Titus 3 - Muna Southern Dialect

Daehabu metaaꞌano 3:1-11

¹ Mefeꞌulaianda umatimu, datumuhu ne pamarinta bhe mie kokuasano, daeangka ne pahintando bhe sadhia damantaa-ntaa daehabu metaaꞌano.

² Fohatoda dua koise dofoꞌumbu, koe dopotaga-tagali, tamaka dapometaa bhe damotiwoha kamaluno lalondo ne sabhaha mie.

³ Endefiꞌini intaodiomu dobhoheomu dua, miina daeangkaa bhe nokolilino totono lalontoomu, dembaliomu bhatuano nafusuu bhe sabhaha kapoindalono mbadha. Dadintoomu noponoꞌao podiu modai bhe kakonduano lalo, o mie dofobansi bhe intaodiomu dobansi dua mie bhainto.

⁴ Tamaka Lahataꞌala Mosalamati kaita padamo nofotiwoha kataano lalono bhe kanini kaasino ne manusia.

⁵ Anoa nofosalamati kaita suano mbaꞌinomo habu metaantoomu tamaka hampano rahamati bhe kabhelano lalono. Lahataꞌala nohunsa Rohino mongkilono weo totono lalontoomu so namekanggelaꞌiꞌao dhosantoomu maka sumuli dalumente weo dadi buꞌou.

⁶ Rohino naꞌa nowaꞌa kaitae Lahataꞌala miina naegana-ganaa, noangka ne Yesus Kristus Fosalamatino.

⁷ Patudhuno weo rahamatino intaodiomu sumuli dapometaa bhe Lahataꞌala bhe daeꞌawaomu dadi suhue dhamani, pedamo neposahunaꞌaontoomu.

⁸ Wamba aini nokotuꞌu. Gaoku mpuu fohatoandae kosasawiꞌae ini bhe fekagilie katangahimu, neanomo kosasawindo marasaeano ne Lahataꞌala kotu-kotuꞌu daꞌumulei lalondo dahumabu metaaꞌano. Kapaꞌamo aitumo metaaꞌano bhe kofahalaaꞌano mbali manusia.

⁹ Fekakodoꞌoeꞌomu sabhaha potagaliꞌa ngkabhohe-bhohe bhe tula-tulano sampuꞌa. Fekakodoꞌo dua wutomu ne powengke-wengkeꞌa bhe pogiha-gihaꞌaono tubhono agama Yahudi. Kapaꞌamo kosasawiꞌae naꞌa sanea tapa kofahalaaꞌano bhe nosia-sia.

¹⁰ Mie meowano powengke-wengkeꞌa weo umati ⸤ dhohono kafoinaꞌu sumempa⸥ , tangahie sepaku ampa haa paku. Ane pae nametingkeko, koemo moheruanea.

¹¹ Ingka pandeꞌaanemo, mie medando itu nokolilinomo fekihino, nokodhosa bhe nentaleamo naeꞌawa kahukumuno Lahataꞌala.

Kaowili kapuliaono 3:12-15

¹² Patudhuku atumudu Artemas bhahaꞌi Tikikus damai we hintu. Sahatondo lasao ondofie kasalawamu mai hato kanau we Nikopolis, kapaꞌamo akopatudhu aeate we naꞌa kosekawantaꞌae wulano use taꞌu aini.

¹³ Ulei lalomu tulumi ndo Zenas, pande Kitabi itu, bhe Apolos so kumalano itu, keana dokonikae weo kala-kalando.

¹⁴ Mientoomu tabeano dapoguhu dua dakumahadhaa metaaꞌano so kafaraluundo mentae mohondo, koe dembali mie tapa kofahalaa.

¹⁵ Kosasawindo bhahitieꞌi pobhai kanau we ini dofosampeangko salam. Fosampe kainsami dua salam mani ini ne mie marasaeano moasi kainsami ne itu. Sio-siomo kabarakatino Lahataꞌala sadhia napobhaiangkoomu!