Tula-tulando rasulu 27 - Muna Southern Dialect

Paulus nokala we kotano Roma 27:1-13

¹ Pada kaowu dobhotusie takumala we witeno Italia, Paulus bhe seemie hodua katohongku sigaoꞌano doowadamo ne limano seemie neangkando tantara koneaꞌano Yulius. Kaseꞌiseno tantara nepandeꞌaono dokonae “Taguano Kaisar”.

² Tasawimo ne kapala maiꞌaono we kotano Adramitium. Bhangka aini namangkai kota-kota kalabuꞌano bhangka ne kadieno Asia. Aristarkus miendo Makedonia maiꞌaono we kotano Tesalonika nopobhai kainsami dua.

³ Nomentae taangkamo we kotano Sidon. Yulius nomalu sepaliꞌa lalono ne Paulus, sampe noꞌundaꞌaane nakumala namangkai sabhangkaꞌino neanomo naembali damaꞌane nefaraluuno.

⁴ Tamaiꞌao ne itu tahela tasohaki witeno Siprus, tafeo-feolu humanda napa, mbaꞌinomo nosumpu kainsami kawea.

⁵ Pada talimbaki teꞌi we potalaꞌano kadieno Kilikia bhe Pamfilia tahatomo we kotano Mira, ne kadieno Likia.

⁶ Ne itu tantara neangkafi mani maitu neꞌawamo kapala maiꞌaono we kotano Aleksandria nakumala we witeno Italia. Dadiꞌanomo nofosawi kainsamimo ne kapala anaꞌa.

⁷ Haa oleo tolu oleomo tahelaa, tamaka nokomaꞌo pae tadhumulua, tatakampo-kampoolimo tamaꞌoti kotano Knidus. Mbaꞌinomo sadaa-daa taesumpu kawea, tafodolimo hope mani humanda salata tasohaki kaꞌotiꞌano witeno Kreta, taangkai kaudhuno Salmone.

⁸ Nopalusi takampo-kampooli kaudhu aitu, tahatomo ne seꞌonu kalabuꞌano bhangka nekonando Kalabuꞌa Mokesa, ne owano kotano Lasea.

⁹ Tataepadamo wakutuu we sala, tadua nolalomo oleono poasaꞌando Yahudi, maka ane tamansuhu kao-kaomo nakobalaamo. Dadiꞌanomo Paulus nofodhagadamo ambano,

¹⁰ “Bhahitieꞌiku, afesuhuiꞌe kala-kalantoomu inia nakobalaa, daeꞌawaane kahugi bhala, suano kaowu taꞌo bhangka bhe uleano tamaka bhe inawantoomu dua.”

¹¹ Tamaka neangkando tantara naꞌa nandoo noparasaea meintahano uli bhe dhuraga, bhe pugauno Paulus naꞌa.

¹² Mbaꞌinomo kalabuꞌa aitu miina naetaaꞌa dolabuane weo wulano bhaha, maka kapoindaloꞌando mie bhahi dahumelamo kansuhu dakumampo-kampooli ampa dahumato kotano Feniks, patudhundo weo wulano bhaha dalumabu ne naꞌa. Feniks naꞌa seꞌonu kota kalabuꞌano bhangka ne witeno Kreta, nofewise humanda bhaha somba bhe bhaha molanga.

¹³ Ne naꞌa kawea mbihi-mbihi nofinda salata, weo fekihindo teteweimo patudhundo maitu nasumampe. Dadiꞌanomo dohelamo labu maka tahela tasohaki sepaliꞌa kaꞌotiꞌano witeno Kreta.

Bhangka kasawiꞌano Paulus notokuhu 27:14-44

¹⁴ Miinaꞌo naomponaa tahelaa, tambaꞌomo nofinda gahuha nomaiꞌao te wite dokonae kaweano Wangkapopo.

¹⁵ Bhangka mani netaa nohambi-hambitaane ewo pakade miina namewaa taesumpuane kaweaꞌa. Dadiꞌanomo tataekatahomo, bhangka mani tanewalo-walolemo, nomaampemo.

¹⁶ Tahato ne owano seꞌonu liwuto koneaꞌano Kauda, kaneꞌomo tafeolu seendai. Ne itu takampo-kampoolimo tahela katondano bhangka mani.

¹⁷ Pada dofofoni katonda naꞌa te wawono bhangka, o bhangka dogogantuemo, dowaweꞌiane habuta, patudhundo keana nobhongka. Mbaꞌinomo doteꞌi bhahaa dotisohe ne dolangono Sirtis, dofosampumo pangaowa, sampe o bhangka dokatahoe tanelanto-lantomo.

¹⁸ Kaꞌosano nohambi-hambita kainsami gahuha naꞌa sampe nomentae uleano bhangka taꞌohofiemo weo teꞌi.

¹⁹ Nopooli tolu oleo, katokano bhangka doꞌohofie wutondo sawino bhangka.

²⁰ Nomampona-mponamo miina taohaa oleo bhahaꞌi o kulipopo, o gahuha noansohaꞌi kainsami kansuhu. Panda-pandano nobhotumo posahunaꞌao mani, ingka paemo tasumalamatia.

