Roma 5 - Muna Southern Dialect

Kapometaa bhe Lahataꞌala 5:1-11

¹ Dadiꞌanomo, hampano Lahataꞌala notahima kaitaomu peda mie banara mbaꞌinomo kaparasaeantoomu, maka ampa aitu intaodiomu dopometaamoomu bhe Lahataꞌala, noangka ne Yesus Kristus Ompuntoomu.

² Noangka ne kaparasaeantoomu ne Yesus Kristus ini, intaodiomu deꞌawamoomu dua kaangkaꞌa dopesua weo kalibuno rahamatino Lahataꞌala, kaeateꞌantomo ampa aitu. Nowula lalontoomu weo posahunaꞌao daeala dawu weo kakalabhiano Lahataꞌala.

³ Suano kaowu taꞌanaꞌaa, tamaka nowula dua lalontoomu weo kakadee-deentoomu, kapaꞌamo dopandeꞌaane o kakadee-dee neowa kakosabaha dopotaami.

⁴ Kakosabaha dopotaami neowa katangkano lalo tiꞌakui, katangkano lalo tiꞌakui neowa posahunaꞌao.

⁵ Posahunaꞌao aini paise nafofekandidiki lalo, kapaꞌamo totono lalonto noponoꞌaomo kanini kaasino Lahataꞌala. Kanini kaasi ini noowae Rohino Lahataꞌala toka newaꞌaono ne intaodiomu.

⁶ Wakutuuno miina dakonipooliomua, ne tempo toka nefotantuno Lahataꞌala, Kristus nomate so intaodiomu mie modai.

⁷ Kapaꞌamo miina naomudaa seemie namateꞌao mie banara, mahinggamo bheanea nandoo dua so mokadono namateꞌao mie metaa.

⁸ Tamaka Lahataꞌala nofotiwohamo kanini kaasino ne intaodiomu peda aini: Kristus nomate so intaodiomu wakutuuno nandoo dokodhosaomu.

⁹ Aitu intaodiomu nofotahimamo Lahataꞌala peda mie banara hampano tuhuno heano Kristus, maka teteweimo dua mada kaowu dasumalamati maiꞌao ne amahano Lahataꞌala hampano Kristus.

¹⁰ Wakutuuno nandoo dopomodaiꞌomu bhe Lahataꞌala, Anoa nopometaa kaita noangka ne mateno Anano, mangke-mangkemo aitu padamo dopometaaꞌomu, ingka teteweimo namosalamati kaita noangka ne dadino Anano.

¹¹ Suano kaowu taꞌanaꞌaa. Nowula dua lalontoomu mbaꞌinomo nehabuno Lahataꞌala mangkano ne Ompuntoomu Yesus Kristus, hampanomo Anoa intaodiomu dopometaa bhe Lahataꞌala ampa aitu.

Adam bhe Kristus 5:12-21

¹² O dhosa nopesua we dhunia ini hampano seemie manusia, nomaiꞌao ne dhosa nopesua dua mate, maka o mate nokangkanai kosasawindo mie, mbaꞌinomo kosasawindo manusia dokodhosamo.

¹³ O dhosa nonandoomo we dhunia mpini miinaꞌo nahumato tubhono agama Yahudi. Ampamo kaowu o dhosa maitu miina natilentua, hampano miina bhe tubhono agama so nekangkalaꞌi.

¹⁴ Mahinggamo peda anaꞌa, notanda ne dhamanino Adam tanohatomo dhamanino Musa, manusia nokuasaida mate. Mahinggamo mie tapa mekangkalaꞌino pahinta peda nehabuno Adam, nokuasaidamo dua mate. Adam ini sandahanomo dua seemie so humatono malusi anoa.

¹⁵ Ampamo kaowu kaꞌalano Adam miina napototoa bhe kawaꞌaono Lahataꞌala. Hampano kaꞌalano seemieno maitu, manusia bhahino nokangkanaidamo mate, gahaꞌaitu neowano seemieno ⸤ mbuhumaiꞌano⸥ nopobhansule sepaliꞌa: noangka ne manusia Yesus Kristus ini Lahataꞌala nofosampu rahamatino bhe kadawuno pontalabhi-labhino ne manusia bhahino.

¹⁶ Kawaꞌaono Lahataꞌala ini miina napobandingia bhe dhosa nehabuno seemieno maitu. Dhosano seemie manusia maitu neowa kabhotusi bhe kahukumu, tamaka nopalusi mie bhahi dehabu kaꞌala, nohatomo kadawuno Lahataꞌala meowano katitahimaꞌantoomu peda mie banara.

¹⁷ Hampano dhosano mie seemie, o mate nokokuasa ne manusia dhohono pokaiꞌano bhe mie aitu. Ingka nopobhansule sepaliꞌa losano nehabuno manusia seemieno, Yesus Kristus. Kapaꞌamo noangka ne Yesus Kristus, dotahimamoomu rahamatino Lahataꞌala pontalabhi-labhino bhe kawaꞌaono notahima kaita peda mie banara sampe dadumadi bhe dakokuasa ne dhunia ini.

¹⁸ Dadiꞌanomo dhohono kaꞌalano mie seemie kosasawindo manusia deꞌawa kahukumu, pedamo aitu hampano sehonda habu banara kosasawindo manusia notahimada Lahataꞌala peda mie banara, meowanomo dadi.

¹⁹ Hampano habuno seemie pata meangkano ne Lahataꞌala, manusia bhahino dembali mie kodhosa, pedamo dua aitu hampano habuno seemie meangkano ne Lahataꞌala, manusia bhahino datumahimada nada mie banara.

²⁰ Katifosampuꞌano tubhono agama Yahudi, neanomo manusia damandeꞌao lalondo putae kaꞌalando dhulu kabhahi. Ampamo kaowu sedhuluꞌa kabhahino kaꞌalando manusia, sedhuluꞌa dua kapontalabhi-labhino rahamatino Lahataꞌala.

²¹ Kuasano dhosa noangka ne mate, tamaka ampa aitu rahamatino Lahataꞌala kokuasano hampano nofotahimamo peda mie banara. Rahamatimo aini meowano dadi suhue dhamani namangka ne Yesus Kristus Ompuntoomu.