Tula-tulando rasulu 15 - Muna Southern Dialect

Hompuꞌa we Yerusalem 15:1-21

¹ Nandoo seemie hodua maiꞌaono we Yudea dokala we Antiokia dofoguhu bhahitieꞌi ne itu. Ambado, “Ane pae dasumunakoomu peda adhati kahunsaꞌaono Musa, pae naembalia damosalamatikoomua.”

² Tamaka Paulus bhe Barnabas doewangi bhe dotagali sepaliꞌa fekihindo maitu. Panda-pandano dobhotusiemo peda aini: Paulus bhe Barnabas bhe seemie hodua mie marasaeano ne itu dakumala dapoꞌawaꞌao rasulu sigaoꞌano bhe kamungkulaꞌi we Yerusalem so dapugau-gauꞌao kasabha netompaloindo naꞌa.

³ Umati marasaeano dopoangkaꞌaanda ampa we simbalino kotano Antiokia. Andoa dokala doangkai kadieno Fenisia bhe Samaria. Ne amai liwu kaangkaiꞌando detula-tulaꞌaomo bansano liwu suano Yahudi dodolimo dua ne Lahataꞌala. Bhihita anaꞌa doꞌiaꞌane bhahitieꞌi ne itu.

⁴ Sahatondo we Yerusalem dotahimadamo umati marasaeano, rasulu sigaoꞌano bhe kamungkulaꞌi. Pada anaꞌa detula-tulaandamo sabhaha nehabuno Lahataꞌala noangka ne limando.

⁵ Tamaka domai dua seemie hodua kamungkula miendo Farisi marasaeano ne Yesus. Ambado, “O mie suano Yahudi toka marasaeano ne Yesus tetewei dasumunada, damosuhuda damangkafi dua tubhono agama Yahudi.”

⁶ Dadiꞌanomo rasulu bhe kamungkulaꞌi dohompumo dapugau-gauꞌao anaꞌa.

⁷ Nompona kaowu dopololi-loliꞌao fekihindo, noehemo Petrus maka nopugau ambano, “Bhahitieꞌiku, ingka pandeꞌaaneomu mpini kabhao-bhaono Lahataꞌala nopili kanau maiꞌao ne olotamiu, neanomo bansano liwu suano Yahudi dametingke bhe damarasaea Bhihita Metaa nefoleleku.

⁸ Lahataꞌala mandeꞌaonomo lalondo manusia, nofotiwohamo bukutii notahimamo mie suano Yahudi, kapaꞌamo nowaꞌandamo dua Rohino peda intaodiomu miendo Yahudi.

⁹ Lahataꞌala miina napoꞌala-alaandaa bhe intaodiomu; totono lalondo padamo nofekangkiloe hampano doparasaea.

¹⁰ Dadiꞌanomo, noafa solo-soloꞌaoꞌomu Lahataꞌala? Noafa fewowoꞌoniandaomu wowoꞌo pata nepoolindo awuaꞌintoomu bhe intaodiomu dua?

¹¹ Koemo! Intaodiomu doparasaeaꞌomu hampano rahamatino Ompu Yesus Kristus, dosalamatimoomu pedamo dua andoa.”

¹² Kosasawindo umati humompuno miinamo dakodiua. Palusi anaꞌa dofetingkemo Paulus bhe Barnabas detula-tulaꞌao sabhaha tanda timenteꞌaono nehabuno Lahataꞌala mangkaꞌano ne limando ne wisendo bansano liwu suano Yahudi.

¹³ Pada detula-tula Paulus bhe Barnabas, nopugaumo Yakobus. Ambano, “Bhahitieꞌiku, soba fetingke kanauꞌomu!

¹⁴ Simon kaneꞌo pada netula-tulaꞌao kabhao-bhaono Ompu Lahataꞌala noꞌondofao mie suano Yahudi, patudhuno naepili ne olotando so membalino umatino.

¹⁵ Aitu noposahataa bhe kabuhino anabii peda aini,

¹⁶ ⸤ Ambano Lahataꞌala,⸥ ‘Namada kaowu sumuli toha amowanu lambuno Daud mopulaꞌano, kapulano naꞌa amekataaꞌie toha maka amotohoe,

¹⁷ neanomo kosasawindo mie sigaoꞌano daꞌumondofi Ompu, sabhaha bansano liwu suano Yahudi naꞌa akonadamo umatiku’. Nengkemo naꞌa nekobhoasaꞌaono Ompu, mokonandoono bhahi-bhahiꞌae.

¹⁸ Ompu nofofohatoꞌao bhahi-bhahiꞌae ini mpini dhamani wawono.

¹⁹ Dadiꞌanomo fekihiku idi mie suano Yahudi dumolino ne Lahataꞌala pae naembalia daehabuandaomu kasabha.

