, fetompaanemoomu dhosamiu, neanomo dhosamiu namekanggelaꞌiemo.

²⁰ Ane nada naꞌa, Ompu namaꞌangkomoomu dua kalalesano lalo, maka natumuduangkoomu Yesus toka nefontaa-ntaaꞌaono mpini kabhao-bhaono so Omputo Mosalamatikoomu.

²¹ Anoa maitu tetewei naeate te surugaa ampa oleono so katipahabuꞌouniꞌano bhahi-bhahiꞌae, peda nekobhoasaꞌaono Lahataꞌala nefosampendo ana-anabii mongkilono ne dhamani wawono.

²² Ingka anabii Musa nokowambaanemo wawo, ‘Ompu Lahataꞌalamiu naefoeheangkoomu seemie anabii namaiꞌao ne bhahitiemiu napototo bhe idi. Fetingkeeꞌomu sabhaha so nepugauꞌaono ne hintimiu.

²³ Kotika mie tapa metingkeno anabii aitu, damogampida maiꞌao ne umatino Lahataꞌala maka damekasunida.’

²⁴ Kosasawindo anabii mosampeno bhoasaono Lahataꞌala, notanda ne anabii Samuel ampa ana-anabii mbuhumaino, dokowambaanemo wawo so kumadhadhiaꞌano dhamani aini.

²⁵ Wambado ana-anabii naꞌa mbalimo kahunsaꞌao so hintimiu. Hintimiumo meꞌawano dawua weo podhandiꞌano Lahataꞌala bhe awuaꞌintoomu. Wakutuu anaꞌa Lahataꞌala nokowamba ne Abraham ambano, ‘Namaiꞌao ne sampuꞌamu, sabhaha bansano liwu te dhunia ini daeꞌawa kabarakati.’

²⁶ Dadiꞌanomo Lahataꞌala nofoehemo palima-limano, maka notudue wawo ne hintimiu neowaangkoomu kabarakati. Kabarakati anaꞌa, maꞌanano Anoamo so matokoomu metompaꞌaoꞌomu sabhaha podiu modaimiu seemie-seemie.”