Titus 2 - Muna Southern Dialect

Maraluuꞌano so kamongkulaꞌi, kahangku dadi bhe bhatua 2:1-10

¹ Tamaka hintu Titus, kafoinaꞌu nefolelemu tabeano napokantibha bhe kafoinaꞌu banarano.

² Tangahida kamungkula moꞌane tabeano damoolie damewanaki totono lalondo, namantasi damosibhalada, bhe dakotimbangi. Kaparasaeando ne Kristus tabeano nakumampuu-mpuu, kanini kaasindo ne mie bhaindo sadaa-daa bhe dapotaami weo kasabha.

³ Pedamo dua kamungkula hobhine, tangahida dadumadi metaa peda mantasiꞌano so mie meompuno ne Lahataꞌala, koise dofoꞌumbu, koise nofobhatuada kafohoꞌu. Andoa tabeano damande dafofoinaꞌuꞌao metaaꞌano,

⁴ neanomo damoinaꞌu dua hobhineꞌi kahangku dadi daoasiꞌao moꞌanendo bhe anaꞌindo,

⁵ dakotimbangi, naongkilo totono lalondo, dakokoso daꞌumondofao polambudo, naetaa lalondo bhe daeangka ne moꞌanendo. Ane dadumadi nada naꞌa, pae bhe mie ⸤ we simbalino umati⸥ so mekandidikino bhoasaono Lahataꞌala.

⁶ Pedamo dua moꞌane kahangku dadi, tangahida nada amai maka dua damewanakie totono lalondo.

⁷ Wutomumo so membalino sandahando weo habu metaa. Ane fofoinaꞌu, tabeano naelaa totono lalomu bhe kumampuu-mpuu,

⁸ pugaumu tabeano nabanara sampe pae bhe kapoolia damoꞌalako. Ane nada anaꞌa kaewamu tadaoambanoꞌaomo wutondo, hampano miina bhe modaiꞌano so dafoꞌumbuꞌao.

⁹ Bhatua tabeano datumuhu ne kafeompuꞌando, nada amai maka dua damekaꞌia lalono kafeompuꞌando, koise dopokantobhoosianea.

¹⁰ Koise dokalima-lima, tamaka damotiwohae kalaano totono lalondo bhe datiparasaea. Ane podiundo nada anaꞌa, ingka dofotiwohaemo ne mie bhaindo kakesano kafoinaꞌuno Lahataꞌala Mosalamati kaita.

Weo rahamatino, Lahataꞌala nofosalamati kosasawindo manusia 2:11-15

¹¹ Kapugauꞌaku peda anaꞌa, kapaꞌamo Lahataꞌala padamo nofotiwoha rahamatino nofosalamati kosasawindo manusia.

¹² Noangka ne rahamatino, Lahataꞌala nofoinaꞌu kaita dakumukundo sabhaha podiu modai bhe kapoindalono dhunia. Nofoinaꞌu kaita dua damewanaki totono lalonto, daembali mie banara bhe dadumadi lumebe we dhunia ini.

¹³ Ampa aini nandoo dontaa-ntaaꞌomu oleo bhalano neposahunaꞌaontoomu so meowano dawua. Ne oleo anaꞌa natiwohamo kakalabhiano Lahataꞌala Foliuno Kuasa bhe Yesus Kristus Mosalamati kaita.

¹⁴ Anoa padamo noowa Wutono sampe dopongkoe so intaodiomu, mbali nofofobebasiꞌao maiꞌao ne sabhaha podiu modai. Patudhuno dua naefokonandooꞌao umati mongkilono, so fehebuaꞌano Wutono, umati mokokosono humabu metaano.

¹⁵ Fohatoandae kosasawiꞌae wambano suha aini, tangahida bhe mefeꞌulaianda. Pakee sabhaha kuasa neꞌawamu. Koise bhe misakiko.