Tula-tulando rasulu 17 - Muna Southern Dialect

Paulus bhe Silas we kotano Tesalonika 17:1-9

¹ Paulus bhe Silas dokala doangkai kotano Amfipolis bhe Apolonia ampa dohato we kotano Tesalonika. Ne itu nandoo bhe lambu kasambaheaꞌando miendo Yahudi.

² Peda kaneano Paulus nopesuamo weo lambu kasambaheaꞌa naꞌa. Nopotulu-tulu tolu oleono Sabat, Paulus nopololi fekihi bhe andoa, dopuga-pugauꞌao aeatino Kitabi.

³ Nomaiꞌao ne aeatino Kitabi naꞌa notalesaandae bhe nofotiwohaandae putae Mesias tetewei nakadee-dee bhe namanu namaiꞌao ne mate. Ambano, “Yesus nefohatoꞌaoku ini, Anoamo Mesias, Omputo Fosalamatino naꞌa.”

⁴ Nandoo marasaeano maka doangkafi Paulus bhe Silas. Dobhahi miendo Yunani moteꞌino ne Lahataꞌala marasaeano, bhe dobhahi dua hobhineꞌi tiangkano marasaeano.

⁵ Tamaka miendo Yahudi nokoula lalondo. Desaliꞌimo mie modai lumampuno we daoa maka dosikoo-koo dehabu kahunggano liwu. Andoa dobuuti lambuno Yason, patudhundo dahumako Paulus bhe Silas maka dapowiseanda bhe mie bhahi.

⁶ Tamaka miina daohadaa. Miina kaowu daohada dobulu-bulumo Yason bhe bhahitie marasaeano doowada ne kabhalaꞌino kota. Dopokakei-kei ambado, “O mie mehabuno kahunggano liwu ne kosedhuniaꞌae gahaꞌa dohatomo dua ne ini!

⁷ Yason notahimada weo lambuno. Andoa ini dopuli doewangi adhati netubhono Omputo Kaisar kapaꞌamo ambado nandoo omputo sigaoꞌano nekonando Yesus.”

⁸ Dofetingke peda naꞌa mie bhahi bhe kabhalaꞌino kota nohaliamo lalondo.

⁹ Tamaka pada dotanduao dhoi, Yason bhe bhahitie marasaeano dofolapadamo.

Paulus bhe Silas we kotano Berea 17:10-15

¹⁰ Alo aitu dua bhahitie marasaeano ne kotano Tesalonika maitu lasao dotudu Paulus bhe Silas dakumala we kotano Berea. Sahatondo we naꞌa dokala we lambu kasambaheaꞌando miendo Yahudi.

¹¹ Mie ne itu nolalesa fekihindo, nopoꞌala bhe miendo Tesalonika. Nohelasi lalondo detahima bhoasaono Lahataꞌala. Seꞌo-seꞌoleo dopoguhuꞌao wambano Kitabi doꞌondofi kantoono pugauno Paulus maitu.

¹² Dobhahi marasaeano ne Yesus, pakade dobhahi dua miendo Yunani tiangkano marasaeano, nahobhine namoꞌane.

¹³ Gahaꞌa hato dofetingke miendo Yahudi we Tesalonika putae Paulus nefolele dua bhoasaono Lahataꞌala we Berea, dokalamo we kotano Berea dohodha mie damewangi Paulus bhe Silas, sampe dofekahalia bhe totono lalondo mie bhahi.

¹⁴ Bhahitie marasaeano ne kota aitu lasao dotudu Paulus nakumala we wiwino teꞌi. Tamaka Silas bhe Timotius daa-daada we Berea.

¹⁵ Mie poangkaꞌaono Paulus doatoe ampa we kotano Atena maka dosuli dewowoꞌo kaowili so Silas bhe Timotius neanomo dapikiangkafie.

Paulus we Atena 17:16-34

¹⁶ Tangasano Paulus nontaa-ntaa Silas bhe Timotius we Atena, lalono nokompeaha sepaliꞌa nowoha kota anaꞌa noponoꞌao patungno dewa nesombaindo.

¹⁷ Dadiꞌanomo Paulus nopesua weo lambu kasambaheaꞌa nopuga-pugau bhe miendo Yahudi bhe mie moteꞌino ne Lahataꞌala. Peda dua aitu seꞌo-seꞌoleo nokala we daoa nopuga-pugau bhe mie nepoꞌawaꞌaono.

¹⁸ Nandoo seemie hodua mie moꞌosano fekihi maiꞌaono ne walakando Epikuros bhe Stoa dopuga-pugau dua bhe anoa. Nandoo mugauno ambado, “Napugauꞌao ae bhahaa mie pande gau maitu, kabhahino wambano!” Tamaka ambado dua sigaoꞌano, “Kao-kaomo nehatoꞌao kafoguhuno dewando koliwuno.” Kapugauꞌando peda maitu mbaꞌinomo netula-tulaꞌao Yesus bhe kawanuꞌando mie mate.

