Roma 6 - Muna Southern Dialect

Domate bhe dodadi dopoowa bhe Kristus 6:1-14

¹ Kaowu ane peda anaꞌa damugauꞌomu nada amai bhahaa? Bhahaa daehabumo kansuhu dhosa neanomo rahamatino Lahataꞌala sedhuluꞌa kabhahino?

² Ingka teteweimo paise! Ingka o dhosa miinamo nafokuasaia, tapedamo mie mate ⸤ miinamo dakodhosaa⸥ . Dadiꞌanomo nada amai dua dadumadiomu kansuhu weo dhosa?

³ Miinaꞌo mandeꞌaaneomu gahaꞌa putae wakutuuno dekadiu sarani kosasawintoomu ini doseꞌisemo bhe Kristus Yesus? Aini nokomaꞌana doseꞌisemo bhe mateno Kristus.

⁴ Weo kakadiu sarani, intaodiomu domatemo bhe padamo dofokobuhu poowa bhe Kristus, neanomo tapedamo wutono Kristus dofodadie maiꞌao ne mate hampano kuasano Amano kumalabhiano, intaodiomu dua dadumadi weo dadi buꞌou ⸤ te dhunia ini⸥ .

⁵ Ane doseꞌisemo bhe Kristus dopototoomu weo mateno, ingka tetewei daseꞌise dua weo kawanuꞌano maiꞌao ne mate.

⁶ Ingka dopandeꞌaanemo, kamanusianto ngkodauꞌano dopongkoemo te sau salipu poowa bhe Kristus, neanomo kuasano dhosa ne mbadhanto nahumansurumo. Dadiꞌanomo paemo namobhatua kaita dhosa.

⁷ Kapaꞌamo laꞌae momateno, ingka nobebasimo maiꞌao ne dhosa.

⁸ Ane domatemoomu poowa bhe Kristus, maka doparasaea teteweimo dua dadumadi poowa bhe Kristus.

⁹ Kapaꞌamo dopandeꞌaanemo, nopalusi kawanuꞌano maiꞌao ne mate, Kristus paemo namatea, ingka miinamo nakumuasaiꞌe mate.

¹⁰ Mateno Kristus so ⸤ natumaloꞌao⸥ dhosa, mateno naꞌa ingka sepaku kaowu ampa suhue dhamani; ampa aitu nodadi, maka nodadi so Lahataꞌala.

¹¹ Dadiꞌanomo abhi wutomiu momatemoomu maiꞌao ne kuasano dhosa, tamaka dadimoomu so Lahataꞌala weo kaseꞌisemiu bhe Kristus Yesus.

¹² Koemo undaꞌaaneomu o dhosa nokokuasa weo mbadha kasaramiu, keana sadhia angkafiomu kapoindalono.

¹³ Koemo owaomu katokano mbadhamiu ne dhosa, namakee so patudhu modai. Tamaka owa wutomiu ne Lahataꞌala peda mie madano mateno suli dodadi. Owaomu dua katokano mbadhamiu ne Lahataꞌala, neanomo namakee so dhumalangiꞌaoꞌomu kapoindalono.

¹⁴ O dhosa paemo naembali kafeompuꞌamiu, kapaꞌamo hintimiu miinamo masandeomu ne tubhono agama Yahudi, tamaka pasandeomu ne rahamatino Lahataꞌala.

Haa honda kabhatuaꞌa 6:15-23

¹⁵ Kaowu peda ae? Naembali bhahaa daehabu kansuhu dhosa, hampano ingka miinamo damasande ne tubhono agama Yahudi tamaka dopasandemo ne rahamatino Lahataꞌala? Ingka teteweimo paise!

¹⁶ Miina mandeꞌaaneomua gahaꞌa, ane doowa wutondo ne seemie manusia so dadhumalangiꞌao kapoindalono, ingka dembalimo bhatuano mie neangkafi maitu; bheanea dembali bhatuano dhosa meowano mate, bheanea dembalimo bhatua meangkano ne Lahataꞌala, meowano katitahimaꞌanto peda mie banara.

¹⁷ Tamaka aitu foampe kaitaomu katumpuno lalo ne Lahataꞌala! Kapaꞌamo endefiꞌini hintimiu daanumo membaliomu bhatuano dhosa, tamaka ampa aitu sampuu-mpuu lalomiu angkafimoomu kafoinaꞌu metaa netahimamiu.

¹⁸ Hintimiu dofobebasikomoomu maiꞌao ne dhosa maka membalimoomu bhatua so mehabuno kabanara.

¹⁹ Kaesambiliꞌaku bhatua, aesandaha kaowu ne dadindo manusia seꞌo-seꞌoleo, kapaꞌamo nomahasai melosangiomu. Endefiꞌini ingka owaomu katokano mbadhamiu membaliomu bhatuano sabhaha diu timohaku bhe patudhu modai meowano kadai. Tamaka ampa aitu owaomu katokano mbadhamiu membaliomu bhatua so mehabuno kabanara meowano dadi mongkilo.

²⁰ Wakutuuno nofobhatuakoomu dhosa, miinaꞌo bhe pokaiꞌamiu bhe kabanara.

²¹ Wakutuu anaꞌa o laba ae bhahaa neꞌawamiu? Ingka mpahinomo kaambanono taꞌampamo aitu. Kapaꞌamo kaopuliꞌano sabhaha habu anaꞌa o mate.

²² Tamaka ampa aitu padamo dofobebasikoomu maiꞌao ne dhosa maka membalimoomu bhatuano Lahataꞌala. Labamiu naeowaangkoomu dadi mongkilo, kaopuliꞌano dadi suhue dhamani.

²³ Ponambo netahima maiꞌao ne dhosa ingka o mate, tamaka kawaꞌaono Lahataꞌala ingka dadi suhue dhamani weo kaseꞌise bhe Kristus Yesus Ompuntoomu.