Tula-tulando rasulu 2 - Muna Southern Dialect

Pentakosta, oleono kasampuꞌano Rohino Lahataꞌala 2:1-13

¹ Nohato hohaeaꞌano Pentakosta, kosasawindo mie marasaeano dopohompu-hompu ne seꞌonu lambu.

² Gahaꞌa tambaꞌomo dofetingke huhu nomaiꞌao te lani pasae kawea moꞌosa, koseꞌonuꞌae lambu kapohompu-hompuꞌando tanehuhu-huhumo.

³ Tadowohamo dua hendeno efi peda katuno lela nopogaa-gaa nopee te wawondo seemie-seemie.

⁴ Kosasawindo nokabhintidamo Rohino Lahataꞌala maka dotanda dopugau depake wambado koliwuno ⸤ tapaꞌo nepandeꞌaondo⸥ , seemie-seemie ampa kadawuꞌaono ne Rohino Lahataꞌala.

⁵ Wakutuu anaꞌa dobhahi miendo Yahudi lumebeno maiꞌaono ne sabhaha liwu te dhunia ini dohato we Yerusalem.

⁶ Dofetingke huhu amaitu mie bhahi ini dosipumpumo, andoa tadotongo, hampano dofetingke rasulu maitu dopugauꞌao wamba nepakendo ne liwu kamaiꞌaoꞌando seemie-seemie.

⁷ Tadotonto bhe nopuli mentendo. Ambado, “O mie mugauno ini ingka sanea miendo Galilea!

⁸ Peda amai bhahaa inia? Ingka dofetingkedaomu dopugau depake wamba we liwu kamaiꞌaoꞌantoomu seemie-seemie?

⁹ Intaodiomu ini miendo Parsia, Media, Elam, miendo Mesopotamia, Yudea, Kapadokia, Pontus bhe Asia,

¹⁰ Frigia bhe Pamfilia, miendo Mesir bhe kadieno Libia pomaꞌotiꞌano bhe kotano Kirene, mie humato maiꞌaono we Roma,

¹¹ miendo Yahudi bhe sigaoꞌano mangkafino agama Yahudi, miendo Kreta bhe miendo Arabu. Ingka dofetingkedaomu depake wamba we liwu kamaiꞌaoꞌantoomu seemie-seemie, detula-tulaꞌao giu timenteꞌaono nehabuno Lahataꞌala.”

¹² Kosasawindo tadentongo-ntongomo bhe tadopofee-feenamo, “O ae bhahaa inia?”

¹³ Tamaka nandoo dua bihidhingida ambado, “Andoa ini dololanuꞌao angguru momeko.”

Kapedatono Petrus 2:14-40

¹⁴ Tamaka Petrus noehemo bhe rasulu ompulu seemieno maka nopugau nofekabhala-bhalaꞌie ne mie bhahi, ambano, “Miendo Yahudi bhe kosasawimiu meateno we Yerusalem ini, fetingkeeꞌomu bhe tandaiꞌeomu pugauku ini.

¹⁵ Mie andoa ini miina dalolanua peda fekihimiu itu, kapaꞌamo oleo kaneꞌo hambi siua mata.

¹⁶ Tamaka ainiꞌaemo nekobhoasaꞌaono Lahataꞌala nefosampeno anabii Yoel,

¹⁷ ⸤ Peda aini bhoasaono Lahataꞌala,⸥ ‘Nahumato pandano dhamani amosampu Rohiku ne kosasawindo manusia; anaꞌimiu namoꞌane nahobhine damandemo dakosuaha nada anabii, ana moꞌanemiu amaꞌanda powoha, kamungkulaꞌimiu amaꞌanda monifi.

¹⁸ Ne oleo anaꞌa mahingga ne bhatuaku namoꞌane nahobhine amosampu dua Rohiku, sampe dakosuaha nada anabii.

¹⁹ Aefokonandoo giu timenteꞌaono te wawo, te lani tatu, bhe tanda tapa mentela we panda, we dhunia ini: o hea, o efi bhe gawu mokapa.

²⁰ Oleo naembali doloma mposo, o wula nameda hea. Aini nakumadhadhia paeꞌo nahumato oleono Ompu, oleo bhalano, oleo kumalabhiaꞌano.

²¹ Ne oleo anaꞌa kosasawindo metondalano ne Ompu tetewei dasumalamati.’

²² Miendo Israel, fetingkeeꞌomu pugauku ini. Nepulaoꞌaoku naꞌa Yesus miendo Nasaret, seemie nesangkeno Lahataꞌala. Nosangkee Lahataꞌala ini notiwoha ne kuasa, giu timenteꞌaono bhe tanda tapa mentela nehabuno Lahataꞌala ne wunta-wuntamiu noangka ne limano Yesus ini. Kosasawiꞌae ini ingka pandeꞌaanemoomu.

²³ Noposahataa bhe patudhuno bhe kalentuno Wutono, Lahataꞌala nobhotusiemo nofolapasaangkoeꞌomu. Tamaka hintimiu katahoeꞌomu ne bansando mie modai dokantaiꞌe te sau salipu bhe dopongkoe.

²⁴ Tamaka Lahataꞌala nofodadie, nofolapae nomaiꞌao ne kakadee-deeno mate, hampano pae bhe kapoolia nasumadaa-daa nakumuasaiꞌe mate.

