Tula-tulando rasulu 16 - Muna Southern Dialect

Timotius noangkafi Paulus bhe Silas 16:1-3

¹ Paulus nopansuhumo we kotano Derbe we Listra. Ne itu nandoo seemie mangkafino Yesus, neano Timotius. Inano miendo Yahudi, noparasaea dua ne Yesus, tamaka amano miendo Yunani.

² Bhahitie marasaeano meateno we Listra bhe Ikonium dopuli dopandeꞌaane kataano lalono Timotius.

³ Paulus nopoindalo nawowoꞌoe so sabhangkano; dadiꞌanomo nosunaemo kadeki, hampano miendo Yahudi ne kota aitu sanea dopandeꞌaane amano miendo Yunani.

Paulus nolimba se kadieno Makedonia 16:4-12

⁴ Ne amai kota kaangkaiꞌando Paulus bhe Silas, umati ne itu dofohatoanda kabhotusindo rasulu bhe kamungkulaꞌi we Yerusalem. Dofoinaꞌuda damangkafi atorano nebhotusindo naꞌa.

⁵ Dadiꞌanomo kaparasaeando umati dhulu katangka, dhulu oleo dhulu kabhahindo.

⁶ Andoa doangkai kadieno Frigia bhe kadieno Galatia mbaꞌinomo Rohino Lahataꞌala miina naꞌumundaꞌaanda daefolele Bhihita Metaa we kadieno Asia.

⁷ Sahatondo we kadieno Misia patudhundo damesua weo kadieno Bitinia, tamaka Rohino Yesus miina naꞌumundaꞌaanda.

⁸ Dadiꞌanomo domaiꞌao we Misia, dopansuhumo we kotano Troas.

⁹ Nohondo oleo Paulus nokopowohamo. Weo powohano nandoo seemie maiꞌaono we Makedonia neehe-ehe ne itu bhe nesalo ne anoa ambano, “Limbamo we sewetano ini, tulumi kainsami.”

¹⁰ Pada nokopowoha peda maitu, lasao taokanu tapolimba se kadieno Makedonia. Hampano nopalusi powoha maitu, tasefekihimo ingka wutono Lahataꞌala gahaꞌa mugau kainsami taefolele Bhihita Metaa ne itu.

¹¹ Tamaiꞌao we kotano Troas tasawi ne bhangka talasao we liwutono Samotrake. Nopooli nomentae tahatomo we kotano Neapolis.

¹² Tamaiꞌao ne itu takala se Filipi, kota kabhao-bhaono ne kadieno Makedonia ini. Kota aini kaeateꞌando miendo Roma. Seꞌoleo haa oleo nandoo taeate-ate ne itu.

Paulus we kotano Filipi 16:13-18

¹³ Ne oleono Sabat talimbaki fointono kota, takala we wiwino umele. Pada aitu tahatomo ne kasambaheaꞌando miendo Yahudi, nopobutu peda nefekihi mani. Pada taengkoha sebantaha, tapugaumo ne hobhineꞌi pohompu-hompuno ne itu.

¹⁴ Ne olotando metingkeno nandoo seemie hobhine koneaꞌano Lidia. Anoa nomaiꞌao we kotano Tiatira, nopodagaꞌao kai wungo. Anoa ini noteꞌi dua ne Lahataꞌala. Ompu nolengka totono lalono sampe pugauno Paulus notahimae.

¹⁵ Pada takadiu saranie bhe kosasawindo mie weo lambuno, nosaliꞌi kainsamimo ambano, “Ane fekihi kanauꞌomu idi ini aparasaeamo mpuu ne Yesus, mai butuomu se lambuku.” Nofosuhu kainsami sampe taangkafie kamesalono.

¹⁶ Sepaku, nandoo takala se kasambaheaꞌa maitu tapoꞌawaꞌao seemie bhatua hobhine. Kalambe aini nopesuakie seetani sampe nopande nekona-kona so kumadhadhiaꞌano we oleo mbuhumai. Kapandeno naꞌa dokodhoianemo kafeompuꞌano.

¹⁷ Anoa nokaangka Paulus bhe insaodi, bhe nokei ambano, “Andoa ini katudunomo Lahataꞌala Foliuno Kuasa. Andoa dofohatoangkoomu nada amai dhalano so sumalamatiꞌaoꞌomu.”

¹⁸ Ampa seꞌoleo haa oleo sakei peda naꞌa. Tamaka Paulus miinamo namoolie lalono nofetingke kahunggaino maitu. Lasao nodoliki kalambe aitu maka nopugau ne seetani mesuakie ambano, “Weo neano Yesus Kristus, atuduko limbaꞌo toha maiꞌao ne kalambe aini.” Seetani anaꞌa lasao nolimba nomaiꞌao ne kalambe amaitu.