²⁰ Ampamo kaowu, tetewei daebuhianda suha keana dohumaa oti nepopanga ne barahala, koe domonsulea, koe dua dohumaa kamateno kadadi pata nesumbele bhe koe dohumaa hea.

²¹ Kapaꞌamo mpini dhamani wawono pahintano Musa dofoleleandae ne amai onuno liwu. Taꞌampamo aini Kitabino Musa amaitu taenomo oleono Sabat sadhia dobasae weo lambu kasambaheaꞌa.”

O suha so umati marasaeano we Antiokia 15:22-34

²² Rasulu, kamungkulaꞌi bhe kosasawindo umati dobhotusie daeꞌondo seemie hodua ne olotando umati naꞌa so kumalano we Antiokia dasumabhangka Paulus bhe Barnabas. Maka dopilimo Silas bhe Yudas nekonando dua Barsabas. Andoa ini sanea poisaꞌando umati ne Yerusalem.

²³ Andoa dowaꞌanda suha. Wambano peda aini, “Bhahitieꞌi mani suano Yahudi meateno we Antiokia, Siria bhe Kilikia. Suha aini nomaiꞌao ne insaodi rasulu bhe kamungkulaꞌi ⸤ we Yerusalem⸥ so hintimiu.

²⁴ Tafetingke nandoo seemie hodua maiꞌaono we insaodi ini dofohaliakoomu bhe dofekasabhaangkoomu kafoguhundo, tamaka suano katudu mani.

²⁵ Aitu padamo tamafakaane taepili seemie hodua so netudu mani damai we hintimiu itu. Andoa damai dapoowa-owa bhe Barnabas bhe Paulus, bhahitie nemoasiꞌao mani.

²⁶ Kohoduando ini dohelasimo damateꞌao neano Ompuntoomu Yesus Kristus.

²⁷ Dadiꞌanomo tatudumo dua Yudas bhe Silas, daetula-tulaangkoomu peda tibuhino weo suha aini.

²⁸ Rohino Lahataꞌala bhe insaodi tasepatudhu tabhotusie koemo dofotongkuangkoomu wowoꞌo mobhie. So nesodamiu ampamo kaowu maraluuꞌano ini:

²⁹ koemo humaaꞌomua oti nepopanga ne barahala, koe humaaꞌomu hea, koe humaaꞌomua kamateno kadadi pata nesumbele bhe koemo monsuleomua. Dhumaganiomu kaowu wutomiu ne anaꞌa, ingka habu metaamoomu. Pedamo kaowu anaꞌa, notumpu lalo mani.”

³⁰ Pada dofealai, Silas bhe Yudas dokalamo we Antiokia. Dohato dofohompudamo umati maka dowaꞌanda suha maitu.

³¹ Pada dobasae, umati doꞌia, notilawesianemo lalondo.

³² Yudas bhe Silas dotilentu dua anabii, dadiꞌanomo nompona dofoinaꞌu bhe dofekatangka lalondo bhahitieꞌi ne itu.

³³ Pada deate-ate ne itu, Yudas bhe Silas doꞌundaꞌaandamo dasumuli weo kabarakatino Ompu, dasumulimo we tumududa.

³⁴ [Tamaka Silas nokopatudhu naeate-ate deki ne itu.]

Paulus bhe Barnabas dopogaati 15:35-41

³⁵ Paulus bhe Barnabas nandoo deate-ate we Antiokia. Dopoowa-owa bhe mie sigaoꞌano dofofoguhu bhe defolele bhoasaono Ompu.

³⁶ Tamaka miina naomponaa Paulus nopugaumo ne Barnabas ambano, “Maimo dosuliana doangkai toha bhahitie marasaeano ne amai kota kaefoleleꞌanto bhoasaono Ompu endefiꞌini; neanomo damandeꞌaanemo peda amai koeatendo.”

³⁷ Barnabas gaonoa dawowoꞌo bhe Yohanes nekonando dua Markus.

³⁸ Tamaka fekihino Paulus pae naetaaꞌa nasumabhangkada Markus, kapaꞌamo Markus nohunsada we Pamfilia, miinamo napoowa-owaanda ampa nopalusi kahadhaando.

³⁹ Poꞌalatindo Paulus bhe Barnabas noꞌosa sepaliꞌa sampe panda-pandano dopogaati. Barnabas nowowoꞌo Markus maka dosawi ne bhangka dohope we Siprus.

⁴⁰ Tamaka Paulus nopilimo Silas. Andoa doposahunaꞌaandamo umati we Antiokia ne kabarakatino Ompu, pada anaꞌa dokalamo.

⁴¹ Doliligi kadieno Siria bhe Kilikia; ne itu dofekatangka kaparasaeando umati.