Tula-tulando rasulu 23 - Muna Southern Dialect

¹ Paulus notonto Sahano Agama maitu maka nopugau ambano, “Bhahitieꞌiku, weo dadiku ampa seꞌoleo itu totono laloku nandoo nongkilo ne wiseno Lahataꞌala.”

² Tamaka Imamu Bhalano koneaꞌano Ananias notudu meehe-eheno ne owano Paulus dabhantofa wobhano.

³ Paulus tanotobhoosi ambano, “Lahataꞌala so bhantofakoa, hintu itu mie mehaaꞌulano, woha-wohaꞌamu mie mongkilo, tapedamo kahondomi dobuhaane efi! Hintu itu mengkoha-ngkoha ne ini kopatudhu bhitahaki kanau mangkafi tubhono agama, gahaꞌaitu kangkalaꞌimo tubhono agama mbaꞌinomo fotudu dabhantofa kanau.”

⁴ O mie humatono ne itu dopugaumo ambado, “Ingka hintu ini feꞌawuti Imamu Bhalano, nesangkeno Lahataꞌala!”

⁵ Ambano Paulus, “Tabea, miina amandeꞌaanea anoa itu Imamu Bhalano. Ingka notibuhi, ‘Koise pugau molea ne mie neangkando liwu!’ ”

⁶ Paulus nopandeꞌaane mie humatono maitu sigaꞌa miendo Saduki, sigaꞌa miendo Farisi. Dadiꞌanomo nopugaumo nofekabhala-bhalaꞌie ne wisendo Sahano Agama ambano, “Bhahitieꞌiku, idi ini o Farisi, sampuꞌando miendo Farisi, katibhitahakiꞌaku ne ini, mbaꞌinomo aposahunaꞌao mie mate sumuli dadumadi.”

⁷ Dofetingke nopugau peda maitu dopotaga-tagalimo miendo Farisi bhe miendo Saduki, sampe mie bhahi maitu dopoꞌea, dewalamo.

⁸ Kapaꞌamo ambado miendo Saduki, miina bhe kawanuꞌando mie mate, miina dua bhe malaꞌekati tawa o rohi, tamaka miendo Farisi doparasaea kosasawiꞌae naꞌa sanea nonandoo.

⁹ Hompuꞌa anaꞌa sadhulu-dhulu kahobho. Pande-pande Kitabi maiꞌaono ne miendo Farisi doehemo maka dopotagali ambado, “Mie anoa ini miina sepaliꞌa nakokaꞌalaa! Kao-kaomo nandoo bhe rohi tawa malaꞌekati mugauno ne anoa.”

¹⁰ Nodhulu kaꞌosa kapowengkendo sampe panglima noteꞌimo bhahasaa dogogawi Paulus. Dadiꞌanomo netudumo tantara dasumampu daꞌumuleiꞌe maka dasumuliane te bente.

¹¹ Nohondo oleo Ompu neehe-ehemo ne sohihino Paulus ambano, “Fekatangka lalomu, ingka padamo sakusii kanau ne Yerusalem ini. Mada kaowu sumakusii kanau dua nada aitu we kotano Roma.”

Miendo Yahudi dopokanagau damongko Paulus 23:12-22

¹² Nomentae miendo Yahudi dopokanagau bhe dofemata paise daomaa daohoꞌua ane paeꞌo damongko Paulus.

¹³ Kabhahindo pokanagauno naꞌa dokolabhi dofato fulu.

¹⁴ Andoa dokalaꞌi neangkaꞌindo imamu bhe kamungkulaꞌindo Yahudi bhe dopugau ambado, “Insaodi padamo tafemata paise taomaa taohoꞌua ane paeꞌo tamongko Paulus.

¹⁵ Dadiꞌanomo hintimiu bhe Sahano Agama mesalo kaitaomu ne panglima namowaangkoomu toha Paulus, woha-wohaemo sumuli toha mee-meenaeꞌomu mekatinda-tindaeꞌomu. Insaodi notokamo kakanu mani, pae nahumatoa we ini, tamongkoemo we laano sala.”

¹⁶ Gahaꞌa fokoanaꞌaono Paulus, anano finihobhineno nofetingkee kakanagaundo naꞌa. Anoa lasao nokala te benteno tantara maka nopesua nofohato Paulus.

