Titus 1 - Muna Southern Dialect

Kalengkano suha 1:1-4

¹ Titus anaku, suha aini nomaiꞌao ne idi Paulus, palima-limano Lahataꞌala bhe rasuluno Yesus Kristus. Idi ini dopili bhe dotudu kanau amekamatangka kaparasaeando mie nepilino Lahataꞌala, bhe tetewei dua atumulumida dalumosangi kafoinaꞌu banara posahataano bhe kafoinaꞌuno agamantoomu.

² Kafoinaꞌu aini nengkoha ne posahunaꞌaontoomu daeꞌawa dadi suhue dhamani. Dadi anaꞌa padamo nofodhandiane Lahataꞌala mpini miinaꞌo natifokonandoo dhunia. Ingka Lahataꞌala miina bhe kapooli nakopahaa.

³ Ne wakutuu toka nefotantuno, Lahataꞌala nofekakoꞌulaemo dhandino naꞌa weo bhoasaono, ⸤ o Bhihita Metaa⸥ . Foleleꞌano Bhihita Metaa aini noposahunaꞌa kanaꞌemo idi, nopoangkafi bhe pahintano Lahataꞌala Mosalamati kaita.

⁴ Titus, hintu anaku mpuu, kapaꞌamo intaodi saneamo marasaeano ne Kristus. Sio-siomo sadhia napobhaiangko kanini kaasi bhe katohopono dadi maiꞌao ne Lahataꞌala Amantoomu bhe Kristus Yesus Mosalamati kaita.

Kahadhaano Titus we witeno Kreta 1:5-16

⁵ Patudhuku ahunsako we witeno Kreta so mekataaꞌiꞌao pataꞌo tiꞌatoroꞌano. Patudhuku dua mesangke kamungkulaꞌi so neangkando umati ne seꞌonu-seꞌonu liwu, peda nefohatoꞌaoku kohaꞌanomo.

⁶ Seemie neangkando umati tetewei mie tapa kodengo-dengono, hobhineno seemie kaowu. Anaꞌino tabeano doparasaeamo ne Kristus, miina dakumonada mie dumadino mangkafino namisindo tawa mie tapa meangkano.

⁷ Kapaꞌamo seemie neangkando umati neꞌatoro kahadhaano Lahataꞌala, dadiꞌanomo tabeano suano mie kodengono, suano mie melangkeno diu, suano mansoꞌamahano, suano mempohoꞌuno, suano mansopogihano, suano kumadau-dauno bhe dhoi.

⁸ Neangkando umati tabeano nohelasi nefotiampe mie weo lambuno, nopoindaloe habu metaa, nopooli nofewanaki totono lalono, nokotimbangi, noꞌadhili bhe nongkilo totono lalono.

⁹ Anoa tetewei namintahaki kafoinaꞌu tiparasaea, peda toka nepoguhuꞌaono. Ane nada anaꞌa naembalimo nafotangahiꞌao kafoinaꞌu banara, naembalimo dua namotiwohaanda kaꞌalando mie mewangie.

¹⁰ Kapaꞌamo dobhahimo mie pata meangkano ne kafoinaꞌu metaa, mangke-mangkemo andoa nandoo mintahakino kafoinaꞌuno agama Yahudi. Mie bhaindo dobhohe-bhoheꞌianda sabhaha tula-tula pata kofahalaa.

¹¹ Mie medando naꞌa tabeano dadumampue nunsundo kapaꞌamo dobhahimo polambu nedai-daindo mbaꞌinomo dofohatoanda sabhaha kafoinaꞌu tapa mantasiꞌano. Habundo naꞌa so kaowu daeꞌawaꞌao laba haramu.

¹² Nandoo seemie anabii, miendo dua Kreta, nopugau ambano, “Miendo Kreta sadhia dokopaha, andoa tapedamo kadadi fohumaano, dokadau-dau bhe domantawa.”

¹³ Wambano anabii ini nokotuꞌu daanumo. Dadiꞌanomo fekagilie katangahimu so damarasaeaꞌao kafoinaꞌu banarano.

¹⁴ Tangahida koemo dokaangka-angka ne sabhaha kapu-kapunando Yahudi bhe atora nehabundo manusia tapa meangkano ne kabanara.

¹⁵ Mbali mie mongkilono totono lalo, o ae maka dua nepake sanea nongkilo ⸤ nohalala⸥ , tamaka mbali mie mohakuno fekihi bhe tapa marasaeano ne Kristus, nepakeno miina bhe mongkiloꞌanoa ⸤ sanea noharamu⸥ , kapaꞌamo naetaa fekihindo naetaa totono lalondo kumatanga-tangano saneamo mohakuꞌano.

¹⁶ Andoa dopugau ne mie bhaindo dopandeꞌao Lahataꞌala tamaka hampano habundo nopotagali bhe wambado naꞌa, ingka nentaleamo miina damandeꞌao Lahataꞌala. Andoa dotimohaku, miina daeangka ne katangahi, miina dua damooli dehabu metaaꞌano.