Tula-tulando rasulu 12 - Muna Southern Dialect

Yakobus dofekamatee - Petrus nolapa maiꞌao weo katohongku 12:1-19

¹ Wakutuumo dua anaꞌa kolaki Herodes notandamo nofodee-dee seemie hodua umati marasaeano.

² Anoa netudu mie dopongko Yakobus kakutaꞌano Yohanes, dopongkoane kampue.

³ Nopandeꞌaane kaowu habuno maitu doꞌiaꞌane miendo Yahudi, Herodes tanoangka-angkamo sampe netudu mie datumaami dua Petrus. Wakutuu aitu hohaeaꞌano Roti Tapa Koragino.

⁴ Notihako kaowu Petrus, Herodes notududamo dotohongkue maka dodhaganie tantara fato tagua, dopopaa-popaa. Patudhuno namalusi hohaeaꞌano Paska nabhitahakie te wisendo mie bhahi.

⁵ Pedamo naꞌa Petrus dotaamie weo katohongku, tamaka umati marasaeano nokampuu-mpuu lalondo dosambaheaꞌane kansuhu ne Lahataꞌala.

⁶ Nengke naewine Herodes nabhitahakie te wisendo mie bhahi, alo aitu Petrus noodo dopoꞌolotaane dohodua tantara. Anoa dotapuane hante haa honda. Nandoo dua tantara sigaoꞌano dodhaga ne wiseno fointo.

⁷ Tambaꞌomo seemie malaꞌekatino Ompu neehe-ehe ne owano Petrus, tilangano tanohehamo weo boloku aitu. Malaꞌekati naꞌa notofa-tofa oweano Petrus bhe nofowanue. Ambano, “Wanumo fekahimba!” Gahaꞌa hante ne limano Petrus tanosihundumo.

⁸ Ambano dua malaꞌekati naꞌa, “Mekawawe maka fokana kaampini ne aꞌemu!” Petrus noangkafi pugauno naꞌa. Pada aitu nopugaumo toha malaꞌekati naꞌa, “Fokanamo dhubamu maka angkafi kanau!”

⁹ Palusi amaitu Petrus noangkafimo malaꞌekati maitu dolimba. Tamaka miina namandeꞌaane bhahaꞌi nehabuno malaꞌekati naꞌa kotu-kotuꞌu nokadhadhia, kunaꞌenomo nokopowoha kaowu.

¹⁰ Doangkai dhaga setaguano tadolaloida, doangkai toha dhaga setaguano, tadolaloida dua sampe dohatomo we kaguali uti humopeꞌano we kota. Kaguali anaꞌa tanotilengkaꞌaomo wutono. Dohato we simbali, dokalamo ampa we kasiku maka malaꞌekati naꞌa tambaꞌomo noila.

¹¹ Hato nopandeꞌao lalono, Petrus nopugaumo, “Kaneꞌomo apandeꞌaane gahaꞌa nokotu-kotuꞌu o Ompu notudu malaꞌekatino namolapa kanau maiꞌao ne kuasano Herodes bhe patudhu modaindo miendo Yahudi.”

¹² Pada nofekihi sebantaha nokalamo se lambuno Maria, inano Yohanes nekonando dua Markus. Ne itu dobhahi mie dopohompu-hompu dosambahea.

¹³ Nohato notengki-tengkimo fointo bhalano maka nomai seemie bhatua hobhine koneaꞌano Rode, nameꞌondoe bhahaꞌi laꞌae metengkino fointo naꞌa.

¹⁴ Hobhine maitu lasao notandai suahano Petrus, kaꞌosano kaꞌiano sampe fointo miina lasao nalumengkaea. Tanotende nosuli weo lambu maka nofohatoanda, bhe Petrus te wiseno fointo bhalano.

¹⁵ Ambado ne hobhine naꞌa, “Bhahaꞌi mobheemo?” Tamaka daa-daaꞌe nofintahaki pugauno. Ambado dua, “Bhahaꞌi o malaꞌekatino.”

¹⁶ Tamaka Petrus nokatengki kansuhu fointo. Hato dolengkae, dowohaemo, nopuli mentendo.

¹⁷ Tamaka Petrus noaleda keana dohobho, pada aitu netula-tulaandamo notondae Ompu nomaiꞌao weo katohongku. Ambano dua Petrus, “Kala metula-tulaꞌaoꞌomu kadhadhia aini ne Yakobus bhe bhahitientoomu sigaoꞌano.” Pada anaꞌa nolimbamo maka nokala we liwu sigaoꞌano.

¹⁸ Nomentae o tantara tadohialelemo. Andoa dopofee-feena bhahaꞌi noafamo Petrus.

¹⁹ Herodes netudu mie daꞌumondofi Petrus, tamaka miina dapoꞌawaanea. Dadiꞌanomo, Herodes nofotudumo damee-meena tantara dhumaganie maitu maka damongkoda. Pada kadhadhia anaꞌa Herodes nokalamo nomaiꞌao we kadieno Yudea nohope we kotano Kaisarea maka neate ne itu.

Kamateꞌano Herodes 12:20-23

²⁰ Kolaki Herodes noꞌamaha sepaliꞌa ne miendo Tirus bhe Sidon. Dadiꞌanomo andoa maitu dopugau-gau dakumala dapoꞌawaane. Andoa dowudhu kadeki Blastus, neangkando kumahadhaano weo kamalino Herodes, nopotunduꞌaanda. Andoa desalo dapometaa hampano miendo Tirus bhe Sidon sadhia deꞌawa nehumaando nomaiꞌao we liwu neowano kolaki Herodes.

²¹ Maka Herodes netempomo seꞌoleo so kapoꞌawa-awaꞌando. Ne oleo anaꞌa Herodes nopakemo pakea kakolakiꞌano, nengkoha te kurusi melangkeꞌano maka nepedato.

²² O raꞌeatino debhidha bhe dokei, “Aituꞌae beano suahano ompu, suano suahano manusia!”

²³ Wakutuumo dua anaꞌa Herodes lasao nopepee malaꞌekatino Ompu, hampano miina namosibhala Lahataꞌala. Uluno nohumaaꞌe kaꞌule-ule, komate-mateno.

Barnabas bhe Saulus nopilida Rohino Lahataꞌala 12:24—13:3

²⁴ Bhoasaono Lahataꞌala sadhulu kaꞌewa nolele; sadhulu dua kabhahi mie marasaeano ne Yesus.

²⁵ Palusi dodhalangi takando doꞌondofao umati we Yerusalem, Barnabas bhe Saulus dosulimo we Antiokia. Dowowoꞌo dua bhe Yohanes, nekonando Markus.