Roma 3 - Muna Southern Dialect

Kakalabhiando miendo Yahudi bhe kataino lalono Lahataꞌala 3:1-8

¹ Ane peda naꞌa ⸤ bheanea bhe so meenano⸥ , o ae bhahaa kakalabhiando miendo Yahudi? O ae bhahaa fahalaano kasuna?

² Ingka nobhahi sepaliꞌa, tanofegiu. Katandaꞌano ne miendomo Yahudi katiposahunaꞌaoꞌano bhoasaono Lahataꞌala.

³ Tamaka peda aꞌe bhahaa? Ingka nandoo miendo Yahudi tapa marasaeano bhe tapa tumaino lalo ne Lahataꞌala. Bhahaa pata kaparasaeando bhe kataino lalondo naꞌa namosali dua kataino lalono Lahataꞌala?

⁴ Ingka teteweimo paise, kapaꞌamo tabeano damandeꞌaane Lahataꞌala sadhia nobanara, tamaka kotika manusia liwuno paha. Anaꞌa noposahataa bhe tibuhino weo Kitabi ⸤ nopulaoꞌao Lahataꞌala⸥ peda ini, “Naetaa sabhaha nekobhoasaꞌaomu nakobukutiimo kakotuꞌuno, ane dasumangkatiko tetewei fotalo.”

⁵ Tamaka ane kaꞌadhilino Lahataꞌala sedhuluꞌa kantaleano hampano habu modaintoomu, kaowu damugauꞌomu nada amai bhahaa? (Pugauku ini aangkafi kaowu fekihindo manusia.) Bhahaa damugau putae Lahataꞌala miina naꞌumadhilia ane namondawu kaita kahukumuno?

⁶ Ingka teteweimo paise. Kapaꞌamo ane Lahataꞌala pae naꞌumadhilia, nada amai nabhotusi dhunia ini?

⁷ ⸤ Bheanea nandoo dua so meenano⸥ . Ampamo kaowu ane hampano pahaku kabanarano Lahataꞌala dhulu kantalea sampe kakalabhiano dhulu katifosibhala, noafaꞌao dua Lahataꞌala nabhotusi kanau peda mie kodhosa?

⁸ Noafa dua pae naembaliꞌao damugauꞌomu, “Mehabu kaitaomu modaiꞌano so notiwohaꞌao kataa.” Daanumo nandoo umumbu kanau apugau peda anaꞌa, tamaka mie mugauno medando naꞌa nopantasimo nahumukumuda Lahataꞌala.

Kosasawindo manusia sanea kodhosano 3:9-20

⁹ Kaowu pedamo ae bhahaa intaodiomu miendo Yahudi? Dofoliuda intaodi ini bhahaa bhe bansano liwu sigaoꞌano? Ingka miina! Saꞌituini pada afetanaanda, naetaa miendo Yahudi naetaa bansano liwu sigaoꞌano saneamo deate weo kuhumano dhosa.

¹⁰ Kapaꞌamo weo Kitabi notibuhi peda ini, “Miina bhe mie banara, maumo naseemie.

¹¹ Miina bhe kofekihino, miina bhe umondofino Lahataꞌala.

¹² Kosasawindo manusia dekapingkamo kaangkaꞌando, miinamo dakofahalaaꞌa, miina bhe humabu metaano, maumo naseemie.

¹³ Kagodu-godundo ⸤ nefolimba wamba mobuhu bhe timohakuno⸥ pedamo kobuhu ngkamanga-manga, lelando sakabhohe-bhoheꞌi, wiwindo tapedamo ule kobisa.

¹⁴ Wobhando sabhata-bhatata fodai-daino.

¹⁵ Aꞌendo nehimba nobhingkala so damotuhuꞌao heando bhaindo.

¹⁶ Ne amai kaangkaꞌando deowa kahansuru bhe kakadee-dee.

¹⁷ Kaangkaꞌano pometaa miina damandeꞌaanea.

¹⁸ Mie pedando maitu miina bhe kateꞌia ne Lahataꞌala.”

