Tula-tulando rasulu 20 - Muna Southern Dialect

Paulus nokala we Makedonia bhe Troas 20:1-12

¹ Nopalusi kahungga anaꞌa Paulus nosaliꞌimo mie marasaeano maka nofekatangka lalondo. Pada aitu nofealaimo maka nokala we kadieno Makedonia.

² Anoa noliligi kadieno Makedonia maitu bhe nobhahi katangahino nofekatangka lalondo mie marasaeano. Pada anaꞌa nopansuhu we kadieno Yunani.

³ Nokapo tolu wula neate ne itu, patudhuno nahumope we kadieno Siria. Nobhingke nakumala, gahaꞌa tanonandoomo bhihita putae miendo Yahudi dopugau-gau damongkoe. Dadiꞌanomo nobhotusiemo nasumuli kundono namangka we kadieno Makedonia.

⁴ Dopobhaiane Sopater anano Pirus mieno Berea, Aristarkus bhe Sekundus, kohoduando miendo Tesalonika, Gayus mieno Derbe, Timotius, Tikikus bhe Trofimus miendo Asia.

⁵ Andoa naꞌa dopaꞌindulu maka dontaa-ntaa kainsami we kotano Troas.

⁶ Nopalusi hohaeaꞌano Roti Tapa Koragino tahelamo tamaiꞌao we kotano Filipi maka nopooli neelima tahatomo we Troas bhe tapoꞌawa-awamo toha. Ne itu taeate fitu oleo kaomponano.

⁷ Ne alono Ahadhi tapohompu-hompumo tapoharoa. Paulus nopuga-pugaumo bhe bhahitieꞌi ne itu hampano patudhuno namentae nakumalamo toha. Puga-pugauno maitu tanofewuntaꞌi alo.

⁸ Weo boloku te wawo, ne kapohompu-hompuꞌa mani naꞌa, nobhahi kantalea nesulaa.

⁹ Nandoo seemie anaꞌi moꞌane neano Eutikus nengkoha-ngkoha ne kaonga. Paulus nompona sepaliꞌa nopuga-pugau sampe anaꞌi moꞌane aitu miinamo natumahamiea kampauno. Gahaꞌa nosimoodoꞌamo sampe nondawu nomaiꞌao te katolu sunsuno. Hato dosangkee nomatemo.

¹⁰ Tamaka Paulus lasao nosampu nolongkowi anaꞌi moꞌane aitu, nokakopue bhe nopugau ambano, “Koe mohobhoomua, nandoo nodadi.”

¹¹ Hato nosuli te wawo, Paulus nebhebheha roti maka dosihuma-humaaꞌa. Pada dohumaa, nandoo nompona toha nopuga-pugau; tanohaha kamentae maka nokala.

¹² Anaꞌi moꞌane saꞌituini doatoe se lambuno, nodadimo. Kosasawindo notilawesi sepaliꞌa lalondo.

Nomaiꞌao we Troas Paulus nokala we Miletus 20:13-16

¹³ Insaodi tapaꞌindulu we bhangka maka tahela tahope we kotano Asos. Patudhu mani tasumumpui Paulus ne naꞌa peda kaowilino, hampano anoa noangka wite.

¹⁴ Hato tapoꞌawa-awa we Asos, Paulus nosawimo ne bhangka mani maka tapansuhu we kotano Metilene.

¹⁵ Tamaiꞌao ne itu tahelamo kansuhu, hato nomentae tahatomo we potalaꞌano liwutono Kios. Pooli neefua tahopemo we liwutono Samos, maka nopooli neetolu tahatomo we kotano Miletus.

¹⁶ Paulus padamo nobhotusie pae namangkaa we kotano Efesus, keana nopuli wakutuuno we kadieno Asia. Anoa nombaago-ago, ane naembali paeꞌo nahumatoa hohaeaꞌano Pentakosta nahumatomo we Yerusalem.

Pedato kafealaino Paulus ne kamu-kamungkulaꞌi we Efesus 20:17-38

¹⁷ Paulus netudu seemie namaiꞌao we Miletus nakumala we Efesus. Anoa noowili kamungkulaꞌindo umati marasaeano we kotano Efesus damai we Miletus.

¹⁸ Sahatondo, Paulus nopugaumo ambano, “Bhahitieꞌiku, ingka pandeꞌaaneomu peda amai aeate bhe hintimiua notanda oleo pakahatoku ne Asia ini.

¹⁹ Weo kaꞌondofaoku adhalangi kahadhaano Ompu, miina amosibhala wutoku, pakade nentuhu nondawu luuku bhe nobhahi aeꞌawa kasoba maiꞌao ne miendo Yahudi so mongko kanau.