²⁵ Kapaꞌamo Daud nopugau nopulaoꞌao Anoa peda aini, ‘O idi sadhia awoha Ompu Lahataꞌala te wiseku; hampano Anoa neehe-ehe ne suanaku, idi miina akakenda-kendaa.

²⁶ Dadiꞌanomo laloku noꞌia sepaliꞌa, alusuku nokei nosambo; aeate-ate weo posahunaꞌao ne Lahataꞌala.

²⁷ Kapaꞌamo alusuku pae humunsae weo dhuniando mie mate, mbadhano bhatuamu mongkilono pae nahumansurua.

²⁸ Hintu fosusu kanau kaangkaꞌa so adumadiꞌao; ne wisemu nopontalabhi-labhi kaꞌiaku.’

²⁹ Bhahitieꞌiku! Naetaa aetula-tulaangkoomu awuantoomu Daud mentalea-mentalea. Daud nomatemo, padamo dokobuhue. Kobuhuno nandooꞌe ampa aini ne liwuntoomu ini.

³⁰ Lahataꞌala padamo nodhandie bhe nofemata putae namaiꞌao ne sampuꞌano nandumandoo naseemie so nesangkeno Lahataꞌala naembali Omputo. Daud ini nopandeꞌaane dhandino Lahataꞌala naꞌa. Anoa seemie dua anabii,

³¹ dadiꞌanomo o ae so kumadhadhiaꞌano te wise nowohaemo. Nopugauane wawo putae Mesias Omputo Fosalamatino namanu namaiꞌao ne mate. Ambano Daud, ‘Pae dahumunsae weo dhuniando mie mate, mbadhano pae nahumansurua.’

³² Nepulaoꞌaono Daud naꞌa o Yesus, nefowanuno Lahataꞌala nomaiꞌao ne mate. Kosasawiꞌa mani ini mohaꞌaono wuntano mata mani kadhadhia anaꞌa.

³³ Pada nosangkee Lahataꞌala te melangkeꞌano bhe nowaꞌane kuasa, notahimamo Rohino Lahataꞌala nedhandiꞌaono maitu. Rohi aitu nofosampuemo dua ne insaodi ini, peda newoha bhe nefetingkemiu aitu.

³⁴ Kapaꞌamo suano wutono Daud monino te surugaa, tamaka Daud nopugau ambano, ‘Ompu Lahataꞌala nokowambamo ne Ompuku,

³⁵ Mengkohamo ne suanaku ini, ampa kosasawindo kaewamu ahumabuda so kafindaꞌamu.’

³⁶ Dadiꞌanomo kosasawindo miendo Israel tabeano mandeꞌaaneomu kotu-kotuꞌu putae Yesus nosangkeemo Lahataꞌala nembali Ompu bhe Mesias, Omputo Fosalamatino. Yesus ini padamo kantaiꞌeomu te sau salipu.”

³⁷ Dofetingke peda naꞌa nosabhamo handado maka dofeenamo Petrus bhe rasulu sigaoꞌano ambado, “Bhahitieꞌi, kaowua taeafaꞌimo bhahaa insaodi ini?”

³⁸ Ambano Petrus, “Fetompaaneomu dhosamiu maka mefekadiuꞌomu seemie-seemie weo neano Yesus Kristus, so natiꞌamponiꞌao dhosamiu. Mada aitu damaꞌangkoomu kawaꞌaono Rohino Lahataꞌala.

³⁹ Kapaꞌamo dhandi aini so hintimiu bhe sampuꞌamiu bhe kosasawindo mie sigaoꞌano we liwu mokodoꞌoꞌano dua, ampa kabhahino so nesaliꞌino Ompu Lahataꞌalantoomu.”

⁴⁰ Nandoo dua nobhahi nepugauꞌaono Petrus. Nompuu-mpuunie notangahida bhe nefeꞌulaianda ambano, “Fekakodoꞌo wutomiu ne mie modaino ini, so sumalamatiꞌaoꞌomu.”

Koeatendo umati kabhao-bhaono 2:41-47

⁴¹ Dobhahi mie marasaeano ne pugauno Petrus, maka dokadiuda. Oleo itu umati dotitubhahi, kabhahindo dapetolu hewu.

⁴² Andoa sadhia dokampuu-mpuu dofintahaki kafoinaꞌundo rasulu, dopohompu-hompu bhe dosekakolalo. Andoa sadhia dua dopoharoa bhe dosambahea.

⁴³ Nobhahi giu timenteꞌaono bhe tanda tapa mentela nehabundo rasulu, sampe kosasawindo mie doteꞌi sepaliꞌa.

⁴⁴ Kosasawindo marasaeano dosekakolalo, fehebuaꞌano seemie mbalimo dua fehebuaꞌando kosasawindo.

⁴⁵ Sadhia nandoo dua masono fehebuaꞌano maka olino dopodawu-dawue ampa kafaraluuno seemie-seemie.

⁴⁶ Andoa dokampuu-mpuu dosekakolalo, seꞌo-seꞌoleo dopohompu-hompu weo Lambuno Lahataꞌala. Andoa doꞌia bhe nohelasi lalondo dopoharoa ne lambudo seemie-seemie dopali-paliꞌaane.

⁴⁷ Sadhia dua dopudhi Lahataꞌala bhe doasianda sabhaha mie. Seꞌo-seꞌoleo Ompu nofodhulu kabhahindo mie nefosalamati.