Tula-tulando rasulu 19 - Muna Southern Dialect

Paulus we Efesus 19:1-12

¹ Tangasano Apolos nandooꞌe we Korintus, Paulus nopalintangimo tombuno kabhawo weo kadie aitu maka nohato we kotano Efesus. Ne itu nopoꞌawaꞌao seemie hodua mie mangkafino Yesus.

² Nofeenadamo ambano, “Tahimaemoomu bhahaa Rohino Lahataꞌala pakaparasaeamiu?” Tamaka ambado, “Miinaꞌo, bhahamoa miinaꞌo tametingke nandoo Rohino Lahataꞌala.”

³ Ambano dua Paulus, “Ane peda naꞌa, weo nea laꞌae gahaꞌa dokadiukoomu?” Ambado, “Taetahima kakadiu peda nefoguhuꞌaono Yohanes.”

⁴ Ambano toha Paulus, “Kakadiuno Yohanes katandaino o mie dofetompaꞌao podiu modaindo, tamaka ambano Yohanes ne mie bhahi, tabeano damarasaea ne mie so maino namalusi anoa, nopulaoꞌao Yesus.”

⁵ Dofetingke peda maitu lasao dokadiuda weo neano Ompu Yesus.

⁶ Tangasano Paulus notei limano te wawondo, Rohino Lahataꞌala nokabhintidamo sampe dopugau depake wambano Rohi bhe dokosuaha peda anabii.

⁷ Kabhahindo dapeompulu hodua.

⁸ Ampa tolu wula Paulus sadhia nopesua weo lambu kasambaheaꞌa ne itu bhe nokado nofofoguhu. Nopuga-pugau bhe andoa patudhuno mpuu namoparasaeada ne kahatoꞌano Kafopahintaꞌano Lahataꞌala.

⁹ Tamaka nandoo dua seemie hodua katuꞌa fotu. Andoa ini dongahe damarasaea, bhahaa tadofekandidiki kaangkaꞌano Ompu maitu ne wisendo mie bhahi. Kanandooꞌanomo Paulus nohunsadamo. O mie mangkafino Yesus nogaatida maka seꞌo-seꞌoleo nofoinaꞌuda weo boloku kapoguhuꞌano Tiranus.

¹⁰ Aini nodhalangie haa taꞌu kaomponano sampe kosasawindo meateno ne kadieno Asia maitu dofetingkemo bhoasaono Ompu, namiendo Yahudi namiendo Yunani.

¹¹ Noangka ne limano Paulus, Lahataꞌala nefokonandoo sabhaha giu timenteꞌaono.

¹² Mahinggamo tadowowoꞌo kakamasi tawa kabhini nepakeno Paulus maka doteiꞌe te wawondo mie mosaki, doꞌosaanemo. Sakindo tanosimiinaeꞌamo, o seetani dopuli dolimba.

Anaꞌino Skewa 19:13-20

¹³ Nandoo dua seemie hodua bhisa miendo Yahudi dolili weo kota aitu. Andoa desoba-soba dua dosambili neano Yesus ne mie nepesuakino seetani. Ambado, “Abhatataꞌiangko weo neano Yesus nefoguhuꞌaono Paulus, limbaꞌo toha.”

¹⁴ Humabuno peda amaitu anaꞌino seemie Imamu Bhalano miendo Yahudi koneaꞌano Skewa. Kabhahindo dopipitu.

¹⁵ Tamaka seetani tanotobhoosida ambano, “Yesus apandeꞌaane, Paulus afengkanaꞌane dua, tamaka laꞌae gahaꞌa hintimiu ini?”

¹⁶ O mie nepesuakino seetani maitu lasao nolumpakida noala-alada, pakeando padae nogogawiea. Kopipitundo notaloda sampe dofilei kalembi-lembi maiꞌao ne lambu aitu bhe dokobhela-bhela.

¹⁷ Kadhadhia amaitu dofetingkee kosasawindo mieno kota Efesus, namiendo Yahudi namiendo Yunani. Dadiꞌanomo kosasawindo doteꞌi sepaliꞌa maka dhulu katiende-ende neano Ompu Yesus.

¹⁸ Dobhahi dua marasaeano domai domangakuꞌao dhosando ne wisendo mie bhahi, detula-tulaꞌao habun modaindo.

¹⁹ Dobhahi dua mie pande sihiri lasao dotawunao boku-bokuno dhoando maka dohampunie ne wisendo mie bhahi. O bhaseno boku anaꞌa doseree napelima fulu hewu dhoi pera.

²⁰ Pedamo anaꞌa bhoasaono Lahataꞌala dhulu kaꞌewa leleno bhe dhulu kamatangka kuasano.

Demetrius nehabu kahungga we Efesus 19:21-41

²¹ Nopalusi sabhaha kadhadhia amaitu, Paulus nokopatudhu nakumala we Yerusalem namangka we kadieno Makedonia bhe Akaya. Ambano, “Namada anaꞌa tetewei akumala dua we kotano Roma.”