²⁰ Ingka pandeꞌaaneomu dua ampuu-mpuunie sepaliꞌa afohatoangkoomu kofahalaaꞌano so hintimiu. Kosasawiꞌae apadae afebhihitaiangkoeꞌomu bhe afoinaꞌuangkoeꞌomu, naetaa ne wisendo mie bhahi naetaa weo pohompu-hompuꞌa ne lambumiu.

²¹ Namiendo Yahudi namiendo liwu sigaoꞌano sadhia afodhagada, bhahaꞌi kaowu dametompaꞌao dhosando, dadumoli ne Lahataꞌala bhe damarasaea ne Ompu Yesus Kristus.

²² Tamaka ampa aitu taꞌaangka-angkamo pahintano Rohino Lahataꞌala akumala we Yerusalem, maka ne watu miina amandeꞌaane bhahaꞌi damafaꞌi kanau.

²³ Ampamo kaowu nofohato kanau Rohino Lahataꞌala ne amai liwu kaangkaꞌaku taꞌo katohongku bhe kafodee-dee so neꞌawaku.

²⁴ Tamaka miina sepaliꞌa aoheruanea inawaku sumanomo ahumato ne hatoꞌano amotoka taka neꞌawaku maiꞌao ne Ompu Yesus, maꞌanano aefolele Bhihita Metaano rahamatino Lahataꞌala.

²⁵ Kosasawimiu padamo aangkaikoomu aefebhihitaiꞌao Kafopahintaꞌano Lahataꞌala. Aitu apandeꞌaanemo, paemo moha kanauꞌomua.

²⁶ Dadiꞌanomo seꞌoleo itu amohatokoomu sakotu-kotuꞌuno, aonggela aongkilo, suanomo kaꞌalakua ane ne olotamiu bhe so binasano mada kaowu.

²⁷ Kapaꞌamo ampuu-mpuunie afohatoangkoomu kosasawiꞌae patudhuno Lahataꞌala.

²⁸ Dadiꞌanomo dhagani wutomiu, dhaganieꞌomu umati marasaeano, peda dhagano dhumba noꞌondofao kadadi kakaneano. Kapaꞌamo hintimiumo nesangkeno Rohino Lahataꞌala membaliomu neangka so dhumaganino umatino Lahataꞌala. Umati andoa ini fehebuaꞌano Lahataꞌala, notolosianda heano Anano.

²⁹ Apandeꞌaane dua, akumundo kaowu, o daꞌu ngkahoku fohumaano namesuakikoomu maka pae naegana-ganaa nadumai-dai kaseꞌiseno umati.

³⁰ Bhahamoa maiꞌao ne kaseꞌisemiu nandumandoo dua so fofoguhuꞌaono tapa kumotuꞌuꞌano, patudhundo dahumela lalondo mie marasaeano damangkafi andoa.

³¹ Dadiꞌanomo kodhagaomu! Tandaiꞌeomu tolu taꞌumo kaomponanoa, ole-oleono, koho-kohondoꞌano miina ameontoa atangahikoomu seemie-seemie, nopotuhu bhe luuku.

³² Aitu afopuliemo ne Ompu somo dumambaꞌaangkoomu, neanomo sadaa-daa mintahakieꞌomu bhihitano rahamatino. Lahataꞌala nokokuasa namekatangka kaparasaeamiu bhe nadumawuangkoomu sabhaha kadawu nefotantuno so mie nefekangkilono.

³³ Miinaꞌo sepaliꞌa akonimesaloa ne laꞌae-laꞌaemoa, nasalaka, nabulawa, tawa o pakea.

³⁴ Ingka pandeꞌaaneomu dua o limakumo ini kumahadhaano mbali kadadiꞌaku wutoku bhe kadadiꞌando sabhangkaꞌiku pobhai kanau.

³⁵ Ne sabhaha nehabuku ini afotiwohaangkomoomu sandaha putae tabeano dokahadhaa moꞌosa peda aini so datumulumiꞌao mie kumadee-deeno. Ingka nofaraluu datumandai nepugauꞌaono Ompu Yesus, kapaꞌamo padamo nopugau ambano, ‘Nobahakati dofowaꞌao bhe detahimaa.’ ”

³⁶ Pada nopugau peda maitu Paulus bhe kosasawindo dosefongko-fongkohaꞌamo tuundo maka dosambahea.

³⁷ Kosasawindo doꞌae tadokansodu-nsodumo poowa dokakopu Paulus bhe dowonoe.

³⁸ Nokompeaha sepaliꞌa lalondo, sedhuluꞌa dua mbaꞌinomo padamo nopugau paemo daohaea. Pada anaꞌa doatoemo we bhangka.