Tula-tulando rasulu 28 - Muna Southern Dialect

Paulus we liwutono Malta 28:1-10

¹ Tasalamati kaowu te kaꞌotiꞌa, tapandeꞌaanemo gahaꞌa liwuto anaꞌa dokonae liwutono Malta.

² Miendo liwuto aitu netaaꞌi sepaliꞌa lalondo ne insaodi. Andoa detampomo efi maka dosaliꞌi kainsami taehana hampano nokoꞌuse bhe nohindi.

³ Paulus netawunaomo dua haꞌaꞌino sau maka notawue, gahaꞌa tanosibholamo seꞌulu ule kobisa mbaꞌinomo nohatoe kasodo. Ule amaitu lasao nosia limano.

⁴ Miendo liwu mohano ule nekantai ne limano Paulus, dopugau sapada-pada andoa ambado, “O mie aini tantumo mie kumapongko-pongkono, mahingga nosalamatimo we teꞌi, tamaka dewa Bhoosiꞌaono habu modai pae namolapae nadumadia.”

⁵ Tamaka Paulus nokambesi ule maitu weo efi maka anoa miina nakaafa-afaa.

⁶ Kunaꞌendomo naoweo, bhahaꞌi tambaꞌomo natiwata komate-mateno. Tamaka nompona dofeꞌo-feꞌondoe, ingka gahaꞌa miina naoafaanea, nobhansulemo fekihindo. Ambado Paulus maitu seemie kokalabhiano peda dewa.

⁷ Ne owando naꞌa nandoo wite fehebuaꞌano mowano liwuto aitu, neano Publius. Anoa notahima metaa kainsami tabutu we lambuno bhe noꞌondofa kainsami sampe tolu oleo.

⁸ Ne naꞌa amano Publius nendole-ndoleꞌao saki. Sakino nosodoe bhe nedeaꞌao hea. Paulus nopesuaki bolokuno, nosambaheaꞌane poowa notei limano te wawono maka nofekaꞌosae.

⁹ Pada kadhadhia anaꞌa domaimo dua mie mosaki sigaoꞌano ne liwuto aitu maka andoa nofekaꞌosada dua.

¹⁰ Nobhahi kawaꞌaondo mbaꞌinomo dofosibhala kainsami, pakade hato tabhose, dowaꞌa kainsami sabhaha nefaraluu mani we sala.

Paulus nohatomo we kotano Roma 28:11-16

¹¹ Nokapo tolu wula tahunsamo liwuto aitu tasawi ne bhangka bhalano maiꞌaono we kotano Aleksandria. Kosekawantaꞌae wulano bhaha bhangka anaꞌa nolabu ne liwuto aitu. Katandaino bhangka aitu nepake gambarano dewa Lopo (Kastor bhe Poluks).

¹² Insaodi taangka kotano Sirakusa, ne itu talabu tolu oleo.

¹³ Tamaiꞌao ne itu tasoha-sohakimo kaꞌotiꞌa, ampa we kotano Regium. Nomentae nofindamo kaweano salata maka nopooli neefua tahatomo we kotano Putioli.

¹⁴ Ne itu tapoꞌawa-awamo bhe seemie hodua umati marasaeano ne Yesus. Hampano dosaliꞌi kainsami, taeate-atemo bhe andoa ampa fitu oleo. Pada anaꞌa tapansuhumo we kotano Roma.

¹⁵ Bhahitie marasaeano we watu dofetingkemo bhihita mani sampe domai dosumpui kainsami we Daoano Apius bhe Kabutuꞌa Tolu Onuno. Nowoha kaowu andoa, Paulus nefoampemo katumpuno lalo ne Lahataꞌala bhe notangkamo lalono.

¹⁶ Sahato mani we Roma, Paulus doꞌundaꞌaane naeate nomoisa ne lambu kabutuꞌano bhe seemie tantara dhumaganie.