¹⁹ Pada anaꞌa doowaemo ne hompuꞌa te kabhawono Areopagus. Ambado, “Naembali bhahaa mohato kainsami kafoguhu buꞌou nehatoꞌaomu itu?

²⁰ Kapaꞌamo mehatoꞌa kainsami tapaꞌo nefeti-fetingke mani. Dadiꞌanomo gao mani tamandeꞌaane dua o ae maꞌanano.”

²¹ (O miendo Atena naꞌa bhe mie sigaoꞌano meateno ne itu tadopada wakutuundo dofetingke tawa dopuga-pugauꞌao bhihita buꞌouꞌano.)

²² Paulus noehemo ne wisendo humompuno te Areopagus maka nopugau ambano, “Miendo Atena, aꞌondo-ondokoomu itu weo ehe ngkohamiu noꞌosa sepaliꞌa kosombaꞌamiu ne dewa.

²³ Kapaꞌamo kaomponano aliligi kotamiu ini bhe afoti-fotinda nesombaimiu, taꞌawohamo dua medha kontu kaetunuꞌa kapopanga bhe kabuhino. Kabuhino peda aini, ‘So ompu tapa tipandeꞌaono.’ Nesombaimiu ini mahingga miinaꞌo mandeꞌaaneomua, Anoamo itu so nefohatoꞌaoku inia.

²⁴ Lahataꞌala mokonandoono dhunia bhe kosasawiꞌae iꞌino, Anoamo ompuno lani bhe dhunia. Anoa miina naeatea ne lambu kaesombaiꞌa kahabuꞌando manusia.

²⁵ Lahataꞌala miina dua namaraluua daꞌumondofaane manusia kao-kaomo bhe nekaeꞌaono dua. Ingka wutono Lahataꞌala fowaꞌaonomo dadi, o inawa bhe kosasawiꞌae nefaraluundo manusia.

²⁶ Nomaiꞌao ne seemie manusia nofokonandoo sabhaha bansano liwu meatefino kosekaꞌewaꞌae dhunia ini. Mpini kabhao-bhaono Anoamo motantuno liwu so kaeateꞌando bansano liwu naꞌa bhe tempono dadindo manusia.

²⁷ Kanandooꞌano peda naꞌa neanomo manusia daꞌumondofi Lahataꞌala, kanggetu doliliꞌao feda-fedampa bhahaꞌi kaowu dapoꞌawaane. Gahaꞌa itu Anoa sakotuꞌuꞌanoa miina nakodoꞌo bhe intaodiomu inia.

²⁸ Kapaꞌamo intaodiomu ini dodadi, dokodiu bhe donandooꞌomu ne dhunia ini hampano kuasano Lahataꞌala. Aini noposahataa dua bhe nekosuahaꞌaondo pande buhimiu, ambado, ‘Intaodiomu ini saneamo dua sampuꞌano Lahataꞌala.’

²⁹ Dadiꞌanomo hampano intaodiomu ini sampuꞌano Lahataꞌala, pae naembalia dakofekihi putae Lahataꞌala maitu nopototo bhe patung bulawa tawa o pera bhahaꞌi o kontu angkaꞌano limando pande.

³⁰ Ampa aitu Lahataꞌala miinamo napolentua bhe dhamanino kakabhohe-bhohendo manusia, sampe nofohatodamo kosasawindo manusia kosedhuniaꞌae ini dametompaꞌaomo podiu modaindo.

³¹ Kapaꞌamo padamo nofotantue tempono so dabhitahakiꞌao manusia kosedhuniaꞌae ini, naposahataa bhe podiundo seemie-seemiea. O mie so fobhitahakino naꞌa padamo dua nofotantue, maka mbali tandano so doparasaeaꞌao sabhaha mie, Lahataꞌala nofowanue maiꞌao ne mate.”

³² Dofetingke kawanuꞌando mie mate, nandoo tadebheu bhe dofuta-futaaꞌie. Tamaka nandoo dua mugauno ambado, “Gao mani tametingke toha tana sepaku metula-tulaꞌao medano aitu.”

³³ Pedamo aitu Paulus nohunsamo hompuꞌa anaꞌa.

³⁴ Tamaka nandoo dua seemie hodua moꞌane doangkafie bhe doparasaea ne Yesus. Ne olotando andoa naꞌa nandoo koneaꞌano Dionisius seemie kamungkula Sahano Areopagus. Nandoo dua seemie hobhine koneaꞌano Damaris bhe mie sigaoꞌano.