Tula-tulando rasulu 25 - Muna Southern Dialect

Paulus noꞌende ne Omputo Kaisar 25:1-12

¹ Nopooli tolu oleo nohato ne kadie neowano naꞌa, gubernur Festus nohunsamo kotano Kaisarea nokala we Yerusalem.

² Ne itu neangkaꞌindo imamu bhe kamungkulaꞌindo Yahudi dokalamo dopoꞌawaane patudhundo dasumungkuꞌao Paulus.

³ Andoa desalo kataano lalono Festus ane naembali dawowoꞌo Paulus we Yerusalem. Andoa padamo dopokanagau damongko Paulus we laano sala.

⁴ Tamaka Festus notobhoosi ambano, “Paulus sadaa-daa dotaangie we kotano Kaisarea, pakade idi apikisuli dua we watu.

⁵ Dadiꞌanomo neangkando kamu-kamungkulaꞌi ne olotamiu itu tapoowa-owa takumala we Kaisarea maka mobhieꞌaneomu ane bhe kaꞌalanoa.”

⁶ Festus neate-ate we Yerusalem alu oleo ampa ompuluꞌa maka nosuli we Kaisarea. Hato nomentae, nefokonandoomo hompuꞌa dabhitahaki Paulus. Paulus nofotuduꞌaanemo.

⁷ Sahatono kosasawindo miendo Yahudi maiꞌaono we Yerusalem doehemo dolibu-libue, maka dosangkatiane sabhaha kaꞌala mobhie. Ampamo kaowu miina damooliea dofotiwoha bukutiino.

⁸ Tamaka Paulus nopotunduꞌaomo wutono ambano, “Idi bhe naseendai miina akokaꞌalaa, mahingga ne tubhono agama Yahudi, mahingga ne Lambuno Lahataꞌala tawa ne Omputo Kaisar, miina dua.”

⁹ Gahaꞌa Festus nokopatudhu naeala-ala lalo ne miendo Yahudi maka nopugau ne Paulus ambano, “Umunda bhahaa kumala we Yerusalem, dabhitahakiko we watu ne wiseku?”

¹⁰ Notobhoosimo Paulus ambano, “Idi aeehe-ehemo ne wiseno kaebhotusiꞌano Omputo Kaisar, dadiꞌanomo tabeano ne iniꞌaemo so katibhotusiꞌano parakaraku ini. O hintu pandeꞌaane sepaliꞌa, bhe naseendai miina akokaꞌala ne miendo Yahudi.

¹¹ Ane kotu-kotuꞌu akokaꞌala, aehabu modaiꞌano so mantasiꞌano damongko kanau, ahelasimo amate. Tamaka ane pae nakotuꞌu nesangkatiꞌaondo naꞌa, bhe naseemie miina bhe kohakunoa dakumataho kanau ne miendo Yahudi ini. Parakaraku ini aꞌumendeane ne Omputo Kaisar.”

¹² Pada nopofee-feena bhe kamungkulaꞌi humompuno, Festus nopugaumo ambano, “Hintu padamo mesalo umende ne Omputo Kaisar, dadiꞌanomo tetewei kumala powise bhe Omputo Kaisar.”

Paulus ne wiseno Agripa bhe Bernike 25:13-27

¹³ Miina naomponaa nohatomo dua kolaki Agripa bhe Bernike we Kaisarea dapointaha lima bhe gubernur Festus.

¹⁴ Nomampona-mpona kaowu deate ne itu, Festus notalesaanda parakarano Paulus. Ambano, “Ne ini nandoo seemie netaangi, nehunsano gubernur Feliks.

¹⁵ Nandoo kanau we Yerusalem itu, neangkaꞌindo imamu bhe kamungkulaꞌindo Yahudi domai dosungkuane ne idi, andoa desalo abhotusie damongkoe.

¹⁶ Taꞌatobhoosida, ingka suano kaneandoa miendo Roma tadaebhotusimo seemie nebhieꞌao kabeanga kawaꞌao ne mie sumungkuane. O mie nebhieꞌao tabeano dopowiseanda bhe mie mobhieꞌaane, pakade dowaꞌane kasalawa natumunduꞌao wutono.

¹⁷ Dadiꞌanomo andoa ini doangkafi kanaumo we ini. Hato nomentae lasao aefokonandoo hompuꞌa tabhitahakie maka mie anaꞌa afotuduꞌaane.

¹⁸ Kunaꞌekumo nandoo bhe habu modaino, tamaka hato doehe mobhieꞌane, ingka gahaꞌa bhe nasehonda miina bhe nesungkuꞌaondo.

¹⁹ Ampamo kaowu doposala-salamaꞌanaꞌao agamando. Dopotagaliꞌao seemie koneaꞌano Yesus nomatemo, tamaka ambano Paulus mie amaitu suli nodadi.

²⁰ Hampano noꞌaliane laloku nada amai amotindae parakara aini, afeenaemo bhahaꞌi naꞌumunda takumala dabhitahakie we Yerusalem.

²¹ Tamaka Paulus tanoꞌende ne Omputo Kaisar. Nesalo hunsaꞌaonomo datumaangie kansuhu bhe namantagi sampe parakarano nabhotusie Kaisar. Dadiꞌanomo atududamo datumaangie kansuhu sampe asalawa amakatue we Kaisar.”

²² Nopugaumo kolaki Agripa ne Festus, “Gaoku ametingkeꞌao dua wutoku.” Ambano Festus, “Naewine naembali metingkeea.”

²³ Hato nomentae domaimo Agripa bhe Bernike dofotiwoha kakalabhiando peda kolaki. Andoa dopesua weo lambu kafobhitahakiꞌa dopoowa-owa bhe neangkaꞌindo tantara bhe kamungkulaꞌino liwu aitu. Dohato kaowu, Festus nofotuduꞌaomo Paulus.

²⁴ Ambano Festus, “Kolaki Agripa bhe kosasawintoomu ini! Ondo kaitaomu, miemo aini nesungkuꞌaondo kosasawindo miendo Yahudi, naetaa meateno we Yerusalem naetaa meateno ne ini. Andoa domaiꞌi kanau bhe dopokakei-kei ambado mie aini paemo naembali nadumadi.

²⁵ Tamaka ingka miina aeꞌawa kaꞌala so namantasiꞌao damongkoe. Mbaꞌinomo nesalo naꞌumende ne Omputo Kaisar, abhotusiemo amakatue we Kaisar.

²⁶ Ampamo kaowu miinaꞌo bhe tingku motangka so abuhi weo suhaku so Kaisar. Katiowaꞌanomo ne wisentoomu ini, patudhuku mpuu ne wiseno kolaki Agripa, neanomo mada damotindae nandumandoomo tingku so nebuhiku.

²⁷ Kapaꞌamo afekihie pae namantasi daepakatu seemie titaangino ane pae bhe kasangkati nesungkuꞌao.”