Paulus nopuga-pugau bhe miendo Yahudi we Roma 28:17-31

¹⁷ Nopooli tolu oleo we Roma, Paulus nosaliꞌimo neangkaꞌindo miendo Yahudi ne itu. Dohompu kaowu nopugaumo ambano, “Bhahitieꞌiku, idi ini miina akokaꞌalaa naetaa ne saliwuntoomu naetaa ne adhatindo kamungkulaꞌintoomu, tamaka dohako kanau we Yerusalem, maka doowa kanau ne limando miendo Roma.

¹⁸ Pada dofee-feena kanau, patudhundo damolapa kanaumo, hampano miina sepaliꞌa bhe kaꞌalakua mantasiꞌano so katipongkoꞌaku.

¹⁹ Tamaka miendo Yahudi doewa kansuhu, dadiꞌanomo kao-kaomo dofusuhu kanau aꞌende ne Omputo Kaisar. Ampamo kaowu miina akopatudhu asumungkuꞌao saliwuku.

²⁰ Katisaliꞌiꞌamiumo apoindalo apoꞌawa bhe apuga-pugau bhe hintimiu, kapaꞌamo katihanteꞌaku ini hampano Omputo Fosalamatino nentaa-ntaando miendo Israel.”

²¹ Tamaka tadotobhoosi ambado, “Ingka miina taeꞌawa suha maiꞌaono we Yudea metula-tulaꞌaono hintu ini, miina dua bhe mie humatono sumambili modaiko.

²² Ampamo kaowu tapoindalo tametingke ne wutomu peda ae fekihimu itu, kapaꞌamo tapandeꞌaane kafoguhu aini dobansie ne amai onuno liwu.”

²³ Pada anaꞌa detempomo so dapoꞌawa-awaꞌao. Nohato tempono dobhahi sepaliꞌa maino we kabutuꞌano. Paulus nofohatoanda bhe notalesaandamo peda amai Kafopahintaꞌano Lahataꞌala notanda ne Kitabino Musa bhe Kitabindo ana-anabii. Anoa noꞌule-uleiꞌe lalono so damarasaeaꞌao ne Yesus, notanda hangkowine ampa nohondo oleo.

²⁴ Nandoo marasaeano ne pugauno, tamaka nandoo dua tapa marasaeano.

²⁵ Tadopogaa-gaamo miina naseꞌise fekihindoa. Tamaka Paulus nandoo dua nofohatoda peda ini, “Nokotuꞌumo daanumo bhoasaono Rohino Lahataꞌala ne awuaꞌintoomu nefosampeno anabii Yesaya,

²⁶ ⸤ Ambano Lahataꞌala ne Yesaya,⸥ ‘Kalamo ne liwu aini maka fohatoda, ‘Hintimiu safeti-fetingke, tamaka pae melosangiomua, sawoha-woha tamaka pae konipandeꞌaoꞌomua.

²⁷ Kapaꞌamo totono lalondo mie andoa ini nofekontumo, tingalando nopoꞌopimo, matando nopilomo. Kanandooꞌano peda anaꞌa keana dofowohaꞌao matando, keana dofofetingkeꞌao tingalando, keana dua delosangiꞌao totono lalondo keana dodoli ne Idi amekaꞌosada.’ ’

²⁸ Dadiꞌanomo tabeano mandeꞌaaneomu putae kasalamati maiꞌaono ne Lahataꞌala ini damohatoandae bansano liwu sigaoꞌano suano Yahudi maka andoamo so metingkee.”

²⁹ [Sapadano nopugau peda naꞌa miendo Yahudi dosulimo bhe dopotaga-tagali sapada-pada andoa.]

³⁰ Paulus neate ne lambu kasewaꞌano haa taꞌu kaomponanoa. Sabhaha mie humatoe notahimada ne itu.

³¹ Mentalea-mentalea nokado nefolele bhihita Kafopahintaꞌano Lahataꞌala bhe nofofoguhuꞌao kafoinaꞌuno Ompu Yesus Kristus, miina bhe umonto-ontomiea