Tula-tulando rasulu 10 - Muna Southern Dialect

Petrus bhe Kornelius 10:1-48

¹ We Kaisarea nandoo seemie suano Yahudi koneaꞌano Kornelius, anoa ini neangkando tantara. Kaseꞌisendo tantara nepandeꞌaono dokonae “Taguano Italia”.

² Anoa ini mie lumebe, koseꞌonu lambudo doteꞌi ne Lahataꞌala. Anoa nobhahi pakuno netulumi miendo Yahudi mokaeno bhe sadhia dua nosambahea ne Lahataꞌala.

³ Seꞌoleo, nahambi-hambi tolu matamo maꞌoleo, nokopowohamo. Weo powohano naꞌa nentalea sepaliꞌa nowoha malaꞌekatino Lahataꞌala nopesua weo lambuno maka noloꞌoi neano, “Kornelius!”

⁴ Kornelius noꞌondo malaꞌekati aitu maka nofeenaꞌao kateꞌi, “O ae bhahaa Ompu?” Ambano malaꞌekati naꞌa, “Kosasawiꞌae sambaheamu bhe katulumimu ne mie mokaeno notahimaemo Lahataꞌala maka Lahataꞌala nofeꞌulaikomo dua.

⁵ Aitu metudumo naseemie hodua so kumalano we Yope daꞌumulei Simon nekonando dua Petrus.

⁶ Anoa nobutu we lambuno Simon pande bhalula, meateno we wiwino teꞌi.”

⁷ Nokundo kaowu malaꞌekati pugauno ne anoa naꞌa, Kornelius nosaliꞌimo palima-limano dohodua bhe seemie tantara lumebeno, dhagano lambuno.

⁸ Pada nofohatoanda bhahi-bhahiꞌae, notududamo dakumala we Yope.

⁹ Nomentae, nahambi-hambi ompulu haa matamo pana oleo Petrus nofonimo te ato maka nosambahea. Wakutuu anaꞌa mie totoluno saꞌitu nandooda we sala tamaka domaꞌomo we Yope.

¹⁰ Petrus noꞌaho gaono naomaamo, tamaka tangasano detagana oti maitu tambaꞌomo nokopowoha.

¹¹ Nowohamo lani notilengka maka bhe sibuluno, kabeanga o bhandu notikantai kofatosikuaꞌae nosampu we wite.

¹² Iꞌino sabhaha kadadi fato mbaliꞌano aꞌe, kadadi sumola bhe kaꞌuhi lumola.

¹³ Tanofetingkemo dua suaha ambano, “Petrus ehe, sumbeleda maka humaada!”

¹⁴ Tamaka Petrus notobhoosimo, “Paise Ompu, aongahe hampano miinaꞌo aomaaꞌa giu moharamu bhe tapa mongkiloꞌano.”

¹⁵ Ambano toha suaha anaꞌa, “Nefohalalano Lahataꞌala, pae naembalia moharamue hintu.”

¹⁶ Kadhadhia aitu sampe tolu paku, pada anaꞌa o bhandu saꞌituini notisangkemo toha te lani.

¹⁷ Dukuno lalono Petrus, “O ae bhahaa maꞌanano powohaku maitua?” Tangasano nofeki-fekihie, katuduno Kornelius umondofino kabutuꞌano Petrus dohatomo te wiseno lambu.

¹⁸ Deloꞌoimo mie maka dofeenaꞌao bhahaꞌi lambumo aitu kabutuꞌano Simon koneaꞌano dua Petrus.

¹⁹ Tangasano Petrus nofesuhui maꞌanano powohano saꞌituini, nofohatoemo Rohino Lahataꞌala, “Bhe mie umondofiko dohodua.

²⁰ Ehemo, sampu poꞌawaanda maka angkafida. Koe kamihi-mihia hampano Idi tumududa we inia.”

²¹ Petrus lasao nosampu nopoꞌawaanda maka ambano, “Ingka idimo ini neꞌondofimiua. Maiꞌaoꞌomu ae bhahaa?”

²² Ambado, “Notudu kainsami Kornelius. Kornelius ini seemie neangkando tantara, lalono nelaa bhe noteꞌi ne Lahataꞌala. Kosasawindo miendo Yahudi dopandeꞌaanemo dua kataano lalono. Anoa neꞌawa kafohato maiꞌaono ne Lahataꞌala nefosampeno seemie malaꞌekati mongkilono. Weo powohano naꞌa Lahataꞌala nofohato Kornelius daꞌumuleiko kumala we lambuno nametingkeꞌao pugaumu.”

²³ Dadiꞌanomo Petrus nopugauanda daodo kadeki ne itu. Hato nomentae Petrus nowanumo maka dokala dopoowa-owa. Nandoo dua dohodua totolu bhahitie we Yope mangkafida.

²⁴ Pooli nomentae dohatomo we Kaisarea. Kornelius nontaa-ntaadamo pakade padamo nofohompuda bhahitie bhe sabhangkaꞌino.

²⁵ Nohato Petrus maitu Kornelius lasao nopoꞌawaane, nolongko te wiseno bhe notaohao sombano.

²⁶ Tamaka Petrus nofoehee ambano, “Ehe, idi ini ingka o manusia dua.”

