Tula-tulando rasulu 1 - Muna Southern Dialect

Yesus nodhandianda Rohino Lahataꞌala 1:1-5

¹ Teofilus nefosibhalaku, weo kitabi kabhao-bhaono aebuhi sabhaha nehabuno bhe nefoinaꞌuꞌaono Yesus notanda kabhao-bhaono,

² ampa ne oleono katisangkeꞌano te surugaa. Miinaꞌo natisangke te surugaa, weo kuasano Rohino Lahataꞌala padamo nohunsa pahintano ne rasulu nepilino.

³ Nopalusi kakadee-dee bhe mateno, Yesus nentuhu nofotiwoha Wutono ne rasuluꞌino peda tandano kotu-kotuꞌu nodadi. Fato fuluꞌa kaomponano nobhahi pakuno dowohae, nofohatoanda Kafopahintaꞌano Lahataꞌala.

⁴ Sepaku tangasano nohumaa bhe andoa, nopugauandamo ambano, “Koe hunsaomu Yerusalem ini, meateomu ne ini. Antagiomu dhandino Amaku, dhandino nepulaoꞌaoku endefiꞌini.

⁵ Kapaꞌamo Yohanes nofokadiuꞌao oe, tamaka paemo naomponaa hintimiu dakumadiuangkoomu Rohino Lahataꞌala.”

Yesus notisangke te surugaa 1:6-11

⁶ Wakutuuno rasulu dopohompu-hompu toha bhe Yesus, dofeenaemo ambado, “Ompu, naefie sumuli mowanue gahaꞌa Kafopahintaꞌano Israel? Haꞌoleomo ini bhahaa?”

⁷ Notobhoosimo Yesus, “Hintimiu miina namaraluua mandeꞌaaneomua oleo bhe tempo nefotantuno Amaku, kapaꞌamo anaꞌa kuasano Wutono.

⁸ Ampamo kaowu, nahumato nasumampu Rohino Lahataꞌala, hintimiu meꞌawaomu kuasa, maka membaliomu sakusiiku we Yerusalem, we kadieno Yudea, we kadieno Samaria ampa we tompano dhunia.”

⁹ Pada nopugau peda naꞌa, notisangkemo ne wisendo; sampe noꞌontomie olu maka miina damohaea.

¹⁰ Tangasano dototohana te lani doꞌondo-ondo Yesus tisangkeno naꞌa, tadosihatoꞌamo mie dohodua. Dohato deehe-ehe ne sohihindo; pakeando sakapu-kapute, maka dopugau ambado,

¹¹ “Miendo Galilea, noafa gahaꞌa mentoha-ntohaꞌaoꞌomu te lani? Yesus, newohamiu notisangke saꞌituini, namada kaowu nasumuli toha we dhunia ini, napototo hatono bhe kalano newohamiu saꞌituini.”

Rasulu domantaa-ntaa 1:12-14

¹² Palusi anaꞌa rasulu dosulimo we Yerusalem domaiꞌao te kabhawo nekonando kabhawono Zaitun. Kakodoꞌono bhe Yerusalem napesekilo.

¹³ Sahatondo we kota, dokalamo se lambu kabutuꞌando maka dofoni te boloku te wawo. Andoa ini ndo Petrus bhe Yohanes, Yakobus bhe Andreas, Filipus bhe Tomas, Bartolomeus bhe Matius, Yakobus anano Alfeus, bhe Simon miendo Zelot bhe Yudas anano Yakobus.

¹⁴ Andoa ini sadhia dosekakolalo dosambahea. Dosabhangkada dua hobhineꞌi, bhe Maria inano Yesus bhe bhahitieꞌino Yesus.

Matias dopilie mbali kabhoosino Yudas 1:15-26

¹⁵ Sewakutuu mie marasaeano dopohompu-hompu, dapemoꞌono haa fulu kabhahindo. Noehemo Petrus ne wunta-wuntando maka nopugau ambano,

¹⁶ “Bhahitieꞌiku, teteweimo nokoꞌula tibuhiꞌano weo Kitabi. Maꞌanano, kafohatono Rohino Lahataꞌala ne anabii Daud wawo-wawo, mulaoꞌaono Yudas, nokoꞌulamo. Yudas ini neangkando mie humakono Yesus.

¹⁷ Endefiꞌini, o sabhangkantoomu, dopilie dua mbali rasulu, nopototo kahadhaano bhe intaodiomu.”

¹⁸ (Yudas naꞌa padamo neꞌoli wite. Wite aitu noꞌoliane dhoi ponambono nopokanagauꞌao Yesus. Anoa nondawu kalongko-longko nosengka bhe handano, kahehewuno nopuli nosihuhu.

¹⁹ Kadhadhia amaitu dopandeꞌaane kosasawindo mie we Yerusalem, sampe wite anaꞌa dokonae ‘Hakeldama’ weo wambado, maꞌanano ‘Witeno hea’.)

²⁰ Notibuhi weo Kitabino Laguno Daud, ‘Heruane ae lambuno naolinomoa, hunsaꞌanomo koe bhe meatefiea.’ Notibuhi dua peda aini, ‘Heruane ae sodano damalae sigaoꞌano.’

²¹ Dadiꞌanomo tabeano bhe kabhoosino, so posabhangkaꞌa mani tasumakusiiꞌao Yesus kotu-kotuꞌu nodadimo toha. O mie so kabhoosino tetewei namaiꞌao ne olotando mangkafino Yesus nopoowa-owa bhe insaodi,

²² notanda nofokadiu Yohanes ampa nohunsa kainsami Yesus ne oleo katisangkeꞌano te surugaa.”

²³ Maka mie humatono maitu dekonamo dohodua, seemiea Yusuf koneaꞌano dua Barsabas (sigaꞌa dokonae dua Yustus) bhe seemieno Matias.

²⁴ Pada anaꞌa dosambaheamo ambado, “O Ompu Hintumo mandeꞌaono totono lalondo seemie-seemie! Fosusu kainsamie bhahaꞌi laꞌae ne olotando hoduano ini nepilimu,

²⁵ so mintahano sodano rasulu nehunsano Yudas. Kapaꞌamo Yudas nopesuamo ne kaeateꞌa mantasiꞌano so wutono.”

²⁶ Pada anaꞌa neando hoduano ini dopodaduanemo. Gahaꞌa nondawu ne Matias. Dadiꞌanomo Matias nokapotimo rasulu ompulu seemieno.