Tula-tulando rasulu 22 - Muna Southern Dialect

Paulus nopugau ne miendo Yahudi 22:1-29

¹ Ambano Paulus, “Bhahitie bhe kamungkulaꞌiku, soba fetingkeeꞌomu nepugauꞌaoku ini atumunduꞌao wutoku.”

² Dofetingkee gahaꞌa nepake wamba Ibrani, mie bhahi maitu sedhuluꞌa dua miinamo dakodiua. Ambano toha Paulus,

³ “O idi ini miendo Yahudi, alente we kotano Tarsus we kadieno Kilikia, tamaka aobhala ne Yerusalem ini. Nofoguhu kanau Gamaliel nompuu-mpuunie sepaliꞌa, apoguhuꞌao tubhono agama nefosampu ne awuaꞌintoomu. Kanandooꞌanomo nokamai-mai sepaliꞌa laloku akahadhaa so Lahataꞌala, peda dua hintimiu itu ampa aini.

⁴ O idi padamo aefodee-dee mangkafino kaangkaꞌano Ompu Yesus sampe domate. Namoꞌane nahobhine ahakofida maka aowada we katohongku.

⁵ Kabanarano pugauku ini naembali dasumakusiiꞌane Imamu Bhalano bhe Sahano kamungkulaꞌi. Andoa ini dowaꞌa kanau suha so miendo Yahudi we kotano Damsyik. Padamo dua akala we naꞌa patudhuku ahumakofi mie mangkafino Yesus ne kota aitu maka aowada we Yerusalem damodee-deeda.

⁶ Gahaꞌa ahato we laano sala nomaꞌomo bhe kotano Damsyik, toho indotu oleo tambaꞌomo nokalibu kanau tilanga maiꞌaono te lani nomahasai bhe aꞌondo.

⁷ Lasao atihambitao we wite maka afetingkemo suaha ambano, ‘Saulus, Saulus, noafa fodee-dee kanau?’

⁸ Ambaku, ‘Laꞌae gahaꞌa hintu itu waompu?’ Ambano, ‘Idi ini Yesus miendo Nasaret nefodee-deemu itu.’

⁹ Mie poowaꞌaku dowohae dua tilanga naꞌa tamaka suaha miina dametingkeea.

¹⁰ Ambaku toha, ‘Aeafa bhahaa Ompu?’ Ambano dua Ompu, ‘Ehe, maka kala we Damsyik, ne watu damohatoangkoemo sabhaha taka nefontantuno Lahataꞌala so nekahadhaamu.’

¹¹ Idi miinamo afowohaa hampano kasombano mataku ne tilanga saꞌituini, habutuno tadotonda kanau sabhangkaꞌiku, maka tapansuhu we Damsyik.

¹² Ne kota aitu nandoo seemie koneaꞌano Ananias. Anoa ini mie lumebeno, nofintahaki tubhono agama bhe dofosibhalae sepaliꞌa kosasawindo miendo Yahudi ne kota aitu.

¹³ Anoa nomaimo neehe-ehe ne sohihiku, maka ambano, ‘Saulus bhahitieku, fowohaꞌo toha!’ Gahaꞌa lasao afowoha maka atontoe.

¹⁴ Ambano, ‘Lahataꞌalando awuaꞌintoomu nopilikomo mandeꞌao patudhuno, pakade moha Mie Melaano Lalo ⸤ wutono Yesus⸥ bhe metingke suaha maiꞌaono ne wiwino.

¹⁵ Kapaꞌamo hintu ini membalino sakusii, newohamu bhe nefetingkemu naꞌa mosampeandae sabhaha mie.

¹⁶ Dadiꞌanomo noafa gahaꞌa nopoibhahaꞌao lalomu? Ehe, owa wutomu dokadiukoana. Metondala ne Ompu, fekangkilo totono lalomu notiꞌamponiꞌao dhosa-dhosamu!’

¹⁷ Hato asuli we Yerusalem, tangasano asambahea weo Lambuno Lahataꞌala, akopowohamo.

¹⁸ Taꞌawohamo dua Ompu nopugau ne idi ambano, ‘Mbaago-ago! Fekahimbamo hunsa Yerusalem ini, kapaꞌamo andoa itu pae datumahimae ane sumakusiiꞌao Inodi.’

¹⁹ Ambaku, ‘Ompu, ingka andoa maitu dopandeꞌaane idimo ini pontaala-alaꞌaono lambuno kasambaheaꞌa, ahakofi mie marasaeano ne Hintu maka afopesuada weo katohongku bhe afodee-deeda.

²⁰ Pedamo dua ne oleo katipongkoꞌano sakusiimu Stefanus, ingka bhe idi, pakade aangkafi dua habundo maitu. Pakeando fopongkono naꞌa adhaganiandae idi.’

²¹ Tamaka ambano Ompu, ‘Kalamo, kapaꞌamo atumuduko we kodoꞌoꞌano, we liwundo mie suano Yahudi.’ ”

²² Mie bhahi dofetingke pugauno Paulus ampa kaowu ne naꞌa, lasao dokei ambado, “Pongkoemoomu mie anoa itu! Miinamo namantasia nadumadi te wawono dhunia ini!”

²³ O mie bhahi dokei kansuhu poowa doꞌohofi dhubando bhe dekambuhi bungahasi, ⸤ kaꞌosano amahando⸥ .

²⁴ Nowoha peda maitu o panglima nofondawumo pahintano damopesua Paulus weo bente maka damee-meenae bhe dahumambisiane habuta. Patudhuno so dopandeꞌaaneꞌao noafa Paulus dokei-keisie mie bhahi peda maitu.

²⁵ Tamaka hato dokatapue maka dahumambisiane habuta, Paulus nopugaumo ne tantara meehe-eheno ne itu, “Gahaꞌa nembali mepepekiomu warga negarano Roma? Pakade miinaꞌo dabhitahakiea.”

²⁶ Nofetingke peda amaitu tantara anaꞌa nekapunamo ne panglima ambano, “O ae gahaꞌa so nehabumu inia? Ingka mie amaitu warga negarano Roma.”

²⁷ Panglima naꞌa lasao nokalaꞌi Paulus maka nofeenae ambano, “Soba fohato kanau, nokotuꞌu bhahaa hintu ini warga negarano Roma?” Ambano Paulus, “Uumbe.”

²⁸ Nopugaumo dua panglima naꞌa ambano, “Kapesuaꞌaku warga negarano Roma ini noꞌali aꞌoliea.” Ambano Paulus, “Tamaka idi aembali warga negarano Roma mpini pakalenteku.”

²⁹ Tantara so humambisiane habuta lasao dosowo. Sadopandeꞌaane kaowu Paulus netapundo maitu warga negarano Roma, panglima maitu noteꞌimo dua.

Paulus te wiseno Sahano Agama 22:30—23:11

³⁰ Mahinggamo peda maitu, panglima naꞌa gaonoa namandeꞌaane mpuu o ae kaꞌalano Paulus nesungkuꞌaondo miendo Yahudi. Dadiꞌanomo hato nomentae notududamo damolimba Paulus maiꞌao we katitaangiꞌano maka nopahintangi neangkaꞌindo imamu bhe kosasawindo Sahano Agama dahumompu. Paulus noowaemo te wisendo andoa maitu.