Tula-tulando rasulu 14 - Muna Southern Dialect

Paulus bhe Barnabas te kotano Ikonium 14:1-7

¹ Dohato te Ikonium tanopototomo dua. O rasulu hoduano naꞌa dopesua weo lambu kasambaheaꞌando miendo Yahudi, kaꞌosano kakesano kafoguhundo sampe dobhahi sepaliꞌa miendo Yahudi bhe suano Yahudi marasaeano ne Yesus.

² Tamaka miendo Yahudi mongaheno marasaeano, dofekasodomo lalondo mie suano Yahudi so dabansiꞌao bhahitie marasaeano.

³ Nompona dua Paulus bhe Barnabas deate-ate ne itu. Dokado defolele bhihitano Ompu. Wutono Ompu nofekatangka bhihitano rahamatino, nowaꞌanda kuasa daehabu tanda-tanda tapa mentela bhe giu timenteꞌaono.

⁴ Tamaka miendo kota maitu dewalamo: nandoo tumaino ne miendo Yahudi bhe nandoo dua tumaino ne rasulu hoduano maitu.

⁵ Pada aitu o mie suano Yahudi bhe miendo Yahudi doseꞌisemo bhe neangkaꞌindo. Andoa dosikoo-koomo damodee-dee rasulu hoduano maitu bhe dabhatumbulianda kontu ampa damate.

⁶ Sadopandeꞌaane patudhundo maitu, andoa dogampimo te kotano Listra bhe kotano Derbe bhe liwu-liwu pomaꞌotiꞌano, te kadieno Likaonia.

⁷ Ne itu defolele dua Bhihita Metaa.

Paulus bhe Barnabas te Listra bhe Derbe 14:8-20

⁸ Te Listra nandoo seemie moꞌane nokalu mpini pakalenteno. Mie aini sangkoha, miina sepaliꞌa namoolia nokala.

⁹ Anoa nofetingke dua pugauno Paulus. Gahaꞌa Paulus notontoe, wohaꞌano kaparasaeano mie aini naembali naoꞌosaane.

¹⁰ Maka Paulus nopugaumo nofekahaa-haaꞌie ambano, “Ehe fekalaaꞌi aꞌemu!” Mie amaitu nopunda ngkaehe-ehe maka nosuli kumala.

¹¹ Mie bhahi dowoha nehabuno Paulus maitu, dokeimo weo wamba Likaonia ambado, “Dewantoomu dosampumo desahangka ne manusia.”

¹² Barnabas dokonae dewa Zeus, Paulus dokonae dewa Hermes hampano anoamo mugauno.

¹³ Maka nomaimo imamuno dewa Zeus, nomaiꞌao we lambu katisombaiꞌando dewa we simbalino kota. Anoa neowaꞌi sapi bholo bhe kataheno kamba-kamba se kagualino kota. Patudhuno napoowa-owa bhe mie bhahi dasumumbele sapi naꞌa so kapopanga ne rasulu maitu.

¹⁴ Dofetingke peda maitu Barnabas bhe Paulus dopobhensiꞌao pakeando poangka dotende ne wuntando mie bhahi bhe dokei ambado,

¹⁵ “Alee, noafa habuꞌaoꞌomu giu aitu? Insaodi ini ingka mie melaa, kabeanga dua hintimiu! Kahatoꞌa mani ne ini tamohatoangkoomu Bhihita Metaa so humunsaꞌaoꞌomu giu tapa kofahalaaꞌano ini, neanomo dumolimoomu bhe marasaeamoomu ne Lahataꞌala dumadino. Anoamo mokonandoono o lani, o dhunia, o teꞌi bhe kosasawiꞌae iꞌino.

¹⁶ Nandoo dhamani wawono Lahataꞌala tanokatahodamo sabhaha bansano liwu damangkafi totono lalondo seemie-seemie.

¹⁷ Tamaka Anoa sadaa-daa nofotiwohaanda katandaino Wutono. Aini maꞌanano nofoꞌondofao, nofosampuangkoomu use bhe pehapino wite setaꞌu-setaꞌu. Anoa nofekaweꞌikoomu bhe nofekaꞌia lalomiu.”

¹⁸ Mahinggamo rasulu dopugau peda naꞌa, mie bhahi nokomaꞌo pae datitagalia daesumbeleanda kapopanga.

¹⁹ Tamaka domaimo seemie hodua kamungkulaꞌindo Yahudi maiꞌaono te kotano Antiokia bhe Ikonium dowudhu mie bhahi datumai ne andoa. Paulus dobhatumbuliane kontu maka dobulue we simbalino kota, kunaꞌendomo nomatemo.

²⁰ Tamaka tangasano o mie marasaeano ne itu deehe-ehe dolibue, gahaꞌa nowanumo maka nopesua toha weo kota. Hato nomentae nokalamo we kotano Derbe nopoowa bhe Barnabas.

Paulus bhe Barnabas dosuli we kotano Antiokia 14:21-28

²¹ We Derbe, Paulus bhe Barnabas defolele Bhihita Metaa sampe dobhahi mie marasaeano. Pada anaꞌa dosulimo we kotano Listra, Ikonium bhe Antiokia.

²² Ne itu dofekatangka lalondo mangkafino Yesus, dotangahida nakumampuu-mpuu lalondo weo kaparasaeando ne Yesus. Dofohatoda dua tetewei nabhahi daeꞌawa kasabha so damesuaꞌao weo Kafopahintaꞌano Lahataꞌala.

²³ Ne amai tombudo umati neangkaindo, Paulus bhe Barnabas desangkeanda seemie hodua kamungkula so neangkando. Poangka dosambahea bhe dopoasa, kamungkulaꞌi andoa ini dofopulidamo ne Ompu neparasaeandomo.

²⁴ Andoa doliligi kadieno Pisidia sampe dohato we kadieno Pamfilia.

²⁵ We Pamfilia defolele Bhihita Metaa we kotano Perga maka dosampu we kotano Atalia ⸤ we wiwino teꞌi⸥ .

²⁶ Ne itu dosawimo ne bhangka dohope we Antiokia. Ne kotanomo Antiokia ini endefiꞌini andoa doposahunaꞌaanda umati ne kabarakatino Lahataꞌala dotandaki kahadhaando. Ampa aitu kahadhaa aitu dopooliemo.

²⁷ Sahatondo ne itu dofohompumo umati marasaeano maka detula-tulaanda sabhaha nehabuno Lahataꞌala noangka ne limando, pakade Lahataꞌala nelengkamo kaangkaꞌa mbali mie suano Yahudi so damarasaeaꞌao ne Yesus.

²⁸ Ne Antiokia naꞌa Paulus bhe Barnabas nompona dua deate bhe mangkafino Yesus ne itu.