Mandeꞌaono lambuno katohongku we Filipi 16:19-40

¹⁹ Kafeompuꞌano bhatua hobhine amaitu dopandeꞌaomo lalondo, ingka gahaꞌa kaeꞌawaꞌando dhoi maitu nomiinaemo. Dadiꞌanomo dohakomo Paulus bhe Silas maka dobuluda we kadeteno daoa, doowada te wiseno sahano kota.

²⁰ Dohato ne wisendo kabhalaꞌino kota maitu, dopugaumo ambado, “O miendo Yahudi ini dehabu kahungga weo kotantoomu ini!

²¹ Adhati nefoguhuꞌaondo o falia datumahimae tawa damangkafie intaodiomu warga negarano Roma!”

²² Mie bhahi doehemimo dua Paulus bhe Silas. Sahano kota detudumo mie dakumokape pakeando maka damepekida.

²³ Pada dolangasaanda kahambi, dofopesuadamo weo katohongku. Mandeꞌaono katohongku dotudue nadhumaganida sepaliꞌa.

²⁴ Nofetingke kakiino pahinta anaꞌa, mandeꞌaono katohongku nofopesuada ne boloku we wunta-wuntano katohongku maka nolangkeda.

²⁵ Kafewuntaꞌino alo Paulus bhe Silas dosambaheamo bhe delagu-lagu dopudhi Lahataꞌala. Katohongku bhaindo dofetingkeda dua.

²⁶ Gahaꞌa tanosinandooꞌamo luali moꞌosa sampe sandino lambuno katohongku nomaunda. Ne naꞌa dua kosasawiꞌae fointono katohongku notilengka bhe langkendo nopuli notibhosa.

²⁷ Sanoepe mandeꞌaono lambu katohongku bhe nowoha fointo nopuli notilengka, nobunamo kampueno namongko wutono. Weo fekihino katohongku dopulimo dofilei.

²⁸ Tamaka Paulus nokeimo nofekabhala-bhala ambano, “Koe pongko wutomua! Kosasawi mani nandoo kainsami!”

²⁹ Mandeꞌaono lambu katohongku maitu nesalo kantalea maka notende we lalo, tanokahedu-hedumo nolongko notaohao sombano ne Paulus bhe Silas.

³⁰ Kohoduando nofolimbadamo bhe nopugau ambano, “Aehabu ae bhahaa so asumalamatiꞌao?”

³¹ Dotobhoosimo ambado, “Parasaeamo ne Ompu Yesus! Tetewei sumalamatimo, wutomu bhe kosasawindo mie weo lambumu!”

³² Lasao dofohatoanda bhoasaono Ompu, ne anoa bhe kosasawindo mie weo lambuno.

³³ Kafewuntaꞌinomo dua alo naꞌa, mandeꞌaono lambuno katohongku naꞌa nowowoꞌoda maka nofewaniu lewe-leweno ulundo. Ne naꞌamo dua anoa bhe kosasawindo mie weo lambuno dokadiu saranida.

³⁴ Pada peda naꞌa nowowoꞌodamo se lambuno maka neꞌondofianda dohumaa. Kaꞌiano maka mbaꞌinomo anoa bhe kosasawindo mie weo lambuno doparasaeamo ne Lahataꞌala.

³⁵ Nopooli nomentae, kabhalaꞌino kota detudumo dhagaꞌino kota dakumala se mandeꞌaono lambu katohongku. Andoa doowili ambado, “Folimbadamo mie hoduano itu!”

³⁶ Mandeꞌaono lambu katohongku lasao nofosampe kaowilindo maitu ne Paulus, ambano, “Kabhalaꞌino kota doowili kanau amolimbakoomu. Dadiꞌanomo kalamoomu weo kabarakatino Ompu!”

³⁷ Tamaka Paulus tanopugau ne dhagaꞌino kota maitu ambano, “Insaodi ini warga negarano Roma! Miinaꞌo dabhitahaki kainsamia, tadopaꞌindulumo dopepeki kainsami ne wisendo mie bhahi, pakade dotohongku kainsami. Aitu gahaꞌa tadamolimba kainsamimo dua patudhundo pae daefemata-mataa. Pae naembali nada inia! Tabeano damai damolimba kainsami wutondo!”

³⁸ Dhagaꞌino kota naꞌa dopoleleꞌaomo pugauno Paulus ne kabhalaꞌino kota. Sadofetingke Paulus bhe Silas maitu warga negarano Roma, doteꞌimo.

³⁹ Dadiꞌanomo domai desalo maꞌafu ne Paulus bhe Silas maka doowada we simbalino katohongku bhe desaloida mpuu dahumunsamo kota aitu.

⁴⁰ Domaiꞌao we katohongku naꞌa dekansuhu se lambuno Lidia. Pada dopoꞌawa-awa bhe bhahitieꞌi ne itu bhe dolawesi lalondo, Paulus bhe Silas dokalamo.