Tula-tulando rasulu 18 - Muna Southern Dialect

Paulus we kotano Korintus 18:1-17

¹ Pada aitu Paulus nohunsamo Atena maka nokala we kotano Korintus.

² We Korintus nopoꞌawa bhe seemie Yahudi koneaꞌano Akwila nomaiꞌao we kadieno Pontus. Anoa kaneꞌo nohato nomaiꞌao we witeno Italia bhe hobhineno, neano Priskila. Kahatoꞌando ne itu mbaꞌinomo Omputo Kaisar Klaudius nefondawu pahinta putae kosasawindo miendo Yahudi dahumunsa kotano Roma. Paulus noangka we lambudo,

³ maka neate bhe andoa hampano kadadiꞌando nopototo. Andoa dokahadhaa doposabha-sabhangka dehabu-habu kulino kadadi mbali tenda.

⁴ Seꞌo-seꞌoleono Sabat Paulus nokala nopuga-pugau bhe miendo Yahudi bhe Yunani we lambu kasambaheaꞌa, patudhuno namoparasaeada dua ne Yesus.

⁵ Dohato Silas bhe Timotius domaiꞌao we kadieno Makedonia, Paulus nofosibhalamo nopuga-pugau bhe miendo Yahudi. Andoa nofohatoanda putae Yesus maitu kotu-kotuꞌu Mesias, Omputo Fosalamatino.

⁶ Tamaka mie andoa maitu doewangie bhe dofekaꞌaebue, sampe Paulus tanotanta bungahasino pakeano ⸤ mbali kafodhagando⸥ . Ambano, “Hunsaꞌanomo mengkuluomu heamiu, ⸤ maꞌanano ane meꞌawaomu balaa, kaꞌalano wutomiu,⸥ o idi miina aꞌumalaa. Notanda aitu akumalamo we bansano liwu suano Yahudi.”

⁷ Dadiꞌanomo Paulus nohunsadamo maka nokala se lambuno seemie koneaꞌano Titius Yustus. Anoa ini noteꞌi dua ne Lahataꞌala; lambuno noposohihi bhe lambu kasambaheaꞌa.

⁸ Krispus mandeꞌaono lambu kasambaheaꞌa naꞌa bhe kosasawindo mie weo lambuno doparasaeamo ne Ompu Yesus. Dobhahi dua miendo Korintus metingkeno kafoguhuno Paulus doparasaea maka dokadiuda.

⁹ Sealo Paulus nokopowoha, nofetingke Ompu nokowamba ne anoa, “Koe moteꞌia, fokansuhumo folele Bhihita Metaa, tapugaumo.

¹⁰ O idi apobhaiangko kansuhu, pae bhe so dumingkukoa tawa modee-deekoa hampano dobhahi umatiku weo kota aini.”

¹¹ Paulus neate ne itu setaꞌu nomo wula bhe nofoguhuanda kansuhu bhoasaono Lahataꞌala.

¹² Tamaka saeheno Galio mbali gubernur we Akaya, miendo Yahudi dowanusaomo doewangi Paulus maka doowae ne wiseno pande bhitaha.

¹³ Ambado, “Mie aini nowudhu mie bhahi dasumombai Lahataꞌala, tamaka kafoguhuno naꞌa nopoewangi bhe tubhono agama Yahudi weo Kitabino Musa.”

¹⁴ Paulus kaneꞌo namugau, gahaꞌa nogolotiemo Galio ambano, “Miendo Yahudi! Ane sumungkuꞌaoꞌomu mie mekangkalaꞌino atora tawa mehabuno modaino, nopantasi atumahimakoomu.

¹⁵ Tamaka nepoꞌala-alatiꞌaomiu ini, ingka poꞌalati kaowu wamba, o nea bhe tubhono agama sapada-pada hintimiu. Dadiꞌanomo fosintuwuꞌao wutomiu, o idi aongahe aebhotusi giu medano aitu.”

¹⁶ Pada anaꞌa nogihasidamo.

¹⁷ Tamaka kosasawindo mie naꞌa dobuutimo Sostenes mandeꞌaono lambu kasambaheaꞌa, maka dowangkulie ne wisendo pande bhitaha, tamaka Galio miina napokihaꞌiandaa.

Paulus nosuli we Antiokia 18:18-23

¹⁸ Nomampona-mpona dua Paulus neate we kotano Korintus. Pada anaꞌa nofealaimo bhahitie marasaeano ne itu maka nosawi ne bhangka nohope we kadieno Siria. We kotano Kengkrea noguntimo wuluno fotuno, katandaino kafolapasino wea wambano ne Lahataꞌala. Priskila bhe Akwila dopobhaiane dua.

¹⁹ Dohato we kotano Efesus Priskila bhe Akwila nohunsadamo ne itu. Paulus nopesua weo lambu kasambaheaꞌa maka nopuga-pugau bhe miendo Yahudi.

²⁰ Miendo Yahudi desaloe naeate namekampona ne itu tamaka miina naꞌumundaa.

²¹ Paulus nofealaimo ambano, “Seꞌinawono toha asumulikikoomu ane namolalesa kanau Lahataꞌala.” Pada anaꞌa nohunsamo Efesus.

²² Nosede kaowu we kotano Kaisarea, nofonimo te Yerusalem noangkai umati marasaeano ne itu maka nopansuhu we Antiokia.

²³ Seꞌoleo haa oleo kaowu dua neate we Antiokia, nokalamo toha noangkai kadieno Galatia bhe Frigia, namekatangka lalondo kosasawindo mangkafino Yesus ne itu.

Apolos we Efesus 18:24-28

²⁴ Wakutuu anaꞌa tanohatomo dua seemie Yahudi we kotano Efesus, neano Apolos, nomaiꞌao we kotano Aleksandria. Anoa ini pande wamba bhe nopoolie iꞌino Kitabi.

²⁵ Anoa ini padamo nopoguhuꞌao kafoinaꞌuno Yesus. Nokamai-mai sepaliꞌa lalono nofofoguhu bhe notinda lalono netula-tulaꞌao Yesus, tamaka kapandeꞌaono ampamo kaowu kakadiuno Yohanes.

²⁶ Weo katangkano lalono netandakimo nofofoguhu weo lambu kasambaheaꞌa. Sadofetingkee Priskila bhe Akwila, lasao dowowoꞌoe se lambudo, maka dotalesaane dofotinda-tindaane kaangkaꞌano Ompu.

²⁷ Pada anaꞌa Apolos nopoindalo nalumimba we kadieno Akaya maka bhahitieꞌi we Efesus depakatu suha ne bhahitie marasaeano we Akaya neanomo datumahimae. Sahatono we Akaya, hampano kabarakatino Lahataꞌala Apolos nokofahalaa sepaliꞌa mbali mie marasaeano ne Yesus ne kadie aitu.

²⁸ Miina namanda-mandaa, miendo Yahudi notaloanda wamba ne wisendo mie bhahi, bhe nofotiwohaandae ne aeatino Kitabi putae Yesus maitu Mesias, Omputo Fosalamatino.