Tula-tulando rasulu 24 - Muna Southern Dialect

Paulus dosungkuane miendo Yahudi ne gubernur Feliks 24:1-23

¹ Nopooli neelima Imamu Bhalano koneaꞌano Ananias bhe kamungkulaꞌindo miendo Yahudi dohatomo we Kaisarea dopoowa-owa bhe seemie pande parakara koneaꞌano Tertulus. Andoa ini dosungkuꞌao Paulus ne wiseno gubernur.

² Paulus dosaliꞌiemo dua. Sahatono, Tertulus lasao nosungkuane. Nopugaumo ambano, “Gubernur Feliks nefosibhala mani, kaomponano owa kainsami ini notohopo ngkoha-ngkoha mani. Hampano kataano timbangimu nobhahimo sepaliꞌa nefekataaꞌia so kaetaaꞌano liwu mani ini.

³ Kosasawiꞌae maitu, ne amai maka dua sadhia tatahima metaaꞌe bhe notumpuane lalo mani.

⁴ Tamaka koemo afekawanta-wantaea, ampamo kaowu weo kataano lalomu tiende-endeno itu aesalo dametingke kainsami sebantaha.

⁵ Nentaleamo sepaliꞌa ne insaodi, mie aini tapedamo hopu. Ne amai onuno liwu te dhunia ini, nehabu kahunggando miendo Yahudi. Anoa ini seemie neangkando miendo sarani, kaseꞌise umalano.

⁶ Pakade nesoba-soba nopokahakuꞌao Lambuno Lahataꞌala. [Dadiꞌanomo tahakoe patudhu mani tabhitahakie tamangkafi tubhono agama mani.

⁷ Gahaꞌa nohatomo panglima Lisias noꞌonta kainsami maka noagoi Paulus ne lima mani.

⁸ Pada anaꞌa humereno notududa dasumungku ne hintu.] Tafee-feenamo mie aini, tetewei mandeꞌaanemo putae nesungkuꞌao mani ini nokotuꞌu.”

⁹ Miendo Yahudi sabhangkaꞌino doangkafimo dua dosungkuꞌao Paulus dofekakotuꞌu kosasawiꞌae nepugauꞌaono Tertulus.

¹⁰ Palusi aitu, gubernur nowaꞌao Paulus seꞌise tanda notudue namugau. Nopugaumo Paulus ambano, “Apandeꞌaanemo netaꞌu-taꞌunomo membali bhitahakino liwu ainia. Dadiꞌanomo miina akamihi-mihia, atumunduꞌao wutoku ne wisemu.

¹¹ Naembali damee-meena, kaneꞌo we ompulu haa oleono itu ahato we Yerusalem, patudhuku asumambahea.

¹² Bhe naseemie miina bhe moha kanau apotagali bhahaꞌi aehabu kahungga, mahingga weo Lambuno Lahataꞌala, mahingga weo lambu-lambu kasambaheaꞌa tawa ne amai maka dua, miina.

¹³ Pakade kosasawiꞌae nesungkuꞌaondo pae damoolie damotiwohaangko bukutiinoa.

¹⁴ Daanumo paise agumagaiꞌea ne wisemu, idi ini aparasaea ne Lahataꞌalando awua mani aangkafi kaangkaꞌano Yesus, tamaka ambado andoa ini kafoinaꞌu umala. Tamaka daa-daaꞌe dua aparasaea ne kosasawiꞌae kafoguhu tibuhiꞌano weo Kitabino Musa bhe Kitabindo ana-anabii.

¹⁵ Pedamo dua andoa ini, o idi aposahunaꞌao ne Lahataꞌala putae kosasawindo mie mate sumuli dadumadi, namie metaa, namie modai!

¹⁶ Dadiꞌanomo weo dadiku sadhia aꞌulei laloku ampuu-mpuuni kangkilono totono laloku ne pomatano Lahataꞌala bhe mie bhaiku.

¹⁷ Ntini taꞌu-taꞌumo akala, maka asuli toha we Yerusalem aewowoꞌo sadhakaa so saliwuku, bhe kapopanga so Lahataꞌala.

¹⁸ Tangasano ahabu kosasawiꞌae maitu weo Lambuno Lahataꞌala, dohatofi kanaumo miendo Yahudi maiꞌaono we Asia. Idi kaneꞌo pada afekanggela wutoku, miina bhe mie bhahi pobhai kanau, pakade miina bhe kahobhoa.

¹⁹ Ingka tabeano andoa naꞌa so sumungkuno ne hintu ane nandoo bhe so nehereꞌaondo.

²⁰ Tamaka hunsaꞌaonomo andoa humatono ini daobhie kanaumo aitua, bhahaꞌi habu modai medano ae neꞌawando, wakutuuno dobhitahaki kanau Sahano Agama.

²¹ Ampamo kaowu bheanea pugauku sehondano nefolimbaku te wisendo andoa wakutuu anaꞌa. Ambaku peda aini, ‘Katibhitahakiꞌaku ne ini, mbaꞌinomo aposahunaꞌao mie mate sumuli dadumadi.’ ”

²² Tamaka gubernur Feliks mengkanaꞌaono sepaliꞌa kaangkaꞌano Ompu Yesus, nofotiehemo pobhita-bhitahakindo maitu. Ambano, “Nahumato kaowu panglima Lisias ne ini, abhotusiemo nesungkuꞌaomiu itu.”

²³ Pada anaꞌa notudumo neangkando tantara datumaangi kansuhu Paulus, tamaka damolalesaemo seendai, pakade daꞌumundaꞌaanda sabhangkaꞌino ane damai daeowaane kafaraluuno.

Paulus ne wiseno Feliks bhe Drusila 24:24-27

²⁴ Nopooli haa oleo tolu oleo Feliks nohatomo bhe hobhineno koneaꞌano Drusila, anoa ini miendo Yahudi. Anoa nofotuduꞌaomo Paulus, nametingkeꞌao bhihitano kaparasaeano ne Yesus Kristus.

²⁵ Tamaka hato Paulus nopugauꞌao dadi banara, damewanaki totono lalo bhe kabhotusi nahumato Oleono Kiama, gubernur Feliks noteꞌimo. Nopugaumo ambano, “Netaamo, kalamo kadeki. Ane bhe kasalawa metaa madaꞌo toha asumaliꞌiko.”

²⁶ Gaonoa Paulus namaꞌane dhoi, dadiꞌanomo nentuhu nosaliꞌie dapotula-tula.

²⁷ Tamaka nopalusi haa taꞌu, gubernur Feliks nobhoosiemo Perkius Festus. Tamaka mbaꞌinomo Feliks namala-ala lalondo miendo Yahudi, Paulus sadaa-daaꞌe notaangie weo katohongku.