Tula-tulando rasulu 21 - Muna Southern Dialect

Paulus nokala we Yerusalem 21:1-14

¹ Pada tapofea-fealai lasao tahela tahope we liwutono Kos. Nomentae tahatomo we liwutono Rodos, tamaiꞌao ne itu tapansuhu we kotano Patara.

² We Patara taeꞌawa bhangka so humopeꞌano we kadieno Fenisia. Lasao tasawi ne bhangka naꞌa maka takala.

³ Tawoha witeno Siprus humanda we kema, tamaka tatalaloi tahope we Siria. Panda-pandano tasedemo we kotano Tirus, hampano uleano bhangka naꞌa damosampue ne kota aitu.

⁴ Ne itu taangkaimo bhahitieꞌi marasaeano maka taeate bhe andoa fitu oleo kaomponano. Bhe kafohatono Rohino Lahataꞌala, mie marasaeano ne itu dotangahimo Paulus keana nopansuhu we Yerusalem.

⁵ Tamaka nohato kaowu tempono, tapansuhumo. Mie marasaeano ne itu mahingga hobhineꞌi bhe anaꞌindo doato kainsami ampa we simbalino kota. Tahato we wiwino teꞌi tafongkohamo tuu mani maka tasambahea.

⁶ Pada tapofea-fealai tasawimo ne bhangka, andoa dosulimo dua we lambudo.

⁷ Tamaiꞌao we Tirus tasedemo we kotano Ptolemais, ampa kaowu ne itu tasawi ne bhangka. Ne itu taangkai dua bhahitie marasaeano, seꞌoleo taeate bhe andoa.

⁸ Nomentae takalamo we kotano Kaisarea. Ne itu tabutu we lambuno Filipus. Anoa ini mefoleleno dua Bhihita Metaa, seemie ne olotando pipituno nesangkendo we Yerusalem endefiꞌitu.

⁹ Filipus ini bhe kalambeno dopopaa sanea meꞌawano kapooli dokosuaha peda anabii.

¹⁰ Nopooli haa oleo tolu oleo taeate ne itu nohatomo seemie anabii maiꞌaono we kadieno Yudea, neano Agabus.

¹¹ Anoa nomaiꞌi kainsami maka noala kawaweno Paulus. Pada anaꞌa nokatapumo limano bhe aꞌeno wutono bhe nopugau ambano, “Ambano Rohino Lahataꞌala: Kokawaweno ini dakumatapue miendo Yahudi we Yerusalem nada aini, maka daowae ne limando mie suano Yahudi.”

¹² Tafetingke peda maitu insaodi bhe bhahitie marasaeano ne itu taesalomo mpuu ne Paulus koemo nokala we Yerusalem.

¹³ Tamaka Paulus tanotobhoosi ambano, “Noafa gahaꞌa moꞌaeꞌaoꞌomu sampe fekasompodaomu bhe laloku? Ingka ahelasimo, suano kaowu tadakumatapu kanau, tamaka mahinggamo amate we Yerusalem hampano neano Ompu Yesus, ahelasimo dua.”

¹⁴ Miina kaowu nametingke kamesalo mani naꞌa, miinamo takodiua. Amba mani, “Hunsaꞌanomo kapoindalono Ompu so kumadhadhiaꞌano!”

Paulus dopoꞌawa bhe Yakobus we Yerusalem 21:15-26

¹⁵ Nopalusi haa oleo tolu oleo taeate-ate we kotano Kaisarea taokanumo maka takala we Yerusalem.

¹⁶ Nandoo dua seemie hodua mie marasaeano we Kaisarea mangkafi kainsami. Andoa ini doowa kainsami we lambuno Manason, kabutuꞌa manimo. Mie aini nomaiꞌao we witeno Siprus, nomponamo noparasaeaꞌa.

¹⁷ Sahato mani we Yerusalem kosasawindo bhahitie ne itu doꞌia sepaliꞌa dosumpui kainsami.

¹⁸ Hato nomentae, Paulus nopoowa-owamo bhe insaodi takalamo tapoꞌawaꞌao Yakobus. Kosasawindo kamungkulaꞌi dohatomo dua ne itu.

¹⁹ Pada nofeabhada, Paulus notula-tulaandamo nomaiꞌao ne siu kosasawiꞌae nekahadhaano Lahataꞌala ne mie suano Yahudi mangkano ne limano anoa.

²⁰ Dofetingke peda naꞌa dopudhimo Lahataꞌala maka dopugau ne Paulus ambado, “Paulus bhahitie mani, naetaa mandeꞌaane nehewundomo miendo Yahudi marasaeano ne Yesus, bhe sanea mintahakino mpuu tubhono agama Yahudi.

²¹ Tamaka andoa ini dofetingkemo dua ambado hintu ini mefoinaꞌu miendo Yahudi meateno we koliwuno dahumunsa tubhono agama Yahudi. Ambado pugau putae o anando koemo dosunada bhe koemo dua damangkafi adhati Yahudi.

²² Kaowu nadamo amai itua? Ingka tetewei dametingke hatomo we ini.