¹⁹ Tamaka dopandeꞌaaneomu bhahi-bhahiꞌae tibuhino weo Kitabino tubhono agama Yahudi mbali mie dumadino weo tubhono agama naꞌa. Pedamo anaꞌa kosasawindo manusia paemo dakowobhaa ⸤ dapotunduꞌao wutondo ne wiseno Lahataꞌala⸥ , kapaꞌamo kosedhuniaꞌae ini nabhotusie Lahataꞌala.

²⁰ Hampano bhe naseemie miina bhe netahimano Lahataꞌala peda mie banara mbaꞌinomo nodhalangi tubhono agama Yahudi; tamaka hampano nandoo tubhono agama maitu manusia dopandeꞌao wutondo dokodhosa.

Manusia notahimada Lahataꞌala peda mie banara hampano kaparasaeando 3:21-31

²¹ Tamaka ampa aitu Lahataꞌala padamo nofosusuꞌao kaangkaꞌa so datitahimaꞌao peda mie banara, o kaangkaꞌa tapa pokaiꞌano bhe tubhono agama Yahudi. Gahaꞌaitu kaangkaꞌa anaꞌa daanumo dosambilie dua weo Kitabino anabii Musa bhe Kitabindo anabii sigaoꞌano.

²² Kafotahimaꞌano Lahataꞌala peda mie banara naꞌa noangka weo kaparasaea ne Yesus Kristus. Kaangkaꞌa aini notilengka so kosasawindo manusia, hampano manusia miina dapoꞌala-alaa.

²³ Kapaꞌamo kosasawindo manusia sanea dokodhosa, miina dahumato ne kakalabhiano Lahataꞌala.

²⁴ Hampanomo kaowu rahamatino Lahataꞌala, manusia notahimada Lahataꞌala peda mie banara noangka ne Kristus Yesus fobebasino. Rahamati aini o kawaꞌao pata koꞌoli.

²⁵ Lahataꞌala padamo nofotantue putae Yesus nembali kapopanga mosalino amahano Lahataꞌala, noangka ne tuhuno heano. Kapometaa naꞌa datumahimae ane damarasaea ne Yesus. Aini nohabue Lahataꞌala so notiwohaꞌao kaꞌadhilino, kapaꞌamo padamo nosabahakie sabhaha dhosando manusia endefiꞌini, patamo katihukumuꞌando.

²⁶ Tamaka ampa aitu Lahataꞌala nobhotusiemo dhosando manusia so notiwohaꞌao kaꞌadhilino, neanomo nentaleaꞌao putae Wutono nobanara bhe nofobanara manusia marasaeano ne Yesus Kristus.

²⁷ Ane peda anaꞌa naembali bhahaa o manusia dasumangke-sangke wutondo ⸤ hampano dosalamati⸥ ? Ingka pae naembalia. Tamaka noafa pata kaembaliꞌano? Mbaꞌinomo habunto bhahaa? Ingka miina. Bhahi-bhahiꞌae nengkoha kaowu ne kaparasaea ⸤ ne Yesus Kristus⸥ .

²⁸ Kaopuliꞌano manusia dotahimada Lahataꞌala peda mie banara hampano kaparasaeando, suano mbaꞌinomo dodhalangi tubhono agama.

²⁹ Bhahaa Lahataꞌala maitu o Lahataꞌalando kaowu miendo Yahudi? Suano dua Lahataꞌalando bansano liwu sigaoꞌano? Ingka anoamo, Lahataꞌalando dua bansano liwu sigaoꞌano.

³⁰ Lahataꞌala ingka Kaseemie-mieꞌano, dadiꞌanomo Anoamo tumahimano miendo Yahudi peda mie banara hampano kaparasaeando, Anoamo dua tumahimano bansano liwu sigaoꞌano peda mie banara hampano dua kaparasaeando.

³¹ Ane peda naꞌa bhahaa nokomaꞌana hampano doparasaea kaowu ne Yesus Kristus, doꞌohoemoomu tubhono agama Yahudi? Ingka miina! Bhahamoa tanodhulu dofosibhalae.