²⁷ Poowa detula-tula, Petrus nopesuamo weo lambu, gahaꞌa dobhahi mie humompuno.

²⁸ Ambano Petrus ne andoa, “Ingka pandeꞌaaneomu o falia bhalano weo agama mani ane miendo Yahudi dopoanaꞌibhai bhe mie suano miendo Yahudi tawamoa dopesua weo lambudo. Tamaka Lahataꞌala padamo nofotiwoha kanaꞌe, pae naembalia akumona mie bhaiku dohaku tawa miina daongkiloa.

²⁹ Kanandooꞌanomo miina naobhie lalokua dosaliꞌi kanau amai ne ini. Aitu gaokua amandeꞌaane bhahaꞌi o ae patudhumiu saliꞌi kanauꞌomu.”

³⁰ Ambano Kornelius, “Netolumo hambi tolu mata, pedamo dua aitu oleoa, tangasano asambahea weo lambu tambaꞌomo awoha mie neehe-ehe ne wiseku, pakeano nokosilo.

³¹ Ambano mie anaꞌa, ‘Kornelius, sambaheamu bhe katulumimu ne mie mokaeno notahimaemo Lahataꞌala maka Lahataꞌala nofeꞌulaikomo dua.

³² Aitu metudu mie dakumala we Yope daꞌumulei Simon nekonando dua Petrus, anoa nobutu we lambuno Simon pande bhalula, meateno we wiwino teꞌi.’

³³ Dadiꞌanomo lasao aetudu mie daꞌumuleiko, hampano kataano lalomu ingka hatomo itua. Aitu tapohompu-hompumo ne wiseno Lahataꞌala tametingkeꞌao kaowilino Lahataꞌala so nefosampemu itu.”

³⁴ Pada aitu nopugaumo Petrus ambano, “Kotu-kotuꞌu kaneꞌomo alosangie gahaꞌa Lahataꞌala miina napoꞌala-alaanda manusia.

³⁵ Mieno liwu ae maka, mahingga Yahudi mahingga suano Yahudi, sumanomo noteꞌi ne Lahataꞌala bhe nehabu metaaꞌano, tetewei natumahimae Lahataꞌala.

³⁶ Ingka pandeꞌaanemoomu bhihita nefosampeno Lahataꞌala ne miendo Israel. Bhihita metaa naꞌa nofofohatoꞌao pometaaꞌano manusia bhe Lahataꞌala neowano Yesus Kristus, Ompundo kosasawindo manusia.

³⁷ Ingka pandeꞌaanemoomu dua sabhaha kumadhadhiaꞌano we witeno Yudea, notanda we Galilea nopalusi kakadiu nehatoꞌaono Yohanes.

³⁸ Pandeꞌaanemoomu dua Lahataꞌala nopili Yesus miendo Nasaret maitu maka nowaꞌane Rohino bhe kuasa. Anoa nolili nehabu metaaꞌano, nefekaꞌosa sabhaha mie nekuasaino Kafeompuꞌando seetani, mbaꞌinomo Lahataꞌala nopobhaiane.

³⁹ Insaodimo ini sakusiino sabhaha nehabuno we witeno Yudea bhe we Yerusalem, tamaka dopongkoe, dokantaiꞌe te sau salipu.

⁴⁰ Tamaka ne katolu oleono nofowanuemo Lahataꞌala nomaiꞌao ne mate, maka nofotiwohaandae manusia.

⁴¹ Ampamo kaowu mohae suano sabhaha miea, tamaka sakusii nepilino wawo Lahataꞌala, insaodimo ini. Insaodi tahumaa tafohoꞌu tapombali-mbali bhe Anoa palusi kawanuꞌano maiꞌao ne mate.

⁴² Yesus notudu kainsami tamolele Bhihita Metaa aini ne sabhaha liwu bhe tafofohatoꞌao putae Anoamo nepilino Lahataꞌala so bhitahakino mie dumadino bhe mateno.

⁴³ Anoamo ini nepulaoꞌaondo kosasawindo anabii putae ane damarasaea ne Anoa natiꞌamponi dhosando hampano kuasano neano.”

O mie suano Yahudi detahima dua Rohino Lahataꞌala 10:44-48

⁴⁴ Tangasano Petrus nopugau, nosampumo Rohino Lahataꞌala nokabhinti kosasawindo mie metingkeno pugauno.

⁴⁵ Miendo Yahudi marasaeano ne Yesus mangkafino Petrus maitu, kosasawindo tadomente mbaꞌinomo dowoha Lahataꞌala nowaꞌao dua Rohino ne mie suano Yahudi.

⁴⁶ Kapaꞌamo dofetingkeda dopugau depake wambano Rohi bhe dopudhi kakalabhiano Lahataꞌala. Maka ambano Petrus,

⁴⁷ “Naembali hampano datumagalidaa dakumadiuanda oe? Ingka andoa ini detahimamo dua Rohino Lahataꞌala peda intaodiomu?”

⁴⁸ Dadiꞌanomo Petrus notududamo dakumadiuda weo neano Yesus Kristus. Pada aitu desalomo ne Petrus naeate kadeki bhe andoa ampa naseꞌoleo haa oleo.