²³ Dadiꞌanomo angkafie nepugauꞌao mani ini: Nandoo dopopaa inia wea wambano.

²⁴ Wowoꞌo andoa ini maka fekanggela wutomu ampa mongkilo poowa-owa bhe andoa so katandaino kafolapasino weano wamba. O dhoino tumanggoe hintu neanomo naembalimo dakumuhu fotundo. Ane mehabu nada anaꞌa, sabhaha mie damandeꞌaanemo ingka o bhihita nefetingkendo itu gahaꞌa miina nakumotuꞌua. Ingka gahaꞌa hintumoa daa-daaꞌe dhalangie tubhono agama Yahudi.

²⁵ Tamaka mbali mie suano Yahudi toka marasaeano, padamo tabuhiandae tubho-tubhonoa: koe dohumaa oti nepopanga ne barahala, koe dohumaa hea, koe dohumaa kamateno kadadi pata nesumbele bhe koe dua domonsulea.”

²⁶ Nomentae Paulus nowowoꞌomo mie popaano saꞌituini, dofekangkilo wutondo dotandaki kafolapasino weano wambado. Pada anaꞌa nopesuamo weo Lambuno Lahataꞌala. Patudhundo naeowa kafohato bhahaꞌi naefie maka namalusi kafolapasino weano wambado bhe naefie daowa kapopangando seemie-seemie ne Lahataꞌala.

Paulus dohakoe weo Lambuno Lahataꞌala 21:27-36

²⁷ Tempo fitu oleo nomaꞌomo namalusi. Gahaꞌa seemie hodua miendo Yahudi maiꞌaono we kadieno Asia dowoha Paulus weo Lambuno Lahataꞌala, lasao dowudhu mie bhahi sampe dohakoe,

²⁸ bhe dokei ambado, “Miendo Israel, hamba kainsami! Ainiꞌaemo ini mie mefoguhuno sabhaha mie ne amai onuno liwu so damewangiꞌao intaodiomu miendo Yahudi, dahumunsa tubhono agama Yahudi bhe damekandidiki Lambuno Lahataꞌala ini! Pakade aitu newowoꞌomo dua miendo Yunani dopesua weo Lambuno Lahataꞌala dofekaharamu lambu mongkilono ini!”

²⁹ Kapugauꞌando peda maitu hampano dowoha Trofimus maiꞌaono we Efesus nekala-kala bhe Paulus weo kota, kunaꞌendomo Paulus nowowoꞌo dua mie anaꞌa weo Lambuno Lahataꞌala.

³⁰ Mieno kota tadohialelemo, raꞌeati tadosipumpumo. Pada dohakoe, Paulus dobulue we simbali maka lasao dosongko kosasawiꞌae fointono Lambuno Lahataꞌala.

³¹ Tangasano dosoba-soba damongkoe, gahaꞌa panglimano tantara Roma nofetingkemo bhihita kosekotaꞌae Yerusalem tadohialelemo.

³² Lasao nowowoꞌo seemie hodua neangkando tantara bhe tantara sigaoꞌano dua maka dosampu dotendeheki mie bhahi maitu. Sadowoha panglima maitu bhe tantaraꞌino, mie bhahi dofetumpumo dopepeki Paulus.

³³ Panglima naꞌa nomaꞌoti Paulus, lasao nohakoe maka notududa datumapuane hante haa honda poowa nofeena bhahaꞌi laꞌae mie amaitu bhe nehabu ae.

³⁴ Tamaka mie bhahi maitu tanofegiu katobhoosindoa. Mbaꞌinomo tadohobhomo, anoa miina namandeꞌaanea bhahaꞌi o ae sakotuꞌuꞌanoa kumadhadhiaꞌano maitu. Dadiꞌanomo nopahintangimo tantarano dawowoꞌo Paulus te benteno tantara.

³⁵ Dohato we pulangkuno bente, mie bhahi tadopodhumpu-dhumpuhaomo sampe Paulus dosodaemo tantaraꞌi maitu.

³⁶ Mie bhahi netaa dobhatompa doangkafie bhe dokei, “Pongkoemoomu!”

Paulus nofealai namugau 21:37-40

³⁷ Damesua kaowu weo bente, Paulus nopugaumo ne panglima maitu ambano, “Naembali bhahaa amugau ne hintu?” Ambano panglima naꞌa, “Pande gahaꞌa wamba Yunani?

³⁸ Kunaꞌekumo hintu ini miendo Mesir mehabuno kahungga haꞌoleo ini, mefileiꞌaono fato hewu gurumbola koewangano we pandaso bhalano. Gahaꞌa suano?”

³⁹ Ambano Paulus, “Idi ini miendo Yahudi amaiꞌao we Tarsus, seꞌonu kota tiende-endeno we kadieno Kilikia. Aesalo ane naembali daꞌumunda kanau amugau ne mie bhahi maitu.”

⁴⁰ Noꞌundaꞌaane kaowu panglima maitu, Paulus neehe-ehemo te fotuno pulangku maka noale raꞌeati keana dohobho. Miina kaowu dakodiu, Paulus nopugaumo ne andoa nepake wamba Ibrani.