²¹ Nompona kaowu miina daomaa, noehemo Paulus ne wunta-wuntando maka nopugau ambano, “Bhahitieꞌiku, ane damangkafi katangahiku pae dahumelaomu damaiꞌao we witeno Kreta endefiꞌini, teteweimo pae daꞌumawaeꞌomua kakadee-dee bhe kahugi aini!

²² Aitu amohatokoomu, fekatangka lalomiu, kapaꞌamo ne olotantoomu ini pae bhe so binasanoa, ampamo kaowu bhangka ini.

²³ Kapugauꞌaku peda aini, mbaꞌinomo mohondo nomaiꞌi kanau malaꞌekatino Lahataꞌala nesombaiku, Lahataꞌalamo ini kohaku kanau. Malaꞌekati naꞌa neehe-ehe ne sohihiku maka nopugau ambano,

²⁴ ‘Paulus, koe moteꞌia, tetewei powise bhe Omputo Kaisar. Hampano rahamatino Lahataꞌala kosasawindo mie owaꞌamu weo bhangka ini dasumalamati, mbaꞌinomo bhe hintu.’

²⁵ Dadiꞌanomo bhahitieꞌiku, fekatangka lalomiu. O idi aparasaea ne Lahataꞌala kosasawiꞌae nakumadhadhia peda nefohatoꞌaono ne idi.

²⁶ Tamaka tetewei datisoheomu ne seꞌonu liwuto.”

²⁷ Nopoolimo ompuluꞌa efato nandoo kainsami taelanto-lanto we teꞌino Adria. Gahaꞌa nofewuntaꞌi alo dokiha-kihae sawino bhangka nomaꞌomo kaꞌotiꞌa.

²⁸ Dadiꞌanomo dekatapumo kontu ne habuta maka dosuka kandalono teꞌi, gahaꞌa tahaa fulu hofa kandalono. Miina nakodoꞌo tadhulu dofenduamo toha desuka, gahaꞌa taompulu lima hofa.

²⁹ Mbaꞌinomo doteꞌi bhahaa tatokuhu ne pasi deꞌohomo labu fato mata we wana, maka gao mani napikimentaemo.

³⁰ Tamaka sawino bhangka dokopatudhu damilei. Defosampumo katonda woha-wohaemo daeꞌoho labu te hope.

³¹ Gahaꞌa Paulus nopugaumo ne meangkando tantara bhe tantara sigaoꞌano ambano, “Ane paemo bhe andoa maitu weo bhangka, pae sumalamatiomua.”

³² O tantaraꞌi naꞌa lasao dotota habutano katonda maka dofomaampee.

³³ Nomaꞌo kamentae kosasawindo mie weo bhangka maitu nosaliꞌidamo Paulus daomaa. Ambano, “Ompuluꞌa efatomo tasantohamo, metaangiomu kaꞌaho, miina sepaliꞌa momaaꞌomua.

³⁴ Dadiꞌanomo aesalo mpuu humaaꞌomu kadeki, nofaraluu so sumalamatiꞌaoꞌomu. Kosasawimiu itu bhemo nasetangke wuluno fotumiu pae bhe so miinaeꞌanoa.”

³⁵ Pada nopugau peda naꞌa, Paulus nealamo roti, nefoampe katumpuno lalo ne Lahataꞌala ne wisendo kosasawindo maitu. Roti anaꞌa nobhebhehaemo maka nohumaa.

³⁶ Kosasawindo notangkamo lalondo lasao dohumaa dua bhe andoa.

³⁷ Kabhahi mani weo bhangka naꞌa tahaa moꞌono fitu fulu nonoo.

³⁸ Taoweꞌi kaowu o gandum uleano bhangka doꞌohofiemo weo teꞌi so nosapeꞌao.

³⁹ Hato nomentae sawino bhangka dowohamo wite, tamaka miina damandeꞌaane bhahaꞌi witeno ae. Mpahinomo dowoha kolowa nopotate napano. Dadiꞌanomo patudhundo o bhangka dakumampo-kampoolie damotisoheemo ne naꞌa.

⁴⁰ Kosasawiꞌae habutano labu dototae maka dofosipulie weo teꞌi. Pada anaꞌa dolensemo habuta katapuno uli maka dofosampue. Dofoampemo dua pangaowa kapabelo neanomo nabusohaꞌiane kawea namohopee te napa.

⁴¹ Gahaꞌa delumpakimo bungino bhone, sampe bhangka mani notisohemo. Hopeno noꞌonta weo bhone bhe nakodiua miina, wanano nohansuru nohambitaꞌiane ewo.

⁴² Wakutuu anaꞌa tantaraꞌi dokopatudhu damongko mie netaangi maitu keana doleni maka dofilei.

⁴³ Tamaka neangkando tantara gaono namosalamati Paulus. Dadiꞌanomo noꞌeleꞌaandamo. Notudumo mandeno lumenino damaꞌindulumo damunda we teꞌi maka damoni te wite.

⁴⁴ Tapa mandeno lumenino notududamo damangka kundo daminta-mintaha ne dopi tawa ne kawengkano bhangka. Pedamo anaꞌa kosasawi mani tasalamatimo te wite.