Tula-tulando rasulu 11 - Muna Southern Dialect

Petrus nofokantibha wutono ne wisendo umati we Yerusalem 11:1-18

¹ Rasulu bhe bhahitie marasaeano we Yudea dofetingkemo mie suano Yahudi detahimamo dua bhoasaono Lahataꞌala.

² Nohato Petrus we Yerusalem miendo Yahudi marasaeano doposalamaꞌanaanemo.

³ Ambado, “Hintu ini pesua weo lambudo mie suano Yahudi tapa nesuna, pakade humaa pombali-mbali bhe andoa.”

⁴ Tamaka Petrus notalesaandaemo sabhaha kumadhadhiaꞌano nomaiꞌao ne tulu-tulungano, ambano,

⁵ “Tangasano asambahea we Yope tambaꞌomo akopowoha. Nandoo kabeanga o bhandu notikantai kofatosikuaꞌae nosibulu nomaiꞌao te lani nosampu ne wiseku.

⁶ Afeꞌondoe, gahaꞌa awohamo sabhaha kadadi fato mbaliꞌano aꞌe, kadadi mogila, kadadi sumola bhe kaꞌuhi lumola.

⁷ Maka afetingke suaha nopugau kanau, ‘Petrus ehe, sumbeleda maka humaada!’

⁸ Tamaka atobhoosi, ‘Paise Ompu, aongahe hampano miinaꞌo sepaliꞌa aomaaꞌa giu moharamu bhahaꞌi tapa mongkilono.’

⁹ Tamaka nofendua toha suaha naꞌa nopugau kanau, ‘Nefohalalano Lahataꞌala, pae naembalia moharamue hintu.’

¹⁰ Anaꞌa nokadhadhia sampe tolu paku maka kosasawiꞌae naꞌa notisangke toha te lani.

¹¹ Nopobutu dua katudu totoluno maiꞌaono we Kaisarea umondofino idi dohatomo te wiseno lambu kabutuꞌa mani.

¹² Ambano Rohino Lahataꞌala ne idi, ‘Kalamo angkafida, koemo kamihi-mihia!’ Bhahitie nonoono ini dopobhai kanau sampe tapesua weo lambuno Kornelius.

¹³ Anoa netula-tula kainsami nokopowohaꞌao seemie malaꞌekati neehe-ehe weo lambuno bhe nopugauane ambano, ‘Metudu mie dakumala we Yope daꞌumulei Simon nekonando dua Petrus.

¹⁴ Anoa naꞌa namosampeangko bhihita so sumalamatiꞌao wutomu bhe kosasawindo meateno weo lambumu.’

¹⁵ Maka hato apuga-pugau tambaꞌomo Rohino Lahataꞌala nosampu nokabhinti andoa, pasae ne intaodiomu endefiꞌini.

¹⁶ Tanokofeꞌulaimo dua laloku ne bhoasaono Ompu, ‘Yohanes nofokadiuꞌao oe, tamaka hintimiu dakumadiuangkoomu Rohino Lahataꞌala.’

¹⁷ Nentaleamo Lahataꞌala nowaꞌanda kadawu peda dua ne intaodiomu pakatandano doparasaeaꞌomu ne Yesus Kristus. Dadiꞌanomo ingka pae naembalia atumagali Lahataꞌala!”

¹⁸ Dofetingke peda maitu miinamo dakodiua, tadopudhimo kakalabhiano Lahataꞌala. Ambado, “Ingka gahaꞌa mie suano Yahudi nowaꞌanda dua kadawu Lahataꞌala dametompaꞌao dhosando so dadumadiꞌao suhue dhamani!”

Umati marasaeano we Antiokia 11:19-30

¹⁹ Nopalusi dopongko Stefanus dobhahimo mie marasaeano dotigasa mbaꞌinomo dofodee-deeda. Andoa dohato we kadieno Fenisia, we witeno Siprus bhe we kotano Antiokia. Tamaka defolele Bhihita Metaa ne miendo Yahudi kaowu.

²⁰ Ne olotando andoa maitu nandoo dua miendo Siprus bhe miendo Kirene humatono we Antiokia. Andoa ini dopuga-pugau dua ne mie suano Yahudi dofohatoanda Bhihita Metaa putae Yesus maitu o Ompu.

²¹ Kuasano Ompu nopobhaianda maka dobhahi sepaliꞌa marasaeano, dodolimo ne Ompu.

²² Bhihita aini dofetingkee dua umati marasaeano we Yerusalem maka dotudu Barnabas nakumala we Antiokia.

²³ Nohato we naꞌa Barnabas noꞌia sepaliꞌa nowoha kabarakatino Lahataꞌala ne andoa maitu. Anoa notangahida kosasawindo nakumampuu-mpuu lalondo damasande ne Ompu.

²⁴ Barnabas ini mie metaano lalo, notangka kaparasaeano bhe nokabhintie Rohino Lahataꞌala. Dadiꞌanomo dhulumo kabhahi mie marasaeano ne Ompu Yesus.

²⁵ Pada anaꞌa Barnabas nokalamo we Tarsus noꞌondofi Saulus. Hato nopoꞌawaane nowowoꞌoemo we Antiokia.

²⁶ Setaꞌu kaomponanoa deate bhe umati marasaeano ne itu, dobhahi dua mie nefoguhundo. We Antiokia naꞌa kabhao-bhaonomo mie marasaeano ne Yesus dokonada miendo sarani.

²⁷ Wakutuu anaꞌa nandoo dua seemie hodua anabii maiꞌaono we Yerusalem dohato we Antiokia.

²⁸ Seemie, koneaꞌano Agabus, nofohatoanda so kumadhadhiaꞌano we oleo mbuhumai. Weo kuasano Rohino Lahataꞌala nofohatoanda kosedhuniaꞌae nakumantibhae gaba. Kafohatono naꞌa kotu-kotuꞌu nokadhadhia ne dhamani pahintano Omputo Kaisar Klaudius.

²⁹ Dadiꞌanomo mie mangkafino Yesus dobhotusiemo daetawunao dhoi ampa so nepoo-poolindo seemie-seemiea maka damakatuandae bhahitie marasaeano we Yudea.

³⁰ Kamafakando naꞌa dodhalangie maka dotudu Barnabas bhe Saulus damowa dhoi naꞌa we kamungkulaꞌindo umati marasaeano we Yudea.