²² Notudumo palima-limano dohodua, Timotius bhe Erastus, damaꞌindulu we Makedonia. Tamaka anoa seꞌoleo haa oleo nandoo neate we kadieno Asia.

²³ Kiha-kiha wakutuumo anaꞌa nonandoo kahungga bhalano mbaꞌinomo kaangkaꞌano Ompu.

²⁴ Nandoo seemie pandeno salaka koneaꞌano Demetrius, nehabu-habu kalambu-lambu salaka, sandahano lambu katisombaiꞌano dewa hobhine nekonando Artemis. Kagiuno ini nobhahi labano mbali mie kumahadhaano.

²⁵ Wakutuu anaꞌa Demetrius nofohompu mieno bhe pande-pande salaka sigaoꞌano maka nofohatoda ambano, “Bhahitieꞌiku! Ingka pandeꞌaanemoomu kaetaaꞌano namisintoomu ini hampano hasilino kagiu aini!

²⁶ Aitu ingka wohaꞌao wuntano matamiu bhe fetingkeemoomu dua habuno Paulus. Nobhahi newudhu bhe nefekakolilino lalondo mie, suano kaowu ne Efesus ini tamaka nomaꞌomo nokabhintie kosekadieno Asia ini. Ambano Paulus, ‘Nehabundo limando manusia suano ompua!’

²⁷ Dadiꞌanomo kagiuntoomu ini newisekimo balaa bhe natisambili modai, pakade suano kaowu anaꞌa tamaka lambu katisombaiꞌano dewa Artemis paemo nakomaꞌanaa. Pada dua anaꞌa wutono dewa Artemis nesombaintoomu miendo Asia bhe nesombaindo kosedhuniaꞌae ini namiinaemo kakalabhiano!”

²⁸ Dofetingke peda naꞌa mie bhahi nohehemo bhakendo, kaꞌosano amahando, maka dopokakei-kei ambado, “Nokalabhia Artemis, dewando miendo Efesus!”

²⁹ Koseꞌonu kotaꞌae tadohialelemo, dosihope-hopeꞌa we stadion. Dobulumo dua Gayus bhe Aristarkus, miendo Makedonia posabhangkaꞌaono Paulus we sala.

³⁰ Paulus gaono namesuakida, tamaka doꞌeleꞌaane mie marasaeano.

³¹ Seemie hodua kabhalaꞌi ne kadieno Asia posabhangkaꞌano bhe Paulus dofodhagae dua keana nopesua weo stadion naꞌa.

³² O mie tihompuno weo stadion netaa mpuu dopokakei-keia. Nandoo kumeino peda aini, nandoo kumeino peda aitu, tadopokakei-keimo, kapaꞌamo dobhahi pata mandeꞌaane noafa kahompuꞌando ne itu.

³³ Nandoo seemie koneaꞌano Aleksander dodhudhulaane miendo Yahudi te wise, kunaꞌendomo anoamo mehabuno kahungga. Lasao noaleda keana dohobho patudhuno natumunduꞌao wutono te wisendo mie bhahi maitu.

³⁴ Tamaka sadopandeꞌaane anoa maitu miendo Yahudi, kosasawindo dosikei-keiꞌamo napehaa dhamu kaomponano. Ambado, “Nokalabhia Artemis, dewando miendo Efesus!”

³⁵ Panda-pandano dhurutulusino kota aitu nopooli dua nofohempo mie bhahi maitu. Ambano, “Miendo Efesus! Ingka kosasawindo mie ne dhunia ini dopandeꞌaane putae kotanomo Efesus ini mohilalono lambu katisombaiꞌano dewa Artemis fofoliuno kakalabhia. Intaodiomu dua mohilalono kontu mongkilono sandahano, sumampuꞌano maiꞌaono te lani.

³⁶ Aini miina natigagaia. Dadiꞌanomo fotoho lalomiu, koe tapaꞌindulu kodiuꞌomua.

³⁷ Kapaꞌamo mie neowamiu ne ini, ingka miina dapombuhusi lambuno dewantoomu, pakade miina dua damekandidiki neano.

³⁸ Dadiꞌanomo ane Demetrius bhe mieno nandoo bhe so nesungkuꞌaondo, ingka nandoo oleo hompuꞌando pande bhitaha, nandoo dua pamarinta. Tadakumalamo daobhieanda ne andoa maitu.

³⁹ Ane nandoo dua patudhumiu sigaoꞌano, tabeano damohempoe weo hompuꞌando raꞌeati.

⁴⁰ Bhahi tadofosangkati dehabuomu kahunggano liwu oleo itu, kapaꞌamo miina bhe tingku katangkaꞌaontoomu ne kahialele aini.”

⁴¹ Pada nopugau peda maitu, raꞌeati notududamo dasumuli.