¹⁷ Paulus lasao neloꞌoi seemie tantara maka nofohatoe ambano, “Owa anaꞌi moꞌane aini se neangkamiu, nandoo bhe so nepugauꞌaono.”

¹⁸ Tantara naꞌa noowamo anaꞌi moꞌane aitu se neangkando, maka nopugau ambano, “Paulus, mie netaangi naꞌa nesaloi kanau amowa anaꞌi moꞌane aini ne hintu, nandoo bhe so nepugauꞌaono.”

¹⁹ Panglima nointahamo limano anaꞌi naꞌa, notondae se sohihi maka nofeenae ambano, “Mohato kanau ae bhahaa?”

²⁰ Ambano anaꞌi moꞌane anaꞌa, “Miendo Yahudi padamo dopokanagau daesalo ne hintu, naewine mowaanda toha Paulus se wisendo Sahano Agama, woha-wohaemo Paulus damee-meenae toha damekatinda-tindae.

²¹ Tamaka koise angkafie kamesalondoa, kapaꞌamo dokolabhi dofato fulu kabhahindo, dantumaaꞌe we sala. Andoa ini padamo dofemata paise daomaa daohoꞌua ane paeꞌo damongko Paulus. Kakanundo notokamo, tadontaa-ntaamo kabhotusimu.”

²² Palusi peda naꞌa panglima notudumo anaꞌi moꞌane saꞌitu nasumuli bhe nopugauane ambano, “Koise metaatangaa ne laꞌa-laꞌaemoa putae padamo fohato kanau.”

Paulus doowae we Kaisarea 23:23-35

²³ Pada aitu panglima neloꞌoimo dohodua tantarano maka nofohatoda ambano, “Mefontaa-ntaa kaitaomu dahaa moꞌono tantara so kumalano we Kaisarea, pakade dafitu fulu tantara sumawino ne adhaha bhe dahaa moꞌono tantara meintahano pandanga. Nahambi-hambi siua mata sealo itu dakumalamo.

²⁴ Mefontaa-ntaa kaitaomu dua bhe adhaha naseꞌulu haa ulu so kasawiꞌano Paulus, maka owaeꞌomu we gubernur Feliks. Dhaganieꞌomu tetewei nasumalamati ampa ne watu!”

²⁵ Panglima naꞌa nebuhi dua bhe suhano, wambano peda aini.

²⁶ “Gubernur Feliks nefosibhalaku, suha aini nomaiꞌao ne Klaudius Lisias.

²⁷ Mie aini dohakoe miendo Yahudi, nomaꞌomo damongkoe, posinaꞌanomo apikihato bhe tantaraꞌiku lasao afosalamatie, hampano afetingke anoa ini warga negarano Roma.

²⁸ Pada anaꞌa aowaemo ne wisendo Sahano Agamando, patudhuku amandeꞌao kaowu bhahaꞌi dosangkatiane kaꞌala ae.

²⁹ Hato apandeꞌaane gahaꞌa dohakoe mbaꞌinomo doposala-salamaꞌanaꞌao tubhono agamando, tamaka miina bhe mantasiꞌanoa so natipongkoꞌao tawa natitohongkuꞌaoa.

³⁰ Aini dofohato kanaumo dua putae miendo Yahudi dopokanagaumo damongkoe. Dadiꞌanomo lasao atudu tantaraꞌiku daowae ne hintu. Miendo Yahudi humereno padamo dua afohatoda madaꞌo daobhieane ne hintu.”

³¹ Pada anaꞌa tantaraꞌi doalamo Paulus peda pahinta neꞌawando maka alo aitu dua doowae ampa we Antipatris.

³² Nomentae Paulus dopansuhuanemo, dosabhangkae kaowu tantaraꞌi sumawino ne adhaha, tantara sigaoꞌano dosulimo we bente.

³³ Sahatondo we Kaisarea, tantaraꞌi sumawino ne adhaha maitu lasao doowa suha naꞌa bhe wutono Paulus se gubernur.

³⁴ Pada nobasa suha maitu, gubernur nofeenamo Paulus bhahaꞌi nomaiꞌao ne kadieno ae. Hato nofetingke Paulus nomaiꞌao we kadieno Kilikia,

³⁵ nopugaumo ambano, “Netaamo. Dahumato kaowu mobhieangko itu, abhitahakikomo.” Maka notududa datumaangi Paulus we kamalino Herodes.