Roma 7 - Muna Southern Dialect

Desandaha ne tubhono kagaa 7:1-6

¹ Bhahitieꞌiku! Ingka apugau bhe mie mandeꞌaono tubhono agama. Miina mandeꞌaaneomua gahaꞌa putae sabhaha tubho noꞌatoro manusia ampa kaowu kawantano dadindo?

² Ibahano seemie hobhine gumaano, weo tubhono kagaa ingka notitapu ne moꞌaneno sasuhue dadino moꞌaneno naꞌa. Ane moꞌaneno nomatemo, ingka hobhine anaꞌa miinamo natitapua ne tubhono kagaa.

³ Tamaka ane moꞌaneno nandoo nodadi, gahaꞌa hobhine aitu nogaa toha bhe moꞌane sigaoꞌano, ingka dokonae nomonsule. Ampamo kaowu ane moꞌaneno nomatemo, hobhine aitu nobebasimo ne tubhono kagaa; mahinggamo nagumaa toha bhe moꞌane sigaoꞌano, miina namonsulea.

⁴ Pedamo dua hintimiu itu, bhahitieꞌiku. Hampano seꞌiseomu bhe mbadhano Kristus, momatemoomu maiꞌao ne tubhono agama Yahudi ⸤ sampe miinamo nakumuasaikoomu⸥ . Ampa aitu membalimoomu fehebuaꞌano sigaoꞌano, fehebuaꞌano Kristus nefodadi maiꞌao ne mate, neanomo dadintoomu nakofahalaa so Lahataꞌala.

⁵ Endefiꞌini dodadiomu doangkafi kamanusiantoomu. Wakutuu anaꞌa katokano mbadhantoomu nokuasaiꞌe sabhaha kapoindalo modai, dhohono nofoluaꞌe tubhono agama Yahudi, sampe fahalaano ingka neowa mate.

⁶ Tamaka ampa aitu domatemoomu maiꞌao ne tubhono agama Yahudi, dobebasimoomu maiꞌao ne tubho fokuhumano. Ampa aitu intaodi dofeompu ne Lahataꞌala doangkafi tubho buꞌou, tubhono Rohino Lahataꞌala; miinamo damangkafi tubho ngkodau tibuhino weo Kitabi.

O dhosa noangka ne tubhono agama Yahudi 7:7-13

⁷ Kaowu damugauꞌomu nada amai? Bhahaa nokomaꞌana tubhono agama Yahudi maitu nopototo bhe dhosa? Tantumo miina. Ane pae bhe tubhonomo agama Yahudi, ingka pae amandeꞌaane medando ae nekonando dhosa. Miina dua amandeꞌaanea medando ae nekonando kapoindalo modai, ane pae nofohato kanau tubhono agama Yahudi, “Koise mekapoindalo tapa membalino hakumu!”

⁸ Tamaka noangka ne tubhono agama maitu, o dhosa neꞌawa kasalawa nefolua sabhaha kapoindalo modai weo totono laloku. Kapaꞌamo ane pae bhe tubhono agama, ingka o dhosa pae bhe nepoolinoa, kanggetumo nomate.

⁹ Endefiꞌini adadi miina aepandeꞌao tubhono agama, tamaka saꞌapandeꞌao pahintano agama, o dhosa tanosidadiꞌamo maka idi amatemo.

¹⁰ Apandeꞌaomo laloku ingka tubhono agama kopatudhuno so meowano dadi, gahaꞌaitu meowanomo mate so idi.

¹¹ Noangka ne pahintano agama maitu, dhosa neꞌawa kasalawa nobhohe-bhoheꞌi kanau, bhahamoa noangka ne pahinta maitu nopongko kanau.

¹² Tubhono agama Yahudi nomaiꞌao ne Lahataꞌala, dadiꞌanomo sabhaha pahintano netaa, nobanara bhe nongkilo.

¹³ Kaowu nokomaꞌana bhahaa metaaꞌano maitu neowa kanau mate? Tantumo miina! Ingka o dhosamo meowano mate, ⸤ suano tubhono agama⸥ . O dhosa nepake kaowu metaaꞌano naꞌa ⸤ maꞌanano tubhono agama⸥ neowa kanau mate, neanomo sifatino dhosa nentaleamo. Pedamo anaꞌa noangka ne pahintano agama, nokobukutiimo kaꞌosano kadaino dhosa.

Potagaliꞌano weo totono lalondo manusia 7:14-25

¹⁴ Ingka dopandeꞌaanemo tubhono agama Yahudi nomaiꞌao ne Rohino Lahataꞌala, tamaka idi ini o manusia monale. Padamo doaso kanau aembali bhatuano dhosa.

¹⁵ Kapaꞌamo miina alumosangie podiuku: metaaꞌano nepatudhuiku miina ahumabuea, gahaꞌa modaiꞌano nebansiku nehabukumo.

¹⁶ Ane ahabu tapa nepatudhuiku, nokomaꞌana aꞌuumbetie putae tubhono agama Yahudi maitu netaa.

¹⁷ Ane peda anaꞌa, sakotuꞌuꞌano suanomo idi humabue, tamaka o dhosa meateno weo totono laloku.

¹⁸ Kapaꞌamo apandeꞌaane ne idi ini miina sepaliꞌa bhe metaaꞌano, patudhuku ne mbadha kamanusiaku ini. Nandoo kapoindalo metaa weo totono laloku, tamaka miina amoolie adhalangiea.

¹⁹ Miina ahumabu metaaꞌano nepatudhuiku, tamaka ahabu modaiꞌano tapa nepatudhuiku.

²⁰ Ane ahabu tapa nepatudhuiku itu, ingka suanomo idi tamaka o dhosa meateno weo totono laloku humabue.

²¹ Kapuliaono aeala tubho peda aini: ane patudhuku ahumabu metaaꞌano, sadhia modaiꞌano tumangkumi kanau.

²² Totono laloku noꞌiaꞌane tubhono Lahataꞌala,

²³ tamaka ne katokano mbadhaku awoha tubho sigaoꞌano, poewangino bhe tubhono Lahataꞌala neꞌakuino fekihiku. Panda-pandano idi ini kanggetumo notohongku kanau dhosa, kumuasainomo katokano mbadhaku.

²⁴ Kadaino maka kolauku idi ini! Laꞌae bhahaa so mosalamati kanau maiꞌao ne mbadha meowano mate ini?

²⁵ Foampe kaitaomu katumpuno lalo ne Lahataꞌala, kasalamati aini noowae Yesus Kristus Ompuntoomu. Dadiꞌanomo peda aini koeateno dadiku ini: totono laloku nofeompu ne tubhono Lahataꞌala, tamaka mbadha kamanusiaku nofeompu ne tubhono dhosa.